زاۋىتتىڭ ونىمدەرى – استىق پەن كوكونىس داقىلدارىنا ارنالعان جەردى وڭدەۋگە تاپتىرماس تەحنيكالار. ودان بولەك, كاسىپورىن ءارتۇرلى ديامەتردەگى شارلى كراندار, بولات تروينيكتەر, ماگيسترالدى مۇناي-گاز قۇبىرلارىن, تازالاۋ مەن دياگنوستيكالىق قۇرالدار, قابىلداۋ كامەرالارىن جاساپ شىعارادى.
كاسىپورىن بۇگىندە وندىرىستىك بازانى نىعايتۋعا, زاماناۋي تەحنولوگيالىق جاڭالىقتار ەنگىزۋگە جانە ءونىمدى ىشكى نارىق تالاپتارىنا ساي بەيىمدەۋگە ەرەكشە نازار اۋدارىپ كەلەدى. 2023 جىلدان باستاپ ءوندىرىس وشاعى ءونىم كولەمىن كەزەڭ-كەزەڭمەن ارتتىرىپ, ولاردىڭ تۇرلەرىن كوبەيتۋگە ايرىقشا دەن قويا باستادى. وتكەن جىلدىڭ قورىتىندىسىندا وندىرىلگەن ءونىم كولەمى 6,4 ملرد تەڭگەنى قۇراعان. بۇدان سەرىكتەستىكتىڭ تۇراقتى دامىپ كەلە جاتقانىن, ءوڭىردىڭ ونەركاسىپتىك الەۋەتىن ارتتىرۋعا قوسقان ۇلەسى ەلەۋلى ەكەنىن بايقاۋعا بولادى.
قازىر مۇندا 65 ادام تۇراقتى جۇمىسپەن قامتىلعان, قىزمەتكەرلەردىڭ ورتاشا ايلىق جالاقىسى شامامەن 300 مىڭ تەڭگەگە جۋىقتايدى.
بۇگىندە كاسىپورىندا جالپى اۋدانى 6 مىڭ شارشى مەتردى قۇرايتىن جاڭا وندىرىستىك تسەحتىڭ قۇرىلىسى ءجۇرىپ جاتىر. اتالعان نىساندى بيىل ماۋسىم ايىندا پايدالانۋعا بەرۋ جوسپارلانىپ وتىر. وسى جوبانى جۇزەگە اسىرۋعا 4 ملرد تەڭگە كولەمىندە ينۆەستيتسيا تارتىلدى. جاڭا تسەحتىڭ ىسكە قوسىلۋى, ەڭ الدىمەن, اۋىل شارۋاشىلىعى تەحنيكاسىنىڭ وندىرىستىك قۋاتىن ايتارلىقتاي ارتتىرۋعا, سونداي-اق كەمىندە 100 جاڭا جۇمىس ورنىن قۇرۋعا مۇمكىندىك بەرەدى.
كومپانيانىڭ العا قويعان باستى ماقساتى – ءونىم وندىرىسىندە وتاندىق تەحنولوگيا مەن شيكىزاتتى قولدانىپ, ءجۇز پايىز وتاندىق تاۋار شىعارۋ. كەلەشەكتە زاۋىت ءوز تاۋارىن وزبەكستان, قىرعىزستان, تۇرىكمەنستان مەن رەسەي فەدەراتسياسىنا جونەلتۋدى جوسپارلاپ وتىر. سونىمەن قاتار شىعىس ەۋروپا ەلدەرىمەن اۋىل شارۋاشىلىعى تەحنيكاسىن جەتكىزۋ بويىنشا كەلىسسوزدەر جۇرگىزىلىپ جاتىر.
سەرىكتەستىك ديرەكتورىنىڭ ورىنباسارى مۋسليم ءتاجيدينوۆتىڭ ايتۋىنشا, قازىر كومپانيانىڭ الماتى قالاسىندا فيليالى بار. وندا عيمارات قۇرىلىسىنا ارنالعان سەندۆيچ پانەلدەر مەن مەتالل شاتىر جابىندىسى وندىرىلەدى. ەندى قاراعاندىدان دا ءبىر بولىمشە اشىلماق. ول جەردە اۋىل شارۋاشىلىعى تەحنيكاسىن, سونىڭ ىشىندە تراكتور جاساپ شىعارۋدى جوسپارلاپ وتىر.
«تراكتور قۇراستىرۋعا موتوردى قايدان ساتىپ الاتىنىمىزدى قازىر ويلاستىرىپ جاتىرمىز. قالعان بولشەكتەرىن ءوزىمىز جاسايمىز دەگەن نيەت بار. ول ءبىزدىڭ قولىمىزدان كەلەدى. سەبەبى ماگيسترالدى مۇناي, گاز قۇبىرلارىن دياگنوستيكالايتىن كۇردەلى قۇرىلعىنى ءوزىمىز جاساپ شىعاردىق. ەلىمىزدە بىزدەن باسقا مۇنداي كاسىپورىن جوق. رەسەيدە عانا ەكى زاۋىت بار. بۇرىن ەلىمىزدە وندىرىلمەي تۇرعاندا مۇناي, گاز كومپانيالارى رەسەيدەن تاپسىرىس بەرىپ الدىراتىن. قازىر «ينتەرگاز ورتالىق ازيا» اق «شىمكەنت» ماگيستارلدى گاز قۇبىرلارى باسقارماسى مەكەمەسىنە سەرۆيستىك قىزمەتتى ءبىز عانا كورسەتەمىز. دياگنوستيكالاۋ قۇرىلعىسىن ساتۋ بويىنشا تۇرىكمەنستانمەن 8 ملن دوللارعا كەلىسىمشارت جاساسىپ جاتىرمىز», دەيدى م.تاجيدينوۆ.
كادر ماسەلەسىنە دە توقتالا كەتكەن ول كاسىپورىنعا بىلىكتى ماماندار قاجەت ەكەنىن ايتادى. زاۋىت ءوز تاراپىنان قارجى ءبولىپ, جاستاردى كۇردەلى ستانوكتاردا جۇمىس ىستەۋدى ۇيرەتەدى. بىراق جاس ماماندار تۇراقتى جۇمىس ىستەمەي, باسقا جاقتارعا كەتىپ قالادى ەكەن. قالا اكىمى عابيت سىزدىقبەكوۆ كاسىپورىن جۇمىسىمەن تانىسۋ بارىسىندا وسى ماسەلەنى شەشۋگە ۋادە ەتكەن. ياعني جۇمىسپەن قامتۋ ورتالىعى ارقىلى مەملەكەت ەسەبىنەن كادرلار دايارلانىپ, زاۋىتقا جىبەرىلەدى. «گەرمانيادان ارنايى ماماندار شاقىرتۋدى دا كوزدەپ وتىرمىز. ولارمەن تاجىريبە الماسۋ ماڭىزدى بولىپ تۇر. الداعى ۋاقىتتا شىعىس ەۋروپا ەلدەرىنە اۋىل شارۋاشىلىعى تەحنيكاسىن ەكسپورتتاعىمىز كەلەدى. سەبەبى بۇل ەلدەر وسى كەزگە شەيىن ونداي تەحنيكانى نەگىزىنەن ۋكراينادان الىپ كەلدى. ال بۇگىنگى جاعدايعا بايلانىستى ۋكراينا شىعىس ەۋروپا مەملەكەتتەرىنىڭ سۇرانىسىن تولىق قاناعاتتاندىرا الماي وتىر. اتالعان ەلدەردىڭ ۋكراينا ونىمىنە قىزىعۋىنىڭ سەبەبى – باعاسى ارزان. ءبىزدىڭ دە ءونىمىمىزدىڭ باعاسى باتىس ەۋروپانىڭ اۋىل شارۋاشىلىعى تەحنيكالارىنا قاراعاندا ەكى ەسە تومەن. وسى مۇمكىندىكتى ءمۇلت جىبەرىپ الماۋىمىز كەرەك. سوندىقتان وتاندىق ءونىمدى تانىستىراتىن ارنايى كورمە الاڭى ۇيىمداستىرىلسا, ءوزىمىزدىڭ ساپالى اۋىل شارۋاشىلىعى تەحنيكالارىن شىعىس ەۋروپانىڭ الەۋەتتى ساتىپ الۋشىلارىنا تانىستىرۋعا ءازىرمىز», دەيدى م.تاجيدينوۆ.
شىمكەنت
