فوتو: عىلىم جانە جوعارى ءبىلىم مينيسترلىگى
اسا كۇردەلى ەسەپتەردى قىسقا ۋاقىتتا شەشكەن
عالىمنىڭ ايتۋىنشا, بۇرىن بىرنەشە اپتا, ءتىپتى ايلار بويى قولمەن نەمەسە جەكە كومپيۋتەر كومەگىمەن ەسەپتەلەتىن اسا كۇردەلى الگەبرالىق ەسەپتەردى قازۇۋ-دىڭ جوعارى ءونىمدى سۋپەركومپيۋتەرى قىسقا ۋاقىتتا شەشىپ بەرگەن.
«تاريحقا شولۋ جاساساق, مەن ميتتاگ-لەفلەر ينستيتۋتىندا جۇمىس ىستەگەن ۋاقىتتا كومپيۋتەرگە ەسەپتەۋ باعدارلامالارىن بەرسەك, ونىڭ ناتيجەسىن كەلەسى كۇنى عانا الاتىنبىز. سەبەبى كۇردەلى ەسەپتەردى شەشۋ ءۇشىن قۋاتتى كومپيۋتەر قاجەت. قازىر وزىمدە 8 پروتسەسسوردان تۇراتىن قۋاتتى جەكە كومپيۋتەر بار, الگەبرالىق ەسەپتەرىمدى سونىڭ كومەگىمەن شىعارىپ كەلدىم. الايدا قازۇۋ سۋپەركومپيۋتەرى بۇرىن اپتالاپ ەسەپتەلەتىن كۇردەلى تاپسىرمالاردى بار بولعانى 3 ساعاتتا ورىنداپ بەردى. سوندىقتان بۇل وراسان زور كۇش», دەدى اكادەميك اسقار جۇمادىلداەۆ.
عالىمعا قازۇۋ سۋپەركومپيۋتەر ورتالىعىنىڭ ماماندارى ارنايى ەسەپتەۋگە ارنالعان سەرۆەرلەردى ءبولىپ بەرگەن جانە عىلىمي جوبالاردى جۇزەگە اسىرۋعا جان-جاقتى قولداۋ كورسەتەدى. بۇگىندە ا.جۇمادىلداەۆ جوعارى تەحنولوگيالىق قۇرىلعىنىڭ كومەگىمەن باسقا دا كۇردەلى ەسەپتەردى ەسەپتەۋ باعىتىندا جۇمىس ىستەپ جاتىر.
قازۇۋ-دىڭ سۋپەركومپيۋتەرى – الەمدەگى ۇزدىك 600 سۋپەركومپيۋتەردىڭ ءبىرى
ايتا كەتەيىك, قازۇۋ-دىڭ سۋپەركومپيۋتەرى اكادەميالىق باعىتتا ىسكە قوسىلعان العاشقى جوعارى ءونىمدى ەسەپتەۋ كەشەنى جانە مۇنداي دەڭگەيدەگى جۇيە ورتالىق ازيا وڭىرىندە كەزدەسپەيدى. ونىمدىلىگى – 2000 تەرافلوپس. الەمدەگى ۇزدىك 600 سۋپەركومپيۋتەردىڭ ءبىرى. ارحيتەكتۋراسى Intel جانە NVIDIA كومپانيالارىنىڭ پروتسەسسورلارىنان قۇرالعان, قۋاتى ەڭ زاماناۋي دەربەس كومپيۋتەردەن 10 مىڭ ەسە ارتىق. بۇل جۇيە كۇردەلى ماتەماتيكالىق مودەلدەر مەن كوپولشەمدى ەسەپتەۋلەردى جوعارى دالدىكپەن ورىنداۋعا, اۋا رايىن بولجاۋعا, سونداي-اق جاساندى ينتەللەكت پەن دەرەكتەردى تەرەڭ تالداۋ باعىتىنداعى عىلىمي جانە قولدانبالى جوبالاردى ءتيىمدى جۇزەگە اسىرۋعا كەڭ مۇمكىندىك بەرەدى.
