پرەمەر-مينيستر ولجاس بەكتەنوۆتىڭ توراعالىعىمەن وتكەن وتىرىسقا بەلارۋس رەسپۋبليكاسىنىڭ پرەمەر-ءمينيسترى الەكساندر تۋرچين, قىرعىزستان مينيسترلەر كابينەتىنىڭ توراعاسى – پرەزيدەنت اكىمشىلىگىنىڭ باسشىسى ادىلبەك كاسىماليەۆ, رەسەي فەدەراتسياسى ۇكىمەتىنىڭ توراعاسى ميحايل ميشۋستين, ارمەنيا رەسپۋبليكاسىنىڭ ۆيتسە-پرەمەرى مگەر گريگوريان, ەەك القاسىنىڭ توراعاسى باقىتجان ساعىنتاەۆ, سونداي-اق باقىلاۋشى مەملەكەتتەردەن – وزبەكستان رەسپۋبليكاسىنىڭ پرەمەر-ءمينيسترى ابدۋللا اريپوۆ, كۋبا رەسپۋبليكاسى پرەمەر-ءمينيسترىنىڭ ورىنباسارى – سىرتقى ساۋدا جانە شەتەلدىك ينۆەستيتسيالار ءمينيسترى وسكار پەرەس-وليۆا فراگا, يران يسلام رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى الي اكبار دجوۋكار قاتىستى.
وتىرىستى اشقان پرەمەر-مينيستر ولجاس بەكتەنوۆ ەۋرازيالىق ەكونوميكالىق وداقتىڭ ەكونوميكالىق ءوزارا ءىس-قيمىلدى تەرەڭدەتۋگە باعىتتالعان حالىقارالىق ۇيىم ەكەنىن اتاپ ءوتتى. وداق ەاەو ەلدەرىنىڭ ورنىقتى ەكونوميكالىق ءوسۋىن قامتاماسىز ەتۋ ءۇشىن ءوز ماقساتتارى مەن مىندەتتەرىن ۇدايى جۇزەگە اسىرادى. بۇل, ەڭ الدىمەن, تاۋارلار, قىزمەتتەر, كاپيتال جانە جۇمىس كۇشىنىڭ ەركىن قوزعالىسىن قامتاماسىز ەتەتىن ورتاق نارىقتى قالىپتاستىرۋدى قامتيدى. سونىمەن قاتار ەاەو ۇلتتىق ەكونوميكالاردىڭ تەحنولوگيالىق جاڭارۋىنا, ونەركاسىپ كووپەراتسياسىن دامىتۋعا, مۇشە مەملەكەتتەردىڭ الەمدىك نارىقتاعى ۇستانىمدارىن نىعايتۋعا ىقپال ەتەدى.
پرەزيدەنت قاسىم-جومارت توقاەۆ بەلگىلەپ بەرگەن باسىمدىقتارعا سايكەس قازاقستان ءوزىنىڭ توراعالىعى شەڭبەرىندە وداق قىزمەتىنىڭ سالالارىنا جاساندى ينتەللەكتىنى ەنگىزۋگە, ترانزيتتىك الەۋەتتى اشۋعا, ونەركاسىپتىك كووپەراتسيانى تەرەڭدەتۋگە, ىشكى نارىقتاعى كەدەرگىلەردى دايەكتى تۇردە جويۋعا, سىرتقى ساۋدا ىنتىماقتاستىعىن كەڭەيتۋگە باسا كوڭىل بولۋگە نيەتتى.
«2026 جىلعى 1 قاڭتاردان بەرى قازاقستان رەسپۋبليكاسى ەۋرازيالىق ەكونوميكالىق وداق ورگاندارىندا توراعالىق ەتەدى. وسىعان بايلانىستى مەملەكەت باسشىسى قاسىم-جومارت توقاەۆ مۇشە مەملەكەتتەردىڭ اتىنا قازاقستان توراعالىعىنىڭ نەگىزگى باسىمدىقتارى كورسەتىلگەن ۇندەۋ جولدادى. ەلىمىز ءوزىنىڭ الدىنا تولىققاندى تسيفرلىق ەل بولۋ جونىندە ستراتەگيالىق مىندەت قويىپ وتىر. وسى ماقساتتا ورتالىق ازياداعى ەڭ ءىرى حالىقارالىق IT-ستارتاپتار تەحنوپاركى سانالاتىن Astana Hub كومپانياسىنىڭ نەگىزىندە زاماناۋي ەكوجۇيە قالىپتاستىردى. ءبىلىم بەرۋدى, عىلىمي زەرتتەۋلەردى جانە يننوۆاتسيالىق جوبالاردى قولداۋ باستاماسى بىرىكتىرەتىن Alem.ai حالىقارالىق جاساندى ينتەللەكت ورتالىعى اشىلدى. ءبىز ەاەو بويىنشا ارىپتەستەرمەن تسيفرلىق رەتتەۋ جانە ەكونوميكانى ترانسفورماتسيالاۋ سالاسىندا ءبىلىم مەن تاجىريبە الماسۋعا دايىنبىز», دەدى و.بەكتەنوۆ.
پرەمەر-مينيستر كەدەندىك اكىمشىلەندىرۋ, لوگيستيكا, ونەركاسىپ, اوك سىندى تاعى دا باسقا باعىتتاردا جي-ءدى پايدالانا وتىرىپ, ەاەو مەملەكەتتەرىن زاماناۋي تەحنولوگيالارعا بەيىمدەۋدىڭ ماڭىزدىلىعىن اتاپ ءوتتى.
وداق ەلدەرىنىڭ كولىك-ترانزيتتىك الەۋەتىن تولىق اشۋ ماقساتىندا جي بازاسىندا جۇك اعىندارىن ۇيلەستىرۋدىڭ ينتەگراتسيالانعان پلاتفورماسىن قۇرۋ ۇسىنىلدى. بۇل جەتكىزۋ مەرزىمدەرىن قىسقارتۋعا, بيزنەس شىعىندارىن ازايتۋعا ءارى ەۋرازيالىق كولىك دالىزدەرىنىڭ باسەكەگە قابىلەتتىلىگىن ارتتىرۋعا مۇمكىندىك بەرەدى.
ۆەتەرينارلىق جانە فيتوسانيتارلىق باقىلاۋدان ءوتۋدى راستاۋ ۇدەرىستەرىن تولىعىمەن ەلەكتروندىق فورماتقا كوشىرۋ ءوزارا ساۋداداعى اشىقتىقتى قامتاماسىز ەتەدى. وسىعان بايلانىستى ەەك-كە وداققا مۇشە مەملەكەتتەرمەن بىرلەسىپ, قاعاز قۇجاتتارعا مىندەتتى تۇردە ءمورتابان قويۋدان باس تارتۋدى جانە ءۇشىنشى ەلدەرمەن اقپاراتتىق ءوزارا ءىس-قيمىل تەتىكتەرىن ازىرلەۋدى قوسا العاندا, وسى ماسەلەنى جان-جاقتى پىسىقتاۋ ۇسىنىلدى.
ونەركاسىپ پەن اوك سالاسىندا بىرلەسكەن كووپەراتسيالىق جوبالاردى قولداۋ تەتىكتەرى يننوۆاتسيالىق باستامالارعا, قوسىلعان قۇنى جوعارى وندىرىستەردى قۇرۋعا باعىتتالۋى كەرەك. دەمونستراتسيالىق ورتالىقتار, ستارتاپتار مەن سالالىق قۇزىرەتتىلىك ورتالىقتارى ارقىلى تسيفرلىق شەشىمدەر مەن جي-ءدى پايدالانۋدى ىنتالاندىرۋ قامتاماسىز ەتىلۋى قاجەت.
ەاەو-نىڭ ءسوزسىز قاعيداتى تاۋارلاردىڭ, كورسەتىلەتىن قىزمەتتەردىڭ, كاپيتال مەن جۇمىس كۇشىنىڭ قوزعالىس ەركىندىگى بولىپ قالۋعا ءتيىس. كوميسسيا مىندەتتەمەلەردىڭ ساقتالۋىن باقىلاۋدا بەلسەندى ءرول اتقارىپ, بيزنەس پەن ازاماتتاردىڭ مۇددەلەرىن قورعاۋدا جەدەل ارەكەت ەتۋى كەرەك. سونداي-اق ساۋدا سالاسىندا باسەكەگە قابىلەتتى ورتانى قالىپتاستىرۋدىڭ ماڭىزدىلىعى اتاپ ءوتىلدى.
ساۋدا-ەكونوميكالىق ءوزارا ءىس-قيمىلدى كەڭەيتۋگە, جاڭا سىرتقى نارىقتارعا شىعۋعا نازار اۋدارىلدى. اراب الەمى, وڭتۇستىك-شىعىس ازيا مەن افريكا ەلدەرى, سونداي-اق بەدەلدى وڭىرلىك بىرلەستىكتەرمەن ءوزارا ءىس-قيمىل پەرسپەكتيۆالى باعىتتار دەپ تانىلدى. ىنتىماقتاستىق ەكونوميكانى نىعايتۋعا ءارى حالىقارالىق وندىرىستىك تىزبەكتەردى دامىتۋعا ىقپال ەتەدى.
سونىمەن قاتار وتىرىس بارىسىندا بىرقاتار مەملەكەتتەردىڭ پرەمەر-مينيسترلەرى مەن ەاوە جانىنداعى باقىلاۋشى مەملەكەتتەر دەلەگاتسيالارىنىڭ باسشىلارى ءسوز سويلەدى.
ەۋرازيالىق ۇكىمەتارالىق كەڭەس (ەۇاك) وتىرىسىنىڭ قورىتىندىسى بويىنشا 12 قۇجاتقا قول قويىلدى. قابىلدانعان شەشىمدەر ينتەگراتسيالىق ۇدەرىستەردى ودان ءارى دامىتۋعا جانە مۇشە مەملەكەتتەر ەكونوميكالارىنىڭ تۇراقتىلىعىن نىعايتۋعا باعىتتالعان.
ەۇاك-نىڭ كەلەسى وتىرىسى بيىل 6–7 تامىز كۇندەرى شولپان-اتا قالاسىندا (قىرعىزستان) وتەدى.
