فوتو: اقوردا
مەملەكەت باسشىسى قازاقستان مەن الەم الپينيزمىندە اتى اڭىزعا اينالعان تۇلعامەن جۇزدەسكەنىنە قۋانىشتى ەكەنىن جەتكىزدى.
ء«وزىڭىزدىڭ زور قاجىر-قايراتىڭىز بەن اسا جوعارى كاسىبيلىگىڭىزدىڭ ارقاسىندا قازاقستان رەسپۋبليكاسىنىڭ كوك تۋى جەر شارىنىڭ اسۋ بەرمەس اسقارلارىندا جەلبىرەدى. الەمنىڭ ەڭ بيىك نۇكتەلەرىن باعىندىرعان تاجىريبەلى شىڭعا ورمەلەۋشى, حالىقارالىق تۋرنيرلەردىڭ جەڭىمپازى رەتىندە دۇنيە جۇزىنە داڭقىڭىز جايىلدى. ەۆەرەستكە شىعىپ, بەدەلدى «جەتى شىڭ» كلۋبىنا مۇشە بولعان العاشقى قازاقستاندىق اتاندىڭىز. ءسىزدى ەلىمىزدە الپينيزم مەكتەبىنىڭ نەگىزىن قالاۋشى رەتىندە قۇرمەتتەيدى. وتاندىق مەكتەپ قازاقستاننىڭ جاھاندىق برەندىنە اينالدى. تالاپ مەن ءتارتىپتى قاتار قوياتىن تالانتتى باپكەردەن ءبىر شوعىر الپينيست-سپورتشىلار ءتالىم الدى. ولاردىڭ قاتارىندا الەم رەكوردىن جاڭارتقان, چەمپيون اتانعان, حالىقارالىق الپينيزم قوزعالىسىنىڭ ەليتاسىنا كىرگەن مىقتىلار بارشىلىق. باپكەرلىكپەن شۇعىلدانعان ۋاقىت ىشىندە جۇزدەن استام سپورت شەبەرىن دايارلادىڭىز. شاكىرتتەرىڭىزدىڭ اراسىندا حالىقارالىق دارەجەدەگى سپورت شەبەرلەرى, ءتىپتى, ەڭبەك سىڭىرگەن سپورت شەبەرلەرى دە بار. ءسىزدىڭ جەتەكشىلىگىڭىزبەن قازاقستان قۇراماسى الەمدە ءبىرىنشى بولىپ بيىكتىگى 8 مىڭ مەتردەن اساتىن بارلىق 14 شىڭعا شىقتى. مۇنىڭ ءوزى بىرەگەي جەتىستىك سانالادى. سپورتشىلارىمىز ءالپينيزمنىڭ ءسىز قالىپتاستىرعان داڭقتى ءداستۇرىن جالعاستىرىپ, كوپتەگەن حالىقارالىق سايىستان تابىستى ورالىپ ءجۇر», دەدى پرەزيدەنت.
قاسىم-جومارت توقاەۆ ەرۆاند ءتيحونوۆيچتىڭ اسىل قاسيەتتەرى مەن ادامدارعا, اسىرەسە, الپينيستەرگە دەگەن شىنايى قامقورلىعىن جوعارى باعالادى.
«ادام ءومىرى ەڭ جوعارى سپورتتىق جەتىستىكتەردەن قۇندى» دەگەن تەڭەۋىڭىز الپينيستەر اراسىندا قاناتتى سوزگە اينالىپ كەتتى. «الپينيزم – ادام مەن تابيعات اراسىنداعى شاحمات ويىنى» دەپ ءدال ايتقانسىز. ك2 (چوگوري) شىڭىن بەتكە العان كومانداڭىزدىڭ الاي-تۇلەي بورانعا تاپ بولعانى ءمالىم. سول ساتتە شىڭنىڭ ۇشار باسىنا قول سوزىم جەر قالعانىنا قاراماستان, كەرى قايتتىڭىز. مۇنداي شەشىم قابىلداۋ وڭاي ەمەس. وسىدان-اق دانا, مەيىربان جان ەكەنىڭىزدى اڭعارامىز. جەتىستىك پەن جەڭىسكە ەشقاشان ماساتتانعان ەمەسسىز. بارىنە بەلگىلى, ۇيرەنشىكتى باعىتتارمەن جۇرگەندە دە ساقتىقتى ۇمىتپادىڭىز. كەز كەلگەن جورىققا وسىلاي تىڭعىلىقتى دايىندالۋ داڭقتى الپينيست, سپورتشى, تالىمگەر رەتىندە ءسىزدىڭ «تولقۇجاتىڭىزعا» اينالدى», دەدى مەملەكەت باسشىسى.
«اسقار شىڭدارعا قۇشتارلىق, تاۋعا شىعۋ – اۋەستىك قانا ەمەس, قورشاعان ورتانى قاستەرلەپ, لاستاماۋعا ۇندەيتىن ايرىقشا ەكولوگيالىق ءومىر سالتى. جاڭا كونستيتۋتسيادا كورىنىس تاپقان تابيعاتتى ايالاۋ, ەكولوگيالىق مادەنيەت جانە تازالىق قاعيداتتارى ۇلتتىق بولمىسىمىزبەن بىتە قايناسىپ كەتۋگە ءتيىس. تاۋ تاباندىلىققا, ءتارتىپ پەن جاناشىرلىققا ۇيرەتەدى. بيىككە كوتەرىلگەن ادام رۋحتانادى. ءدال وسى سەبەپتى الپينيزم مەن تاۋ ءتۋريزمىن ناعىز ءومىر مەكتەبى دەپ اتاۋعا بولادى. ول مىقتىلاردى شىڭدايدى, ءوز ورتاڭدا جاۋاپتى بولۋعا باۋليدى. بۇل مادەني ءارى پسيحولوگيالىق فەنومەندى بارىنشا قولداپ, ونى جاستار تاربيەسىندە پايدالانۋىمىز كەرەك. ۇكىمەتتىڭ, سالالىق مينيسترلىكتىڭ الدىندا ءالپينيزمدى سپورت جانە زاماناۋي تاۋ ءتۋريزمىنىڭ ءبىر ءتۇرى رەتىندە جان-جاقتى دارىپتەۋ مىندەتى تۇر. مەملەكەت پەن دەمەۋشىلەردىڭ قارجىسىن تارتا وتىرىپ, ناقتى ءىس-قيمىل باعدارلاماسىن ازىرلەۋ قاجەت. مەملەكەت بۇل وزەكتى مىندەتتى شەشۋدى قولعا الادى, وعان ءتيىستى نازار اۋدارىلادى», دەدى ول.قاسىم-جومارت توقاەۆ ەرۆاند ءتيحونوۆيچتىڭ عۇمىر جولىن جاسامپاز ءپاتريوتيزمنىڭ, ايرىقشا جانقيارلىق پەن اسا جوعارى كاسىبيلىكتىڭ جارقىن ۇلگىسى دەپ سانايدى.
«جاستار تاباندى ءارى ءونىمدى ەڭبەك ءاردايىم لايىقتى باعاسىن الاتىنىن كورۋگە ءتيىس. تابىستىڭ وڭاي كەلمەيتىنىن تۇسىنگەنى ءجون. ەڭبەك – ءبارىن جەڭبەك. مەيلى, سپورتتا, بيزنەستە, بىلىمدە, عىلىمدا, دالالىق جۇمىستا نە زاۋىتتا بولسىن, ءوز ىسىنە شىن بەرىلگەن, كوزدەگەن ماقساتى ايقىن ادامدار ومىرلىك مۇراتىنا جەتەدى. قۇرمەتتى ەرۆاند تيحونوۆيچ يلينسكي سياقتى ازاماتتار – قوعامنىڭ تىرەگى, ەرلىك پەن ەڭبەكقورلىقتىڭ, توزىمدىلىكتىڭ جارقىن ۇلگىسى. سوندىقتان مەن سىزگە الپينيزمدەگى اسا ۇزدىك جەتىستىكتەرىڭىز, سونداي-اق ەل سپورتىنىڭ دامۋىنا قوسقان ەلەۋلى ۇلەسىڭىز جانە بەلسەندى قوعامدىق قىزمەتىڭىز ءۇشىن جوعارى ەرەكشەلىك بەلگىسى – «قازاقستاننىڭ ەڭبەك ەرى» اتاعىن بەرۋ تۋرالى شەشىم قابىلدادىم. بۇگىن وسى ناگرادانى وزىڭىزگە زور قۇرمەتپەن تاپسىرامىن. ەرۆاند تيحونوۆيچ, سىزگە مىقتى دەنساۋلىق, باق-بەرەكە, مول تابىس تىلەيمىن! الپينيستەر اراسىندا ء«وزىڭىزدى ساقتاڭىز!» دەگەن ءسوز ءجيى ايتىلادى. سىزگە جانە جانىڭىزدا ءجۇرىپ, سەرىك بولعان شاكىرتتەرىڭىزگە وسى تىلەكتى ارناعىم كەلەدى», دەدى قاسىم-جومارت توقاەۆ.ەرۆاند يلينسكي اتقارعان قىزمەتىنە جوعارى باعا بەرىپ, وتاندىق الپينيزمگە ايرىقشا كوڭىل بولگەنى ءۇشىن قاسىم-جومارت توقاەۆقا العىس ايتتى.
«مۇنى قازاقستان الپينيستەر قاۋىمى جەتكەن جەتىستىكتەردىڭ مەملەكەت دەڭگەيىندە تانىلۋى دەپ تۇسىنەمىن. شىن مانىندە, ءبىزدىڭ تابىسىمىزدى شەتەلدىك الپينيستەر دە مويىندايدى. وسىعان كۋا بولعانىما قۋانىشتىمىن», دەدى ۇلتتىق قۇرامانىڭ تالىمگەرى.
