اكۋشەر-گينەكولوگ دارىگەر سۆەتلانا باتىروۆانىڭ بالا بوساندىراتىن بولىمدە جۇمىس ىستەپ كەلە جاتقانىنا 35 جىلعا جۋىقتاعان. قازىر استانا قالالىق پەريناتالدى ورتالىقتىڭ بالا بوساندىرۋ بولىمىندە مەڭگەرۋشى بولىپ جۇمىس ىستەيدى. وسى كۇنگە دەيىن ول شامامەن 20 مىڭ بالانى بوساندىرسا, 10 مىڭنان استام بالانىڭ كىندىگىن ءوزى كەسكەن. ورىنبوردىڭ تۋماسى. 1991 جىلى ەل تاۋەلسىزدىگىن العان تاريحي كەزەڭدە ورىنبور مەملەكەتتىك مەديتسينالىق ينستيتۋتىن اكۋشەر-گينەكولوگ ماماندىعى بويىنشا وقىپ بىتىرگەن. سول قالادا بىرەر جىل تاجىريبە جيعان سوڭ, وتباسىن قۇرىپ, جولداسىمەن بىرگە باتىس قازاقستان وبلىسى اقساي قالاسىنا قونىس اۋدارادى. ءدال سول كەزەڭ اۋداننان قاراشىعاناق مۇناي-گاز كوندەنساتى كەن ورنى اشىلىپ, جۇمىسشىلار قالاسى كوركەيە باستاعان تۇس.
– 1992 جىلى ءبورىلى اۋداندىق اۋرۋحانا جاڭارىپ, كەيىن ەلدىڭ ءار ايماعىنان ماماندار جيىلدى. سول جاس بۋىنمەن ءبىز دە كەلىپ قالدىق. قىزىعى, جۇمىسقا بارعان جىلى-اق اۋداندىق اۋرۋحانانىڭ بوسانۋ بولىمشەسىنە مەڭگەرۋشى بولدىم. سودان 20 جىل ءبىر ۇجىمدا تابان اۋدارماي جۇمىس ىستەدىم. ەگەمەندىك جىلدارى ەلدەگى جاعداي قازىرگىدەي ەمەس ەدى. انالاردى ءوزىمىز بوساندىرىپ, وپەراتسيانى دا ءوزىمىز جاسادىق. ول كەز كىندىك شەشە بولۋدى ايتپاعاندا, ايەلدەردىڭ قاسىنا بۇگىنگىدەي ەنەسى, اپكەسى كومەكشى بولىپ كىرە المايتىن. استانا قالالىق پەريناتالدى ورتالىقتا 2012 جىلدان جۇمىس ىستەيمىن. مۇنداعى تىرشىلىك تە قاۋىرت. دارىگەرلەر تاۋلىكتە 26-30 انانى بوساندىرادى, – دەيدى سۆەتلانا باتىروۆا.
قازىر پەريناتالدى ورتالىققا جاقىنىڭا كومەكشى بولىپ كىرۋ وڭاي بولعانىمەن, كىندىك كەسۋگە ەكىنىڭ-بىرىنە رۇقسات بەرىلمەيدى. سەبەبى كىندىك كەسۋ مىندەتى اكۋشەر دارىگەردىڭ موينىندا. ول قۇرالداردى الدىن الا تازالاپ, ستەريلدىلىكتى ساقتايدى. نارەستە بوسانعاندا ونى ءبىرىنشى بولىپ قولىنا الىپ, كىندىك كەسۋگە دايىن تۇرادى. بۇرىن دا سولاي بولعان, قازاق انالارى ۇيدە بوسانعان زامانداردا نارەستە ءبىرىنشى بولىپ كىندىك شەشەسىن كورگەن. كىندىك شەشەنىڭ مىندەتى ءسابيدىڭ كىندىگىن كەسۋمەن عانا شەكتەلمەگەن. ول بوساندىرۋعا باستان-اياق جاردەمدەسكەن, بالانىڭ كەيىنگى عۇمىرىندا دا وزىندىك ورنى بولعان. وسىنداي جاۋاپتى قىزمەتتى موينىنا الۋ ەكىنىڭ-بىرىنە بۇيىرماعان.
– ءيا, قازاق بالانىڭ مىنەزى كىندىك شەشەگى تارتادى دەيدى ەمەس پە؟ سوندىقتان كىندىك كەسەتىن ادامدى الدىن الا سايلاپ, «وسى كىسىگە كەستىرەمىز» دەپ نيەت قىلعان. ال كىندىكتىڭ ءوزىن ىرىمداپ تابالدىرىقتىڭ استىنا كومگەن. بىزگە ءالى كۇنگە «بالامنىڭ كىندىگىن ءسىز كەسكەن ەدىڭىز, مىنەزى سىزگە ۇقساپتى» دەپ كەلەتىندەر كوپ. ءبىزدىڭ ورتالىقتاعى دارىگەردىڭ بوساندىرعانىن قالاپ, ارنايى اقىلى قىزمەتكە جۇگىنەتىندەر دە بار. نەگىزى كىندىك كەسۋ – ءبىزدىڭ جۇمىسىمىزدىڭ ءبىر بولىگى. ءوزىم مەڭگەرۋشى بولعان سوڭ كۇردەلى, اۋىر جاعدايدا بوساناتىن انالارعا جاردەمدەسەمىن. سول سەبەپتى وپەراتسيا, ياعني كەسىر تىلىگى كەزىندە ءجيى كىندىك كەسەمىن. كۇندەلىكتى شامامەن ءبىر-ەكى كەسىر تىلىگى وپەراتسياسىنا, ودان بولەك 5-6 نارەستەنى بوساندىرۋعا كىرەمىن. كىندىكتىڭ ءوزى جانسىز. ۇزىندىعى شامامەن 50-60 سم. ودان كىشى نەمەسە ۇلكەن بولسا, اسقىنۋلار بايقالۋى مۇمكىن. كۇندە نەشە ايەلدى بوساندىرساق تا جاۋاپتى ساتتە «بالاپاننىڭ عۇمىرى ۇزاق بولسىن» دەپ جاقسى تىلەگىمىزدى, ءبىسمىللامىزدى ايتىپ كىندىك كەسەمىز. قالاي دەگەندە, ءسابيدىڭ كىندىگى كەسىلگەن ساتتەن جارىق دۇنيەمەن قاۋىشادى. سول سابيلەرىمىزگە ۇزاق عۇمىر بەرسىن, التىن قۇرساقتى انالارىمىز امان بولسىن. رامازان ايىندا ءسابي ىڭگاسىن اڭساپ جۇرگەن وتباسىلاردىڭ تىلەك-نيەتى قابىل بولسىن, – دەپ اعىنان جارىلدى كەيىپكەرىمىز.
سۆەتلانا باتىروۆا ءوز سوزىندە وسى ماماندىقتى تاڭداعانىنا وسى كۇنگە دەيىن ەش وكىنبەگەنىن ايتتى. ومىرلىك مۇراتى انالارعا كومەكتەسۋمەن ساباقتاسقانىنا ءوزىن باقىتتى سانايدى. قازىر كەيىپكەرىمىزدىڭ ءوز بالالارى دا ەسەيىپ, نەمەرە ءسۇيىپ وتىر. نارەستەلەردى امان-ەسەن بوساندىرىپ, انالاردىڭ اماناتىن ارقالاپ جۇرگەن سۆەتلانا سەكىلدى دارىگەرلەرگە ءبىزدىڭ دە ايتارمىز – العىس.
