ءتورت كۇنگە سوزىلعان ءدۇبىرلى ەتنوفەستيۆال الەمنىڭ جيىرمادان استام ەلىنەن كەلگەن سپورتشىلار مەن مادەنيەت جاناشىرلارىنىڭ باسىن قوستى. ءباسى بيىك بۇل دودا ۇلتتاردىڭ سالت-ءداستۇرى مەن ءتول مادەنيەتىن توعىستىراتىن اۋقىمدى ءىس-شارا رەتىندە سالماعى بار. فەستيۆال بارىسىندا جۇيرىك تازى جۇگىرتكەن يتبەگىلەرمەن قوسا, بۇركىتشىلەر قۇس سالىپ, كوشپەلىلەر مادەنيەتىنىڭ قىر-سىرىن ايگىلەدى.
مادەني كوشتە كوپشىلىكتىڭ كوزايىمىنا بولەنىپ, ءباسپاسوز بەتتەرىنىڭ باستى تاقىرىبىنا اينالعان بالقاش قالاسىنىڭ تۇرعىنى اعىباي جاسانبەكوۆتىڭ اقباقاي اتتى تازىسى ەدى. ەكى قار باسقان (2 جاسار) اقباقاي جۇيرىكتىگىمەن, تۇرپاتىمەن, سىمباتىمەن شەتەلدىك قوناقتاردى ءسۇيسىندىردى. ناتيجەسىندە, قازاق تازىسى فەستيۆالدىڭ ارنايى مەدالىمەن ماراپاتتالدى. بۇكىلالەمدىك ەتنوسپورت فەدەراتسياسىنىڭ وكىلدەرى دە قۇماي تازىعا ەرەكشە قىزىعۋشىلىق تانىتقان. اقباقايدىڭ يەسى اعىباي تۇركياعا ءوزى بارا الماي, باپتاعان جۇيرىگىن دوسى ايبات تىلەۋوۆكە اماناتتاپ, اتتاندىرعان ەدى.
– ءبىزدىڭ قازاق تازىلارى الىس-جاقىن شەتەلدەردە مويىندالىپ ءجۇر. دوسىمنىڭ ايتۋىنشا, اقباقايدىڭ تەكتىلىگىنە ءتانتى بولعان شەتەلدىكتەر ونى قوماقتى قارجىعا ساتىپ الۋعا دا ۇسىنىس جاساعان. سوعان قاراعاندا تازىم فەستيۆالدىڭ جاڭالىعى بولعان سەكىلدى, – دەيدى ماقتانىشپەن اعىباي جاسانبەكوۆ.
اقباقايدىڭ يەسى اعىبايدىڭ تازى مەن توبەت ءوسىرىپ كەلە جاتقانىنا 20 جىلعا جۋىقتاعان. ول اقباقايدى سوناۋ ماڭعىستاۋ وبلىسىنان, ءبىر ايلىق كۇشىك كەزىندە الدىرتىپتى. تازى قويان مەن تۇلكى قۋىپ, اڭشىلىقتىڭ قىر-سىرىن مەڭگەرگەن. سونىمەن قوسا اۋداندىق دەڭگەيدەگى «شىرعا تارتۋ» جارىستارىنا قاتىسىپ, شىڭدالعان. جىلدامدىعى, توزىمدىلىگى مەن اقىلدىلىعى تاڭعالدىرىپ وتىر.
«جۇيرىك تازىمنىڭ تۇقىمىن كوبەيتۋدى جوسپارلاپ وتىرمىن. الداعى ۋاقىتتا ءتۇرلى حالىقارالىق كورمەلەر مەن بايقاۋلارعا قاتىسىپ, تازىمىزدى الەمگە تانىتقىمىز كەلەدى. سول ارقىلى وسكەلەڭ ۇرپاقتىڭ بويىندا ۇلتتىق قۇندىلىقتارعا دەگەن سۇيىسپەنشىلىكتى وياتساق دەيمىز», دەيدى يەسى.
بۇگىندە كەيىپكەرىمىز تازىلارىن بالقاش اۋەجايىنىڭ ماڭىنداعى شاعىن اۋماقتا جاتتىقتىرىپ ءجۇر. تۇلپارلارىمەن ۇلتتىق سپورت تۇرلەرىنە دايىندىقتى وسى ماڭدا وتكىزەتىن كورىنەدى. الايدا ۋاقىت وتكەن سايىن بۇل جەر تارلىق ەتىپ كەلەدى. ساياتشىنىڭ الداعى ارمانى – بالقاش قالاسىندا قازاقى يت تۇقىمدارىن ساقتاپ, دامىتاتىن جەكە پيتومنيك اشۋ.
قاراعاندى وبلىسى
