ماڭىزدى باستامانىڭ جۇزەگە اسۋىنا Astana IT University ءارى حالىقارالىق اقپاراتتىق تەحنولوگيالار ۋنيۆەرسيتەتى ەلەۋلى ۇلەس قوستى. اتالعان ۋنيۆەرسيتەتتەر «IEEE» قىزمەتىن دامىتۋعا ارنالعان نەگىزگى الاڭداردىڭ ءبىرى رەتىندە تانىلىپ وتىر. ايتا كەتەيىك, «IEEE» بۇگىندە الەمنىڭ 190-نان استام ەلىندە 500 مىڭنان اسا ماماندى بىرىكتىرەدى. ەلىمىزدە رەسمي سەكتسيانىڭ اشىلۋى ەلدىڭ جاھاندىق عىلىمي-تەحنولوگيالىق كەڭىستىكتەگى ءرولىنىڭ ارتىپ كەلە جاتقانىن كورسەتەدى.سونداي-اق Astana IT University-ءدىڭ ينجەنەرلىك ءبىلىم مەن تسيفرلىق يننوۆاتسيالاردىڭ جەتەكشى ورتالىعى رەتىندەگى مارتەبەسىن نىعايتا تۇسەدى.
وسى ورايدا «IEEE Kazakhstan Section» توراعاسى, Astana IT University پروفەسسورى ديدار ەدىلحان: «IEEE Kazakhstan Section قازاقستاندىق ينجەنەرلەر مەن زەرتتەۋشىلەرگە IEEE-ءدىڭ جاھاندىق ساراپتاماسىنا, حالىقارالىق كاسىبي قاۋىمداستىقتارعا, وزىق تەحنولوگيالىق تاجىريبەلەرگە تىكەلەي جول اشادى. ءبىزدىڭ ماقساتىمىز – ينجەنەرلىك تالانتتاردى دامىتۋعا, عىلىمي ىنتىماقتاستىق پەن يننوۆاتسيالارعا نەگىزدەلگەن تۇراقتى پلاتفورما قالىپتاستىرۋ. بۇل ەكوجۇيەنىڭ نەگىزگى قوزعاۋشى كۇشتەرىنىڭ ءبىرى Astana IT University بولماق», دەدى.
جاڭا سەكتسيا ەلەكترتەحنيكا جانە ەلەكترونيكا, اقپاراتتىق تەحنولوگيالار مەن كومپيۋتەرلىك عىلىمدار, جاساندى ينتەللەكت جانە دەرەكتەردى تالداۋ, تەلەكوممۋنيكاتسيا جانە كيبەرقاۋىپسىزدىك, روبوتتەحنيكا جانە ساباقتاس ينجەنەرلىك سالالار سياقتى نەگىزگى باعىتتارداعى مامانداردى بىرىكتىرەدى. «IEEE Kazakhstan Section» كاسىبي ورتانى دامىتۋعا, عىلىمي زەرتتەۋلەردى قولداۋعا, حالىقارالىق كونفەرەنتسيالار مەن سەمينارلار وتكىزۋگە, ءبىلىم بەرۋ باعدارلامالارىن ۇيىمداستىرۋعا جانە وتاندىق عالىمداردى IEEE جاھاندىق باستامالارىنا تارتۋعا ىقپال ەتەدى.
سەكتسيا قىزمەتىندە «IEEE International Conference on Smart Information Systems and Technologies» (IEEE SIST) حالىقارالىق كونفەرەنتسياسى ايرىقشا ورىن الادى. بۇل فورۋم جىل سايىن Astana IT University بازاسىندا وتكىزىلەدى.
Astana IT University عىلىم جانە يننوۆاتسيالار پرورەكتورى اندرەي بەلوششيتسكي: «ۋنيۆەرسيتەتىمىز بەس جىلدان استام ۋاقىت بويى «IEEE SIST» كونفەرەنتسياسىنىڭ ۇيىمداستىرۋشىسى رەتىندە قىزمەت اتقارىپ كەلەدى. بۇل الاڭدا عالىمدار, يننوۆاتورلار مەن يندۋستريا ماماندارى جاساندى ينتەللەكت, ينتەللەكتۋالدى جۇيەلەر, ۇلكەن دەرەكتەردى وڭدەۋ جانە تسيفرلىق سەرۆيستەر سالاسىنداعى قولدانبالى شەشىمدەردى تالقىلايدى. كونفەرەنتسيا باعدارلاماسى زەرتتەۋ ناتيجەلەرىنىڭ تانىستىرىلىمدارىن, تەحنيكالىق سەسسيالاردى, شەبەرلىك ساباقتارىمەن ءوندىرىس سەرىكتەستەرىمەن كەزدەسۋلەردى قامتيدى. «IEEE Kazakhstan Section»-نىڭ قۇرىلۋى قاتىسۋشىلارعا بىرلەسكەن زەرتتەۋلەر جۇرگىزۋگە جانە «IEEE» حالىقارالىق جۇمىس توپتارىنا قوسىلۋعا جاڭا مۇمكىندىكتەر بەرەدى», دەدى.
