قازاقستاننىڭ رەسەيدەگى ەلشىسى داۋرەن اباەۆ ءوز سوزىندە مەملەكەتتىك رامىزدەردىڭ ماڭىزدىلىعى, اسىرەسە وتانداستارىمىز ەلدەن جىراق جۇرگەندە كوك تۋىمىز بەن ەلتاڭبانى بايقاسا نەمەسە «مەنىڭ قازاقستانىم» ءانۇرانىن شىرقاعاندا ماقتانىشى ويانىپ, اتامەكەنمەن رۋحاني ۇندەستىگىن سەزىنگەن ساتتەردە ەرەكشە كورىنەتىنىن ايتتى.
ء«ادىل قازاقستاندى قۇرۋ باعىتىن ىسكە اسىرۋ شەڭبەرىندە ەلىمىزدىڭ جاڭا كونستيتۋتسياسىن قابىلداۋ – قوعامدا بولىپ جاتقان جانە ونى ودان ءارى دەموكراتيالاندىرۋعا باعىتتالعان تەرەڭ وزگەرىستەردىڭ كورىنىسى. نەگىزگى زاڭ وتانىمىزدىڭ ورنىقتى دامۋى ءۇشىن بەرىك ىرگەتاس قالايدى, مەملەكەتتىك ينستيتۋتتاردىڭ جاۋاپكەرشىلىگىن نىعايتادى جانە كونستيتۋتسيالىق قۇقىقتىڭ قازىرگى حالىقارالىق ستاندارتتارىنا سايكەس كەلەدى», دەدى ەلشى.
قازاقستاندىقتاردى مەرەكەمەن قۇتتىقتاعان توقتار اۋباكىروۆ ەلىمىزدىڭ ءاربىر ازاماتى مەملەكەتتىڭ وسىناۋ ەڭسەلى رامىزدەرىن قاستەرلەپ, ونىڭ بيىك مانىنە ساي بولۋى كەرەگىن جەتكىزدى.
«ەگەر مەملەكەتتىڭ سيمۆوليكاسى ادەمى بولسا, دەمەك حالىقتىڭ جانى ادەمى. سوندىقتان ونى ودان ءارى دامىتىپ, مەملەكەتىمىزدى بيىك شىڭدارعا كوتەرسىن!» دەدى كەڭەس وداعىنىڭ باتىرى.
ءىس-شارادا پ.پ.چايكوۆسكي اتىنداعى ماسكەۋ مەملەكەتتىك كونسەرۆاتورياسىنىڭ جانە گنەسين اتىنداعى مۋزىكالىق ۋچيليششەنىڭ قازاقستاندىق ستۋدەنتتەرىنىڭ مەملەكەتتىك ءانۇرانىمىزدى ورىنداۋى كەزدەسۋگە ەرەكشە اسەر بەردى. جيىن اياعىندا ەلشىلىك مۇراجايىنا ەلىمىزدىڭ جاڭا كونستيتۋتسياسىنىڭ كىتاپ نۇسقاسى قويىلدى.
