ءبىرىنشى ۆيتسە-پرەمەر بىرقاتار ينفراقۇرىلىمدىق نىساندى ارالادى. ارقالىق اۋەجايىن قالپىنا كەلتىرۋ جوباسىمەن تانىستى. بۇگىندە اۋەجاي قۇرىلىسىنىڭ 80 پايىزى اياقتالدى. جاڭا نىساننىڭ جالپى اۋدانى شامامەن 3 مىڭ شارشى مەتر بولادى. «بۇل نىساننىڭ ماڭىزى ەرەكشە. ارقالىق قالاسىندا جاڭادان بوي كوتەرىپ جاتقان ءىرى عيماراتتاردىڭ ءبىرى وسى بولماق. سوندىقتان قۇرىلىس ساپاسى وتە جوعارى دەڭگەيدە بولۋعا ءتيىس. حالىق بۇل نىساندى كوپتەن كۇتتى. اۋەجاي مەملەكەت باسشىسىنىڭ تىكەلەي تاپسىرماسىمەن سالىنىپ جاتىر. سوندىقتان جۇمىستى بەلگىلەنگەن مەرزىمدە عانا ەمەس, جوعارى ساپامەن اياقتاۋ قاجەت. ەڭ باستىسى, ساپا. اۋەجاي تەرمينالى ارقالىق قالاسىنىڭ كوركىن اشاتىن زاماناۋي نىسان بولۋى كەرەك. كولەمى شاعىن بولعانىمەن, ساۋلەتتى ءارى جولاۋشىعا جايلى بولۋعا ءتيىس. سوندىقتان ساپا ماسەلەسىن قاتاڭ باقىلاۋعا الۋ قاجەت. ارقالىق تۇرعىندارى ءۇشىن اۋە قاتىناسى قولجەتىمدى بولۋى كەرەك. اسىرەسە العاشقى كەزەڭدە رەيستەردى سۋبسيديالاۋ ماسەلەسىنە ەرەكشە كوڭىل بولگەن ءجون. بىراق بيلەت قۇنى تەمىرجول تاسىمالىنان تىم تومەن بولماۋى قاجەت. بۇل جەردە ەكونوميكالىق نەگىزدەمەنىڭ ساقتالۋى ماڭىزدى. ۇسىنىستاردىڭ ءبارى جان-جاقتى قارالىپ, ءتيىستى مينيسترلىكتەرمەن بىرلەسىپ شەشىم قابىلداۋ قاجەت», دەدى پرەمەر-ءمينيستردىڭ ءبىرىنشى ورىنباسارى.
اۋەجاي قۇرىلىسىن 15 شىلدەگە دەيىن اياقتاۋ جوسپارلانىپ وتىر. نۇرلىبەك نالىباەۆ اۋەجاي تەرمينالىن قالپىنا كەلتىرۋ ءوڭىردىڭ الەۋمەتتىك-ەكونوميكالىق دامۋىنا تىڭ سەرپىن بەرەتىن ماڭىزدى جوبا ەكەنىن اتاپ ءوتىپ, بارلىق جۇمىستى ساپالى ءارى ۋاقتىلى اياقتاۋدى تاپسىردى.
ۆيتسە-پرەمەر توبىل قالاسىنداعى «استانا» شاعىن اۋدانىنىڭ قۇرىلىس الاڭىندا بولدى. مۇندا 23 كوپقاباتتى تۇرعىن ءۇي سالىنىپ, 1035 وتباسى باسپانامەن قامتىلماق.
ۇكىمەت باسشىسىنىڭ ءبىرىنشى ورىنباسارى قوستانايداعى «KIA Qazaqstan» اۆتوموبيل زاۋىتىنىڭ جۇمىسىمەن دە تانىستى. جىلىنا 70 مىڭ اۆتوكولىك شىعارا الاتىن كاسىپورىن 310 ملن دوللار كولەمىندەگى ينۆەستيتسيا ەسەبىنەن ىسكە قوسىلعان.
زاۋىت جۇمىسى تولىق اۆتوماتتاندىرىلعان, ءوندىرىس نەگىزىنەن روبوتتاندىرىلعان جۇيەدە جۇمىس ىستەيدى. بۇگىندە مۇندا 800-گە جۋىق ادام ەڭبەك ەتەدى. جىل باسىنان بەرى شامامەن 7 مىڭ اۆتوكولىك شىعارعان كاسىپورىن ىشكى نارىقتاعى سۇرانىستى تولىق قامتاماسىز ەتىپ وتىر. مۇنىڭ سىرتىندا وتاندىق اۆتوونەركاسىپتىڭ ەكسپورتتىق الەۋەتىن ارتتىرۋ باعىتىندا جۇيەلى جۇمىس جۇرگىزىلىپ جاتىر.
ساپار بارىسىندا نۇرلىبەك نالىباەۆ «توبىل» كولىك-لوگيستيكالىق كەشەنىنىڭ قۇرىلىسىمەن تانىستى. جالپى قۇنى 64 ملرد تەڭگەگە جۋىق ءىرى ينفراقۇرىلىمدىق جوبا ءوڭىردىڭ ترانزيتتىك الەۋەتىن ارتتىرۋعا باعىتتالعان. جوبا تولىق ىسكە قوسىلعان سوڭ مۇندا 500 جاڭا جۇمىس ورنى اشىلىپ, كونتەينەرلىك تاسىمال كولەمى 20%-عا دەيىن ۇلعايادى. جوبانىڭ باستاپقى كەزەڭى اياسىندا 2723 مەتر تەمىرجول جەلىسى, 26 مىڭ شارشى مەتر كونتەينەر الاڭى سالىندى. ءوڭىردىڭ ترانزيتتىك مۇمكىندىگىنىڭ ەسەلەپ ارتۋىنا جول اشاتىن كەشەننىڭ قۇرىلىسى 2027 جىلى اياقتالادى. «كەشەن كەلەشەكتە قوستاناي وبلىسىنىڭ ترانزيتتىك جانە لوگيستيكالىق الەۋەتىن ەداۋىر ارتتىرىپ, حالىقارالىق جۇك تاسىمالى باعىتىنداعى ماڭىزدى حابتاردىڭ بىرىنە اينالماق. بۇل ءوز كەزەگىندە ءوڭىر ەكونوميكاسىنىڭ دامۋىنا, جاڭا جۇمىس ورىندارىنىڭ قۇرىلۋىنا وڭ اسەر ەتىپ, وبلىستىڭ ينۆەستيتسيالىق تارتىمدىلىعىن ارتتىرادى», دەدى «توبىل» كلك» جشس ديرەكتورى ايدىن ءالىموۆ.
جۇمىس توبى يندۋستريالىق ايماقتا ورنالاسقان «KamLitKZ» زاۋىتىنا باردى. كاسىپورىن اۋىر جۇك كولىكتەرىنە ارنالعان اۆتوبولشەكتەر شىعارادى. بۇعان دەيىن شويىن قۇيۋ ءوندىرىسى ىسكە قوسىلعان. بىلتىر زاۋىت 654 مىڭ توننا ءونىم ءوندىرىپ, ونىڭ باسىم بولىگىن ەكسپورتقا جونەلتكەن.
ۆيتسە-پرەمەر الداعى ۋاقىتتا وڭىردە ىسكە اسىرىلاتىن گاز-حيميا كەشەنى مەن اقتوبە – قوستاناي ماگيسترالدىق گاز قۇبىرىنىڭ قۇرىلىسى جونىندەگى جوبالارمەن, سونىمەن قاتار «بايان سۇلۋ» فابريكاسىنىڭ «كونديتەرلىك استانا» جوباسىمەن تانىستى.
ساپار اياسىندا ءوڭىردىڭ ينۆەستيتسيالىق الەۋەتىن ارتتىرۋعا باعىتتالعان ەكى ءىرى جوبا ۇسىنىلدى. الداعى ۋاقىتتا قوستاناي وبلىسىندا استىقتى تەرەڭ وڭدەيتىن جانە تۇراقتى اۆياتسيالىق وتىن (SAF) وندىرەتىن ەكى بىردەي زاۋىت سالىنباق.
نۇرلىبەك نالىباەۆ ساپار اياسىندا رۋدنىي قالاسىنا بارىپ, «سسكوب» اكتسيونەرلىك قوعامىنىڭ قىزمەتى مەن تەمىر رۋداسىن ءوندىرۋ تەحنولوگياسىمەن, شەكەمتاس ءوندىرۋ فابريكاسىنىڭ جۇمىسىمەن تانىستى. «سسكوب» بۇگىندە وڭىردەگى ەڭ ءىرى ءوندىرىس ورىندارىنىڭ بىرىنەن سانالادى. كومپانيادا 9 مىڭنان استام ادام ەڭبەك ەتەدى.
ساپار قورىتىندىسىندا پرەمەر-ءمينيستردىڭ ءبىرىنشى ورىنباسارى بىرقاتار ناقتى تاپسىرما بەردى. ولاردىڭ قاتارىندا ينۆەستيتسيالىق جوبالاردى قولداۋ جانە ەكسپورتتىق الەۋەتتى كەڭەيتۋ, يندۋستريالىق ايماق ينفراقۇرىلىمىن دامىتۋ, «توبىل» لوگيستيكالىق كەشەنىن قارجىلاندىرۋدى جەدەلدەتۋ, اۋىل شارۋاشىلىعى ونىمدەرىن تەرەڭ وڭدەۋ جوبالارىن جۇزەگە اسىرۋ, تۇرعىن ءۇي قۇرىلىسىن جەدەلدەتۋ جانە ساپاسىن باقىلاۋ, جىلىتۋ ماۋسىمىنا دايىندىق جۇمىستارىن كۇشەيتۋ ماسەلەلەرى بار.
سونىمەن قاتار ەنەرگەتيكا, كولىك جانە كوممۋنالدىق ينفراقۇرىلىم سالالارىنداعى ستراتەگيالىق جوبالاردى ۋاقتىلى اياقتاۋ مىندەتتەلدى.
قوستاناي وبلىسى
