ايتا كەتەيىك, قۇرىلىستى باس مەردىگەر «ەلحون قۇرىلىس» جشس جۇزەگە اسىرىپ جاتىر. بۇگىندە نىساندا 300-دەن استام جۇمىسشى مەن 73 تەحنيكا جۇمىلدىرىلعان.
مەردىگەر ۇيىمنىڭ مالىمەتىنشە, اۋەجاي كەشەنىنىڭ قۇرىلىسى 75 پايىزعا اياقتالعان. ۇزىندىعى 2200 مەتر بولاتىن جاساندى ۇشۋ-قونۋ جولاعى, رۋلدەۋ جولى, پەررون, درەناج جۇيەسى, ينجەنەرلىك كوممۋنيكاتسيالار تولىق سالىنىپ بىتكەن.
«بۇگىندە نىساننىڭ دايىندىعى 75 پايىزدى قۇرايدى. ۇشۋ-قونۋ جولاعى, رۇلدەۋ جولى, پەررون, ينجەنەرلىك ينفراقۇرىلىم تارتىلىپ, مونتاج جۇمىسى تولىق اياقتالدى. جوبانى بەلگىلەنگەن مەرزىمدە اياقتاپ, پايدالانۋعا بەرۋدى جوسپارلاپ وتىرمىز», دەدى جوبا جەتەكشىسى ەربول قاجىباەۆ.
قازىر قۇرىلىسشىلار جولاۋشىلار تەرمينالىن, اپاتتىق-قۇتقارۋ قىزمەتىنىڭ عيماراتىن, گاراجدار مەن ماتەريالدىق-تەحنيكالىق قويمالاردى, سونداي-اق جانار-جاعارماي ساقتاۋ قويمالارىن سالۋعا باسىمدىق بەرىپ وتىر. سونىمەن قاتار جىلۋ, سۋ, كارىز, ەلەكتر جەلىلەرىن قامتيتىن سىرتقى ينجەنەرلىك جەلىلەردى تارتۋ جۇمىستارى جۇرگىزىلىپ جاتىر.
اۋەجاي تەرمينالىنىڭ جالپى اۋماعى 4 مىڭ شارشى مەتردى قۇرايدى. پايدالانۋعا بەرىلگەننەن كەيىن اۋەجاي Bombardier Q400, ATR 72 سەكىلدى وڭىرلىك اۋە كەمەلەرىن قابىلداي الادى. العاشقى سىناق رەيسىن بيىلعى جازدا ورىنداۋ جوسپارلانىپ وتىر. نىساندى ارالاۋ بارىسىندا وبلىس اكىمى ن.ساقتاعانوۆ جوبانىڭ ءوڭىر ءۇشىن ايرىقشا مانگە يە ەكەنىن اتاپ ءوتتى.
«بۇل – وبلىس ءۇشىن ستراتەگيالىق ماڭىزى جوعارى جوبا. سوندىقتان قۇرىلىس ساپاسى مەن نىساندى بەلگىلەنگەن مەرزىمدە اياقتاۋ باستى نازاردا بولۋعا ءتيىس», دەدى ايماق باسشىسى.
اۋەجاي ىسكە قوسىلعاننان كەيىن ءۇرىمشى قالاسى, التاي ءوڭىرى, قاناس كولى باعىتتارىنا حالىقارالىق اۋە رەيستەرىن اشۋ جوسپارلانعان. سونىمەن قاتار استانا, الماتى, وسكەمەن قالالارىنا ىشكى باعىتتار بويىنشا تۇراقتى رەيستەر ۇيىمداستىرىلادى.
جاڭا اۋەجاي زايسان اۋدانىنىڭ كولىك قولجەتىمدىلىگىن ارتتىرىپ, تۋريزم مەن كاسىپكەرلىكتىڭ دامۋىنا سەرپىن بەرىپ, شىعىس قازاقستان وبلىسىنىڭ حالىقارالىق, وڭىرارالىق بايلانىستارىن نىعايتۋعا جول اشادى.
شىعىس قازاقستان وبلىسى,
زايسان اۋدانى
