«بارلىق ەلدەر ءۇشىن 10 پايىز مولشەرىندەگى جاھاندىق باج سالىعىنا قول قويعانىمدى حابارلاۋ مەن ءۇشىن ۇلكەن مارتەبە. ول ءىس جۇزىندە بىردەن كۇشىنە ەنەدى», دەپ جازدى ترامپ Truth Social الەۋمەتتىك جەلىسىندە.
Reuters اگەنتتىگىنىڭ حابارلاۋىنشا, ترامپ جوعارعى سوت كۇشىن جويعان تاريفتەردىڭ ورنىنا 150 كۇن مەرزىمگە ۋاقىتشا 10 پايىزدىق باج سالىعىن ەنگىزگەن. سونداي-اق ول وزىنە تاريفتەردى قايتا ەنگىزۋگە مۇمكىندىك بەرەتىن وزگە دە زاڭنامالىق نورمالارعا سايكەس جاڭا تەرگەۋلەر جۇرگىزۋدى تاپسىرعان.
جاڭا باج سالىعى 1974 جىلعى ساۋدا تۋرالى زاڭنىڭ 122-بولىمىنە سايكەس 24 اقپاندا كۇشىنە ەنەدى.
سونىمەن قاتار, ترامپ 2025 جىلدىڭ باسىنان باستاپ ەنگىزىلگەن ساۋدا تاريفتەرىن زاڭسىز دەپ تانىعان جوعارعى سوت شەشىمىن سىنعا الدى.
«جوعارعى سوتتىڭ تاريفتەرگە قاتىستى شەشىمى كوڭىل كونشىتپەيدى. كەيبىر سۋديالارىمىزدىڭ ەلىمىز ءۇشىن دۇرىس شەشىم قابىلداۋعا باتىلى جەتپەگەنى ءۇشىن ۇيالامىن», دەدى ول.
ايتا كەتەيىك, اقش پرەزيدەنتى دونالد ترامپ يرانمەن ساۋدا-ساتتىق جاسايتىن بارلىق ەلگە 25 پايىزدىق باج سالىعىن ەنگىزەتىنىن مالىمدەگەن ەدى.
اقش-تىڭ يرانمەن بايلانىسى بار ەلدەرگە سالعان 25% باج سالىعى: قازاقستاننىڭ ۇستانىمى قانداي؟
