تيميريازەۆ اۋىلىنداعى جاڭا كەڭىستىك تسيفرلىق داعدىلاردى ۇيرەنۋگە, تەحنولوگيالىق جوبالاردى ىسكە اسىرۋعا جانە جاساندى ينتەللەكت باعىتىندا ءبىلىم الۋعا ارنالعان. جوبا مەملەكەت باسشىسى قاسىم-جومارت توقاەۆ ايقىنداعان ەلدى جاڭعىرتۋ باعىتىنىڭ ءبىر بولىگى رەتىندە جۇزەگە اسىرىلدى. ورتالىقتىڭ اۋىلدىق جەردە اشىلۋى تسيفرلاندىرۋ تەك ءىرى قالالارمەن شەكتەلمەيتىنىن اڭعارتادى.
سالتاناتتى ءىس-شاراعا جەرگىلىكتى بيلىك وكىلدەرى, ءبىلىم بەرۋ ۇيىمدارى, بيزنەس, قوعامدىق بىرلەستىكتەر, سونداي-اق وقۋشىلار مەن جاستار قاتىستى. سولتۇستىك قازاقستان وبلىسى اكىمى اپپاراتىنىڭ باسشىسى رۋسلان الىشەۆ Creative IT Center وڭىرلەردە تسيفرلىق ينفراقۇرىلىم قۇرۋعا بولاتىنىن دالەلدەيتىن جوبا ەكەنىن ايتتى. ول اسىرەسە اۋىلدارداعى تسيفرلىق ساۋاتتىلىق ماسەلەسىنە نازار اۋداردى.
«مۇنى ءبىز كۇن سايىن تاجىريبەدە كورىپ وتىرمىز: وزىنە-ءوزى قىزمەت كورسەتۋ ايماقتارى بولعاننىڭ وزىندە, اۋىل تۇرعىندارىنىڭ باسىم بولىگى ەلەكتروندىق مەملەكەتتىك قىزمەتتەردى ءوز بەتىنشە الا المايدى. سوندىقتان مۇنداي ورتالىقتار اسا قاجەت», دەدى ول.
تيميريازەۆتەگى ورتالىق وبلىس بويىنشا جوسپارلانعان 13 IT-ورتالىقتىڭ جەتىنشىسى. بيىل اشىلعان العاشقىسى دا وسى. 2026 جىلدىڭ 1 ناۋرىزىنا دەيىن سولتۇستىك قازاقستاننىڭ بارلىق اۋداندارىندا وسىنداي ورتالىقتار ىسكە قوسىلماق.
ءىس-شارادا تيميريازەۆتەگى ءسابيت مۇقانوۆ اتىنداعى مەكتەپ-گيمنازيانىڭ 11-سىنىپ وقۋشىسى دانيل ستەپانەنكونىڭ جوباسى كوپشىلىكتىڭ نازارىن اۋداردى. ول اۋىل وقۋشىلارىنا ارنالعان SABAQ ءبىلىم بەرۋ پلاتفورماسىن ازىرلەگەن. پلاتفورما ينتەرنەت ءالسىز نەمەسە مۇلدە جوق جەردە دە نەگىزگى ماتەريالداردى وفلاين پايدالانۋعا مۇمكىندىك بەرەدى. جوبا قازىردىڭ وزىندە ەلدىڭ ءتۇرلى وڭىرىندەگى جۇزدەن استام وقۋشى اراسىندا سىناقتان وتكەن.
اعا بۋىن ءۇشىن ورتالىقتىڭ ماڭىزىن ارداگەرلەر كەڭەسىنىڭ ءتورايىمى سايران بايدالينا اتاپ ءوتتى. ونىڭ ايتۋىنشا, مۇندا زەينەتكەرلەر ەلەكتروندىق مەملەكەتتىك قىزمەتتەردى, تسيفرلىق سەرۆيستەردى جانە تەلەمەديتسينانى مەڭگەرە الادى, سونداي-اق ءوز ەڭبەگىن ونلاين ورتادا ىلگەرىلەتۋگە جول اشىلادى.
تيميريازەۆ اگروتەحنيكالىق كوللەدجىنىڭ ديرەكتورى ماحمەت سايران ورتالىق ستۋدەنتتەرگە VR-تەحنولوگيالارمەن, ۆيرتۋالدى زەرتحانالارمەن جانە زاماناۋي باعدارلامالىق ونىمدەرمەن جۇمىس ىستەۋگە مۇمكىندىك بەرەتىنىن جەتكىزدى. بۇل بولاشاق مامانداردى ناقتى وندىرىستىك جاعدايعا جاقىن دايارلاۋعا كومەكتەسەدى.
دزەرجينسكي اۋىلدىق وكرۋگىنىڭ اكىمى ناريمان جاراسباەۆ تسيفرلىق ساۋاتتىلىق بۇگىندە بازالىق قاجەتتىلىككە اينالعانىن ايتتى. ونىڭ پىكىرىنشە, مۇنداي داعدىلارعا قولجەتىمدىلىك ەلدى مەكەننىڭ قاشىقتىعىنا قاراماستان بىردەي بولۋى ءتيىس.
ال اگروبيزنەس وكىلى, «ەسەي اگرو» جشس ديرەكتورى, وبلىستىق ءماسليحات دەپۋتاتى سەرىك جۇكەەۆ اۋىل شارۋاشىلىعىندا جوعارى تەحنولوگيامەن جۇمىس ىستەيتىن ماماندار تاپشى ەكەنىن اتاپ ءوتتى. ونىڭ سوزىنشە, Creative IT Center وسى ولقىلىقتى جويۋعا جاسالعان العاشقى قادام.
سپورتشىلارعا ارنالعان جاساندى ينتەللەكت باعدارلاماسى ازىرلەنىپ جاتىر
ءىس-شارا سوڭىندا تيميريازەۆ اۋىلىنىڭ اكىمى ورتالىق ۇرپاقتار اراسىنداعى بايلانىس الاڭىنا جانە تسيفرلىق تەحنولوگيا مەن جاساندى ينتەللەكتىنى مەڭگەرەتىن كادرلار ورداسىنا اينالاتىنىن ايتتى. Creative IT Center مەكتەپ وقۋشىلارىنا, ستۋدەنتتەرگە, كاسىپكەرلەرگە جانە اعا بۋىن وكىلدەرىنە اشىق. ورتالىق اۋىلدا تسيفرلىق داعدىلاردى دامىتۋعا جانە زاماناۋي IT-شەشىمدەردى ومىرگە ەنگىزۋگە باعىتتالعان.
