سۋرەت: informburo.kz
جاپون ەلىنىڭ جەرگىلىكتى «Kyodo» باسىلىمىنىڭ حابارلاۋىنشا, «Mitsubishi Corp.» ساۋدا كومپانياسى وسى جىلدىڭ شىلدەسىندە ەلىمىزدەن سيرەك كەزدەسەتىن مەتالل گالليدى يمپورتتاۋدى جوسپارلاپ وتىر. كومپانيانىڭ مالىمدەمەسىنە سايكەس, ونىڭ ەنشىلەس «Mitsubishi Corporation RtM Japan Ltd.» كومپانياسى 2025 جىلعى جەلتوقساندا «قازاقستان ءاليۋمينيى» اق (Eurasian Resources Group قۇرامىنا كىرەدى) كومپانياسىمەن بىرنەشە جىل بويى جىلىنا ورتا ەسەپپەن 15 توننا گاللي ساتىپ الۋ تۋرالى كەلىسىمگە قول قويعان. «Kyodo» اقپاراتىنا سايكەس, اتالعان كومپانيا گاللي يمپورتىمەن العاش رەت اينالىسپاق.
مەتالل پاۆلودارداعى زاۋىتتا وندىرىلەدى, ونىڭ قۇرىلىسى 2026 جىلدىڭ ءىىى توقسانىندا اياقتالادى دەپ جوسپارلانىپ وتىر. وندا وندىرىلەتىن بارلىق ءونىم جاپونياعا جونەلتىلەدى.
ايتا كەتسەك, جاپونيا 2021 جىلى 96,5 توننا گاللي يمپورتتاعان, ونىڭ 55 تونناسى (57 پايىز) قىتايدان كەلگەن. ال 2023 جىلدان باستاپ قحر مەتالل ەكسپورتىنا باقىلاۋدى كۇشەيتتى, بۇل گالليدى تۇراقتى ساتىپ الىپ وتىرعان ەلدەرگە ايتارلىقتاي قيىندىق تۋعىزعان. الايدا, «Mitsubishi» بۇل «قىتايمەن بايلانىس ءۇزىلدى» دەگەندى بىلدىرمەيتىنىن مالىمدەدى, كەرىسىنشە جاڭا جەتكىزۋشىلەردى قاراستىرۋعا باعىتتالعانىن اتاپ ءوتتى.
جالپى, گاللي ەلەكتر كولىكتەرىنە ارنالعان جارتىلاي وتكىزگىشتەردە, سونداي-اق سۇيىق كريستالدى پانەلدەر مەن باسقا دا ونىمدەرگە ارنالعان جارىقديودتاردا قولدانىلادى. ول اليۋميني ءوندىرىسىنىڭ قوسىمشا ءونىمى رەتىندە الىنادى. گالليدەن وزگە, ليتي سەكىلدى ماڭىزدى مينەرالدارعا بۇكىل الەمدە سۇرانىس ارتىپ كەلەدى, سەبەبى مينەرالدار جارتىلاي وتكىزگىشتەردى, ەلەكتروموبيلدەردى, سونداي-اق ونەركاسىپتىك روبوتتاردى وندىرۋگە قولدانىلادى.
ەسكە سالا كەتسەك, ءتيىستى كەلىسىمشارتقا بىلتىر جەلتوقساندا پرەزيدەنت قاسىم-جومارت توقاەۆتىڭ جاپونياعا رەسمي ساپارى كەزىندە قول قويىلدى. «Eurasian Resources Group» 2026 جىلى ەلىمىزدەگى گاللي ءوندىرىسى جوباسىنا 20 ملن دوللار ينۆەستيتسيا سالۋدى جوسپارلاپ وتىر. بۇل مەتالل بوكسيت رۋداسىنان وندىرىلەدى, كومپانيا بوكسيت رۋداسىن گلينوزەم الۋ ءۇشىن بۇعان دەيىن دە ءوندىرىپ كەلدى. «Kyodo» بولجامىنشا, كومپانيا قىتايدان كەيىنگى الەمدەگى ەكىنشى ءىرى گاللي وندىرۋشىسىنە اينالۋى مۇمكىن.
