القالى جيىنعا عالىمدار مەن زيالى قاۋىم, قوعام قايراتكەرلەرى مەن جۋرناليستەر قاتىستى. كەش بارىسىندا عالىمنىڭ ء«ومىر دۇنيە دەگەنىڭ» اتتى جاڭا كىتابى تانىستىرىلدى. سونداي-اق ۇلتتىق كىتاپحانا قورىنان ادەبيەتتانۋشىنىڭ عىلىمي ەڭبەكتەرى, ادەبي-سىن ماقالالارى مەن زەرتتەۋلەرىنەن كىتاپ كورمەسى قويىلدى.
ۇلتتىق كىتاپحانا ديرەكتورى عازيزا قۇدايبەرگەن دانداي ىسقاق ۇلىنىڭ كىتاپحانامەن بايلانىسىنا ەرەكشە توقتالدى. ونىڭ ايتۋىنشا, عالىم كىتاپحانانىڭ تۇراقتى وقىرمانىنىڭ ءبىرى رەتىندە عىلىم مەن ءبىلىم جولىنداعى ىزدەنىستەرىن وسى قاراشاڭىراقپەن ساباقتاستىرىپ كەلەدى. عازيزا قۇدايبەرگەنقىزى دانداي ىسقاق ۇلىنىڭ عىلىمي ەڭبەكتەرى مەن رۋحاني مۇراسى كىتاپحانا قورىن بايىتىپ قانا قويماي, جاس زەرتتەۋشىلەر مەن وقىرمانعا قۇندى تانىم كوزىنە اينالعانىن اتاپ ءوتتى. سونداي-اق ول عالىمنىڭ كىتاپحانا ومىرىنە بەلسەندى ارالاسىپ, ادەبي-عىلىمي ورتانىڭ دامۋىنا ۇلەس قوسىپ جۇرگەنىن ايتتى.
م.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى كەنجەحان ماتىجانوۆ دانداي ىسقاق ۇلىنىڭ قازاق ادەبي سىنىنىڭ تاريحى مەن تەورياسىن زەرتتەۋدەگى ەڭبەگىنە توقتالدى. ول عالىمنىڭ ادەبي سىندى دەربەس عىلىمي باعىت رەتىندە جۇيەلەۋگە ۇلەس قوسقانىن, قازاق ادەبيەتىنىڭ تاريحى مەن تەورياسىنا ارنالعان ىرگەلى زەرتتەۋلەردىڭ اۆتورى ەكەنىن اتاپ ءوتتى. سونداي-اق دانداي ىسقاق ۇلىنىڭ ەنتسيكلوپەديالىق باسىلىمداردى ازىرلەۋگە قاتىسىپ, ادەبيەتتانۋشى عالىمداردىڭ بىرنەشە بۋىنىن تاربيەلەۋگە ەڭبەك سىڭىرگەنىن باسا
ايتتى.
ال فيلولوگيا عىلىمدارىنىڭ دوكتورى نۇرداۋلەت اقىش عالىمنىڭ قازاق ادەبيەتتانۋداعى ەلەۋلى ورنىنا توقتالدى.
«دانداي ىسقاق ۇلى ادەبيەتتانۋ عىلىمىنا وتكەن عاسىردىڭ 70-جىلدارى كەلىپ, قازاق ادەبي سىنىنىڭ تەورياسى مەن تاريحىن جۇيەلى زەرتتەگەن عالىمداردىڭ الدىڭعى قاتارىنا كوتەرىلدى. ونىڭ «ادەبي كوركەم سىن», «سىن شىن بولسىن», «سىن جانرلارى», «سىن ونەرى», «قازاق ادەبي سىنىنىڭ تاريحى», «ادەبي سىننىڭ تاريحى» سياقتى ىرگەلى ەڭبەكتەرى ۇلتتىق ادەبي سىن عىلىمىنىڭ قالىپتاسۋى مەن دامۋىن عىلىمي تۇرعىدان زەردەلەۋگە ارنالدى. عالىمنىڭ زەرتتەۋلەرى قازاق ادەبيەتتانۋىنىڭ ماڭىزدى قورىنا اينالدى», دەدى ول.
سونداي-اق اقىن, فيلولوگيا عىلىمدارىنىڭ دوكتورى باۋىرجان جاقىپ دانداي ىسقاق ۇلىنىڭ عالىمدىق جانە ازاماتتىق بولمىسى تۋرالى ءسوز قوزعادى. ول مەرەيتوي يەسىنىڭ قازاق ادەبيەتتانۋى مەن ادەبي سىنىنىڭ دامۋىنا قوسقان ۇلەسىن اتاپ ءوتىپ, ادەبيەت پەن عىلىمدى قاتار الىپ جۇرگەن تۇلعانىڭ ەڭبەگى كەيىنگى بۋىن زەرتتەۋشىلەر ءۇشىن ماڭىزدى رۋحاني, عىلىمي مۇرا ەكەنىن تىلگە تيەك ەتتى.
كەش بارىسىندا ءسوز العان قوعام قايراتكەرى اسىلى وسمان عالىمنىڭ ۇلت رۋحانياتىنا سىڭىرگەن ەڭبەگى تۋرالى باياندادى. ول د.ىسقاق ۇلىنىڭ قازاق ادەبيەتى مەن ءتىلىنىڭ دامۋىنا قوسقان ۇلەسىن اتاپ ءوتىپ, ۇلتتىق قۇندىلىقتاردى ناسيحاتتاۋ جولىنداعى قىزمەتىنە جوعارى باعا بەردى.
ايتا كەتەيىك, جاڭا جيناق – دانداي ىسقاق ۇلىنىڭ ادام ءومىرىنىڭ ءمانى, باقىت, ادامگەرشىلىك, ار-وجدان, ادالدىق, يماندىلىق جانە رۋحاني كەمەلدەنۋ ماسەلەلەرىنە ارنالعان فيلوسوفيالىق-تانىمدىق ەڭبەگى. اۆتور عاسىرلار بويى ادامزات جيناعان رۋحاني مۇرانى, عىلىم جەتىستىگىن جانە ۇلتتىق دۇنيەتانىمدى ساباقتاستىرا وتىرىپ, ءومىردىڭ تابيعي زاڭدىلىقتارىن, ادامنىڭ قوعامداعى ورنىن, ماقسات پەن مۇراتتىڭ ماڭىزىن پايىمدايدى. كىتاپتا اتا-اناعا قۇرمەت, وتباسى تاربيەسى, ازاماتتىق جاۋاپكەرشىلىك, ەڭبەكقورلىق, نامىس پەن پاراسات سياقتى قۇندىلىقتار كەڭىنەن ءسوز بولادى. ادام بالاسىنىڭ باقىتقا جەتۋ جولى ماتەريالدىق يگىلىكتەن بۇرىن رۋحاني تازالىقپەن, ادال ەڭبەكپەن, ىزگى نيەتپەن, ءوز ءومىرىنىڭ ءمانىن تابۋمەن ولشەنەدى دەيدى. اۆتور جاس ۇرپاقتى ۇلكەن ماقسات قويۋعا, ءبىلىم مەن عىلىمعا ۇمتىلۋعا, اتا-انانىڭ قادىرىن بىلۋگە, ۇلتتىق جانە جالپىادامزاتتىق قۇندىلىقتاردى باعالاۋعا ۇندەيدى.
