ستاتيستيكا كورسەتكەندەي, نەسيە العان ءاربىر ونىنشى جاستىڭ قارجىلىق جاعدايى ءماز ەمەس.
بۇگىنگى تاڭدا ەلىمىزدە 18 بەن 21 جاس ارالىعىنداعى 847 مىڭ ادام تۇرادى. مەملەكەتتىك نەسيە بيۋروسىنىڭ دەرەكتەرىنە سۇيەنسەك, 136 239 جاس ازامات مقۇ-دان قارىز العان. ونىڭ ىشىندە 18 638 ادامنىڭ (ياعني 13,7%) بەرەشەگىن وتەمەگەنىنە 90 كۇننەن اسقان.
2024 جىلدىڭ جازىنان باستاپ نەسيە نارىعىنداعى ءتارتىپتى قاتاڭداتۋ ءۇشىن بىرقاتار ماڭىزدى تۇزەتۋ ەنگىزىلدى. ولاردىڭ ىشىندە مىناداي تىيىمدار بار:
1. مەرزىمى وتكەن بەرەشەگى بارلارعا نەسيە بەرمەۋ: ەگەر قارىزدىڭ وتەلمەگەنىنە 90 كۇن تولسا, مقۇ جاڭا نەسيە بەرۋگە جانە وعان پايىز قوسۋعا قۇقىعى جوق.
2. بيومەتريالىق سايكەستەندىرۋ: ەندى ونلاين-كەلىسىمشارتتاردى قارىز الۋشىنىڭ بەت-بەينەسىن تانىمايىنشا جاساۋعا تىيىم سالىندى.
3. ساربازدارعا جەڭىلدىك: مەرزىمدى قىزمەتتەگى اسكەري قىزمەتشىلەرگە قىزمەت كەزەڭىندە جانە ول اياقتالعان سوڭ 60 كۇن ىشىندە پايىزدار مەن نەگىزگى قارىز بويىنشا تولەمدى كەيىنگە قالدىرۋ مۇمكىندىگى بەرىلدى.
4. پايىزدىق مولشەرلەمەنى تومەندەتۋ: جىلدىق ءتيىمدى سىياقى مولشەرلەمەسى 56%-دان 46%-عا دەيىن تومەندەتىلدى.
بيىلعى تامىزدان باستاپ تالاپتار تاعى دا كۇشەيدى. ەندى بانكتە 30 كۇننەن استام نەمەسە مقۇ-دا 1 كۇننەن استام مەرزىمى وتكەن بەرەشەگى بارلارعا جاڭا نەسيە بەرىلمەيدى. سونىمەن قاتار كەيىنگى 3 جىلدا ەسەپتەن شىعارىلعان بەرەشەگى بار ازاماتتار دا قارىز الا المايدى.
«قابىلدانعان شارالار تۇتىنۋشىلىق نەسيەلەۋدىڭ ءوسۋىن تەجەۋگە مۇمكىندىك بەردى: بيىلعى 10 ايدا ءوسىم 13,2%-عا دەيىن تومەندەدى (2024 جىلعى كورسەتكىش 24,3% بولعان)», دەپ اتاپ ءوتتى اگەنتتىك وكىلدەرى.
بولاشاقتا 20 جاسقا تولماعان ازاماتتاردىڭ تولەم قابىلەتتىلىگىن ەسەپتەگەندە تەك رەسمي تابىس كوزدەرى عانا ەسەپكە الىنباق.
