گۇلجازيرا بەكبولاتقىزى – ەلورداداعى №104 جالپى ءبىلىم بەرەتىن «كەلەشەك مەكتەبىنىڭ» قازاق ءتىلى مەن ادەبيەتى ءپانىنىڭ مۇعالىمى. گەرمانياعا ءبىلىم جەتىلدىرە بارعان ساپارىندا كەيىپكەرىمىز سونداعى قانداستارىمىزدى كەزدەستىرىپ, ولاردىڭ ءوز بالالارىنا قازاقشا ۇيرەتۋگە ق ۇلىقتى ەكەنىن بىلگەن. سودان ءوزىنىڭ بار بىلگەنىن اقىسىز بولىسۋگە شەشىم قابىلداپتى. وسىلايشا, قوعامدىق ءىسىن باستاپ كەتكەن.
«2023 جىلى ەۋروپا ساپارىنان سوڭ سوندا تۇراتىن قازاق بالالارىنا ساباق وتكىزۋ كەرەك ەكەن دەگەن وي كەلدى. 2024 جىلدىڭ 1 ماۋسىمىنان بەرى وسى ۆولونتەرلىك مىندەتىمدى نەگىزگى جۇمىسىممەن قوسا اتقارىپ كەلە جاتىرمىن. ءار جەكسەنبى سايىن ۋاقىتىمدى ءبولىپ, نيدەرلاند پەن گەرمانيادا تۇراتىن قازاق بالالارىنا انا تىلىنەن ونلاين ساباق وتكىزەمىن. ارينە, كۇندەلىكتى قولداناتىن, كوبىرەك تىڭدايتىن ءتىلى سول وزدەرى ءومىر ءسۇرىپ جاتقان ەلدەردىڭ ءتىلى بولعاندىقتان اكتسەنتپەن سويلەيدى, بىراق قازاقشا ۇيرەنۋگە ىنتاسى وتە جوعارى. ءبىلىمنىڭ ساداقاسى دەيدى عوي, مەن مۇنى وسىعان دەيىن جيعانىمنىڭ وتەمى, مۇعالىم رەتىندەگى قوعامدىق پارىزىم دەپ بىلەمىن. قازىر بۇل بالالارمەن بىرگە قىزىقتى كىتاپ وقىپ جاتىرمىز», دەيدى گ.بەكبولاتقىزى.
پەداگوگتىڭ پىكىرىنشە, بالالار كىتاپتى تەك وقىپ قانا قويماي, ارمانداۋعا, ارەكەت ەتۋگە ىنتالانادى. ءار بەتتەن ءوز ومىرىنە كەرەكتى نارسەنى الادى. وسىعان قوسا وقۋشىلار تاريحي وتانى – قازاقستان تۋرالى, قازاقتىڭ سالت-ءداستۇرى, ادەت-عۇرىپتارى, شەجىرە, حالىق اۋىز ادەبيەتىن وقىپ, تانىم كوكجيەگىن كەڭەيتكەن. ناتيجەسى: شىن ىقىلاس, تازا قىزىعۋشىلىق, كوزدەگى وت. وقۋشىلاردى ىنتالاندىرۋ ماقساتىندا مۇعالىم ءوزىنىڭ ءمورى باسىلعان سەرتيفيكات بەرەدى.
كەيىپكەرىمىز ءوزىنىڭ الەۋمەتتىك جەلىدەگى پاراقشاسىندا جاريالاعان «مەنى شابىتتاندىراتىن ساباق» اتتى جازباسىندا: «بۇل – جاي ساباق ەمەس, مەندە ءۇمىت پەن رۋحتى وياتاتىن ساعاتتار. ولار الىستا, مەن ەكراننىڭ بەرگى جاعىندا وتىرمىن. بىراق وسى ساباقتار ءبىزدى رۋحاني جاقىنداتىپ, ءبىر تىلدە – قازاقشا ارمانداۋعا ۇيرەتىپ جاتىر. ءار ساباعىمدا وقۋشىلارعا قىزىقتى تاپسىرمالار بەرەمىن. ءانۇران مەن ولەڭ, جۇمباق پەن جاڭىلتپاش, ماقال-ماتەل جاتتاۋ, شەجىرە اعاشىن سالۋ, شىعارما بويىنشا كوميكس, جۇمباقتىڭ جاۋابى مەن تىيىم سوزدەردى سۋرەت ارقىلى بەينەلەۋ, ەرتەگىگە رولدىك ويىن, شىعارما سيۋجەتى بويىنشا اتا-انامەن سۇحبات, ءتىپتى قارجىلىق ساۋات تەرميندەرىن بەينەروليك ارقىلى ءتۇسىندىرۋ جۇمىستارىن فۋنكتسيونالدىق ساۋاتتىلىققا نەگىزدەيمىن. ناتيجەمىز جامان ەمەس. وسى ءبىر جارىم جىلدا گەرمانيادان سانجار مەن ايدا اتتى وقۋشىلارىم كەلىپ كەتتى. بۇل بالالار – مەنىڭ شابىت كوزىم. ولاردىڭ ىنتاسى – مەنىڭ كۇشىم», دەپ تەبىرەنىسىن تۇيىندەپتى.
گ.بەكبولاتقىزىنان ءبىلىم الىپ جۇرگەن سافيا سەرىك ۇيرەنگەنى كوپ ەكەنىن ايتادى. «گۇلجازيرا حانىمنىڭ ساباعىنان ولەڭدەر, جاڭىلتپاشتار, ماقال-ماتەلدەر, جۇمباقتار, ەرتەگىلەر ۇيرەندىم. ءبىر ساباقتا جۇمباقتار جاسىرسا, كەلەسى ساباقتا سونىڭ جاۋاپتارىنا سۋرەتتەر سالدىق. تىيىمداردى تۇسىنگەنىمىزدى دە سۋرەت سالىپ كورسەتتىك. سودان سوڭ ءبىز «بەس اسىق» ويناپ ۇيرەندىك», دەيدى وقۋشى.
ال ەندى ءبىر وقۋشىسى ايدا ابجەكەنوۆا ەسىكتىڭ الدىندا تۇرعان ادامنىڭ سۋرەتىن سالىپتى. «قىزىقتى قازاق ءتىلى» ساباعىندا ۇيرەنگەن تىيىمدى وسىلاي تۇسىندىرگەن ەكەن. ء«بىر جىل بويى ساباققا قاتىستىم. ماعان ەڭ ۇناعانى – مۇعالىم بەرگەن شون كوۆيدىڭ «باقىتتى بالاقايدىڭ 7 داعدىسى» دەگەن كىتاپ بولدى. سودان كەيىن ءبىز ساباقتا ىرىم-تىيىمداردى بىلدىك. ەسىكتى تەبۋگە بولمايدى جانە كوكتى جۇلۋعا بولمايدى. قارا لاق پەن اق لاق بولىپ ويناپ, ءتارتىپتى بولۋدى ۇيرەندىم. تەاتر قويدىق, مەن تىرنا بولىپ وينادىم. كوپ جۇمباق شەشتىك. ەرتەگىنىڭ مازمۇنى بويىنشا سۋرەت سالدىق», دەيدى.
شەتەلدە تۇرىپ جاتسا دا انا ءتىلىن ۇيرەنۋگە ىقىلاس تانىتقان بالالار ء–وزىمىزدىڭ قارادومالاقتار. اتا-انالارى شەتتە جۇرگەندە تۋعان ءتىلىن ۇمىتىپ قالماسىن دەپ بەرگەنىن جوعارىدا جازدىق. بولاشاقتا وسى ماقالامىزدان ءبىلىپ, وقۋعا نيەتتىلەردىڭ قاتارى كوبەيىپ قالار, مۇمكىن وزگە ۇلت وكىلدەرى دە قوسىلار. بارىنەن بۇرىن كەيىپكەرىمىزدىڭ بۇل باستاماسى – ءار ساعاتىن پالەن سومعا باعالايتىن نارىقتىق قوعامعا قاتتى بەيىمدەلگەن, ءوز وقۋشىلارىنا اقىلى رەپەتيتور بولاتىن كەيبىر ارىپتەستەرىنە ۇلگى بولارلىق-اق ءىس.
