ارقا توسىندەگى الىپ زاۋىتتار مەن تەرەڭ شاحتالاردا بۇگىندە جاساندى زەردە جاي عانا عىلىمي تەرمين ەمەس, ءوندىرىستىڭ تىنىس-تىرشىلىگىن رەتتەيتىن, مىڭداعان جۇمىسشىنىڭ قاۋىپسىزدىگىن قاپەردە ۇستايتىن جانە ەكونوميكالىق تيىمدىلىكتى ەسەلەيتىن باستى تەتىگىنە اينالىپ كەلەدى. ءبىر سوزبەن ايتقاندا, ونەركاسىپتە جاساندى ينتەللەكت شاحتاداعى احۋالدى مۇلتىكسىز باقىلاپ, ەڭ كۇردەلى ءارى ادام ومىرىنە قاۋىپتى ايماقتاردا درونداردى ۇشىرىپ, ال تسيفرلىق جوبالار ءوندىرىس ۇدەرىسىن ءۇش ەسەگە دەيىن جىلدامداتىپ, زاماناۋي تەحنولوگيانىڭ سالتانات قۇرىپ جاتقانىن پاش ەتىپ وتىر.
پرەزيدەنت قاسىم-جومارت توقاەۆ الداعى ءۇش جىل ىشىندە ەلىمىزدى تولىققاندى تسيفرلىق مەملەكەتكە اينالدىرۋ تۋرالى كەسىمدى مىندەت جۇكتەگەنى بەلگىلى. بۇل رەتتە ەل ەكونوميكاسىنىڭ ەداۋىر ۇلەسىن قۇرايتىن تاۋ-كەن مەتاللۋرگيا كەشەنى ءۇشىن گەولوگيانى تسيفرلاندىرۋ, جي كومەگىمەن بولجامدى تالداۋ جاساۋ جانە پوزيتسيالاۋ جۇيەلەرىن ەنگىزۋ – بۇگىنگى كۇننىڭ بۇلجىماس تالابى. قاراعاندى وڭىرىندە 2025–2026 جىلدارعا ارنالعان وڭىرلىك جوسپارلار كەزەڭ-كەزەڭىمەن ىسكە اسىرىلىپ, ءوندىرىس ورىندارىنىڭ كەلبەتى تانىماستاي وزگەرىپ جاتىر. ماسەلەن, تەمىرتاۋداعى مەتاللۋرگيا زاۋىتىنىڭ تىنىسىنا كوز سالساق, ونداعى ورناتىلعان «اقىلدى» كامەرالار قاۋىپتى ايماقتارعا ادامنىڭ كەزدەيسوق كىرۋىن قاس-قاعىم ساتتە تىركەپ, جابدىق جۇمىسىن اۆتوماتتى تۇردە توقتاتۋ ارقىلى جازاتايىم وقيعالاردىڭ الدىن الىپ وتىر. بۇل جۇيە الداعى ۋاقىتتا جۇمىسشىلاردىڭ جەكە قورعانىس قۇرالدارىن, ياعني كاسكا مەن ارنايى كيىمىن تانۋ فۋنكتسيالارىمەن تولىعىپ, وندىرىستىك ءتارتىپتى مۇلدەم جاڭا بەلەسكە كوتەرمەك.
سونىمەن قاتار, «KZ TRANSIT» كومپانياسى قولداناتىن Teleport 3D پلاتفورماسى جاساندى ينتەللەكت الگوريتمدەرى ارقىلى تاپسىرىستاردى وڭدەپ, كۇردەلى سىزبالاردى قاتەسىز دايىندايدى. بۇل تەحنولوگيا ماتەريال تاڭداۋداعى دالدىكتى 99 پايىزعا جەتكىزىپ, بۇرىن اپتالاپ جاسالاتىن جۇمىستىڭ ۋاقىتىن ءۇش ەسەگە قىسقارتۋعا مۇمكىندىك بەردى.
يندۋستريالىق ترانسفورماتسيانىڭ جارقىن ۇلگىسى رەتىندە «Qarmet» كومپانياسىنىڭ بىلتىرعى جىلدىڭ جەلتوقسانىندا ىسكە قوسىلعان جاڭا بۋىنداعى احۋال ورتالىعىن ەرەكشە اتاپ وتكەن ءلازىم. بۇل ورتالىق – كومبيناتتىڭ بارلىق لوگيستيكالىق ۇدەرىستەرى مەن جالپى احۋالىن ناقتى ۋاقىت اياسىندا باقىلايتىن ستراتەگيالىق باسقارۋ حابى.
مۇنداعى جي الگوريتمدەرى مىڭداعان داتچيك پەن بەينەباقىلاۋ قۇرىلعىلارىنان كەلەتىن اقپاراتتى سەكۋند ىشىندە تالداپ, قاۋىپسىزدىك ءتارتىبىن بۇزۋ جايتتارىن اۆتوماتتى تۇردە انىقتايدى. جەر استىنداعى «تسيفرلىق كەڭەسشى» قىزمەتى ناقتى ۋاقىت رەجىمىندە كەن ارناسىن زەردەلەپ, وپەراتورلارعا قاجەتتى تۇزەتۋلەر ۇسىنادى. بۇل جۇيەنىڭ ۇزدىكسىز جۇمىسىن ءار اۋىسىمدا 15 بەينەباقىلاۋ وپەراتورى مەن تاجىريبەلى ۇيلەستىرۋشىلەر قاداعالاپ وتىرادى. وسىنداي كەشەندى جۇمىستىڭ ناتيجەسىندە وندىرىستەگى اپات قاۋپى ەداۋىر تومەندەپ, باقىلاۋ ۇدەرىسى تولىقتاي اۆتوماتتاندىرىلىپ جاتىر.
كەلەسى كەزەڭ – وڭىردەگى 100-دەن استام كاسىپورىندى تولىق تسيفرلاندىرۋ جانە جەرگىلىكتى جي شەشىمدەرىن حالىقارالىق نارىققا شىعارۋ. وسىلايشا, ارقا ءوڭىرى جاساندى ينتەللەكت ارقىلى ەكونوميكانى جاڭا دەڭگەيگە كوتەرىپ كەلەدى.
قىسقاسى, «اقىلدى ءوندىرىس» ايماعىنا اينالعان قاراعاندى بۇگىندە جاساندى زەردەنىڭ تەك قاۋىپسىزدىكتى ارتتىرىپ قانا قويماي, ەڭبەك ونىمدىلىگىن جاڭا بەلەسكە شىعاراتىنىن دالەلدەپ كەلەدى.
قاراعاندى وبلىسى
