كەلەسى كۇنى الگى سۋرەت الەۋمەتتىك جەلىدە جاپپاي تارالىپ, كوپ ۇزاماي شەتەلدىك باق-تىڭ دا نازارىن اۋداردى. قىسقا ۋاقىتتا-اق ۆان فۋمان «مۇز بالا» اتانىپ, ونىڭ ءبىر ساتتىك بەينەسى تاباندىلىق پەن بىلىمگە دەگەن شىنايى ۇمتىلىستىڭ رامىزىنە اينالدى. كوپشىلىك ونىڭ ايازدى كۇنى مەكتەپكە جەتكەنىنە عانا ەمەس, ەمتيحاندى جوعارى ناتيجەمەن تاپسىرعانىنا دا ءتانتى بولدى. الەۋمەتتىك جەلى قولدانۋشىلارى وقۋشىنىڭ احۋالىنا بەيجاي قاراماي, قارجىلاي كومەك جيناي باستادى. ناتيجەسىندە, بالانىڭ مەكتەبىنە قولداۋ كورسەتىلىپ, وسىنداي قيىن جاعدايدا وقىپ جۇرگەن باسقا بالالارعا كومەك بەرۋ ماسەلەسى كوتەرىلدى. ۆان فۋماننىڭ تاعدىرى ارقىلى اۋىلداعى ءبىلىم بەرۋ, تەڭ مۇمكىندىك جايى كەڭىنەن تالقىلانا باستادى.
وسى وقيعا ريمدەگى «تىكەن الىپ وتىرعان بالا» ءمۇسىنىن ەرىكسىز ەسكە سالادى. ول ءمۇسىن جولىنداعى قاۋلاعان تىكەنەككە قاراماستان مارەگە ءبىرىنشى بولىپ جەتكەن كىشكەنتاي جەلاياققا ارنالعان. بالاقاي تابانىنداعى قان قاقساتقان جاراقاتقا قىڭق ەتپەگەن. ونىڭ ەرىك-جىگەرىنە ءتانتى بولعاندار قايسارلىق پەن توزىمدىلىگىن قۇرمەتتەپ, وسىنداي ەسكەرتكىش ورناتىپتى.
