قىزىق بولعاندا, جاس ستارتاپشىنىڭ ءىت-سالاسىنا قىزىعۋشىلىعى شاحماتتان باستالعان. بەس جاسىنان باستاپ زياتكەرلىك ويىنعا بەت بۇرىپ, ستراتەگيا قۇرۋدى, ەسەپتەۋدى ۇيرەنگەن. كەيىن ءتىپتى ءوزى وقيتىن ليتسەيدە شاحمات كلۋبىن دا قۇرعان.
الايدا ۋاقىت وتە كەلە, جوعارى سىنىپقا وتكەن سايىن بوس ۋاقىتتىڭ ازايعانىن سەزىنەدى. بىرنەشە باعىتتى قاتار الىپ ءجۇرۋ قيىنداي باستايدى. ۋاقىتتى ءتيىمدى پايدالانىپ, IT-سالاسىنا كوبىرەك كوڭىل ءبولۋ ماقساتىندا, 10-سىنىپتا جالپى ءبىلىم بەرەتىن مەكتەپكە اۋىسادى. بۇل قادام ونىڭ الەۋەتىن اشۋعا مۇمكىندىك بەرەدى. جاڭا مەكتەپتە ول وقۋشىلار سەنىمىنە يە بولىپ, مەكتەپ پرەزيدەنتى اتانادى. ۇيىمداستىرۋشىلىق قابىلەتىن كورسەتىپ, ءتۇرلى ءىس-شارا وتكىزىپ, ورتا قالىپتاستىرۋعا ۇلەس قوسادى.
مەكتەپ ومىرىندە ول ماڭىزدى بىرنارسەنى بايقايدى. ياعني قاتارلاستارى شەت ءتىلىن ءتۇرلى قوسىمشا ارقىلى قىزىعا ۇيرەنەدى. ال قازاق تىلىنە كەلگەندە مۇنداي زاماناۋي قۇرالدار جوقتىڭ قاسى. «نەگە انا ءتىلىمىزدى دە ءدال سونداي قىزىقتى فورماتتا ۇيرەنبەسكە؟» دەگەن وي ونى مازالاي باستايدى. ءسويتىپ, وسى سۇراق «SayRa» جوباسىنىڭ باستاۋىنا اينالادى.
11-سىنىپتا كوپشىلىك وقۋشى ۇلتتىق بىرىڭعاي تەستىلەۋگە دايىندالادى. ال نۇرلىحان بولسا باسقا جولدى تاڭدادى. سىنىپتاستارى ۇبت-عا قىزۋ كىرىسىپ جاتقاندا, ول ءموبيلدى قوسىمشا جاساۋمەن اينالىستى. بىراق ول ءوز تاڭداۋىنا سەندى. ايتۋىنشا, بۇل ونىڭ IT-سالاسىنداعى العاشقى جوباسى ەمەس. بۇعان دەيىن ونلاين كۇندەلىك جاساۋ ارقىلى تاجىريبە جيناپ ۇلگەرگەن.
«SayRa» قوسىمشاسىنىڭ ەرەكشەلىگى – ونىڭ تولىقتاي جەكە ەڭبەكپەن جاسالۋى. جوبا بارىسىندا ول ەشقانداي كوماندا جيناماعان. ينۆەستور دا تارتپاعان. بارلىق تەحنيكالىق جۇمىستى ءوزى ورىنداپ, جەكە قاراجاتىن جۇمساعان.
قوسىمشانى ازىرلەۋ, تەستىلەۋ, App Store-عا شىعارۋ – ءار كەزەڭى كۇردەلى ۇدەرىس. اسىرەسە پلاتفورماعا ورنالاستىرۋ تالاپتارى مەن تەكسەرىستەرى وڭاي بولماعان. «Apple»-ءدىڭ قاتاڭ تالاپتارىنان ءوتىپ, حالىقارالىق ستاندارتتارعا ساي ءونىم جاساپ شىعاردى. قازىرگى تاڭدا «SayRa» قوسىمشاسىن 500-گە جۋىق ادام جۇكتەپ ۇلگەرگەن. ەڭ قىزىعى, شەتەلدىك قولدانۋشىلار دا قىزىعۋشىلىق تانىتا باستاعان. دەمەك, بۇل جوبانىڭ الەۋەتى بار.
جوبا مۇنىمەن توقتامايدى. كەرىسىنشە, ەندى عانا دامۋدىڭ باستاپقى كەزەڭىندە تۇر. نۇرلىحاننىڭ الداعى جوسپارلارى: قوسىمشاعا AR تەحنولوگياسىن ەنگىزۋ, كامەرا ارقىلى ءسوز اۋدارۋ مۇمكىندىگى, ينتەرفەيستى اعىلشىن, قىتاي تىلدەرىنە بەيىمدەۋ, تولىققاندى ۇلتتىق تسيفرلىق ونىمگە اينالدىرۋ.
«كوپ وقۋشى ۇبت-نى ءبىلىمنىڭ تولىق كورسەتكىشى سەكىلدى كورەدى. بولاشاعىمىز تەستىلەۋگە تىكەلەي بايلانىستى دەپ ۇعادى. بىراق ولاي ويلامايمىن. بۇل تەك ءبىر كەزەڭ عانا. ەگەر ناقتى يدەياڭ بولسا, ونى كەيىنگە قالدىرماي, ءدال قازىر باستاۋ كەرەك. «SayRa» – جاي قوسىمشا ەمەس. بۇل – قازاق ءتىلىن جاڭا فورماتتا ۇسىنۋعا قوسقان ۇلەسىم. بولاشاقتا ونى ۇلكەن ەكوجۇيەگە اينالدىرعىم كەلەدى», دەيدى ول.
مەكتەپتى اياقتاعان سوڭ ول Astana IT University-گە ءتۇسۋدى جوسپارلاپ وتىر. ارينە بۇل جوبانى كاسىبي دەڭگەيگە كوتەرۋدىڭ كەلەسى ساتىسى بولماق. سونىمەن قاتار وقۋشى وتاندىق ينۆەستورلارمەن جۇمىس ىستەۋگە دايىن. ويتكەنى كەز كەلگەن ستارتاپتىڭ وسۋىنە قولداۋ مەن ورتا قاجەت.
جاس ازىرلەۋشىنىڭ بۇل قادامى قاتارلاستارىنا ناقتى ارەكەت ارقىلى ۇلگى بولارى انىق. ونىڭ باستاماسى قازاق ءتىلىن ۇيرەنۋدى جاڭا دەڭگەيگە شىعارىپ, تسيفرلىق ورتاداعى قولدانىسىن كەڭەيتۋگە سەرپىن بەرمەك. باستىسى, ول تەحنولوگيانى تۇتىنۋدىڭ ەمەس, ونى ۇلتتىق مازمۇنمەن بايىتۋدىڭ جولىن تاڭدادى. «SayRa» – جەكە جوبا عانا ەمەس, ۇلتتىق قۇندىلىقتى زاماناۋي فورماتتا جاڭعىرتۋدىڭ ءبىر كورىنىسى. بۇگىنگى وقۋشىنىڭ باستاماسى ەرتەڭگى ءىرى ەكوجۇيەگە اينالۋى دا عاجاپ ەمەس. ەڭ ماڭىزدىسى – وسىنداي تالاپتى جاستاردىڭ كوبەيىپ, قوعامعا جاڭا سەرپىن اكەلۋى.
