كەڭەستە دەنساۋلىق ساقتاۋ مينيسترلىگىنىڭ الەۋمەتتىك مەديتسينالىق ساقتاندىرۋ قورىنىڭ قىزمەتىن جەتىلدىرۋ مەن تسيفرلىق ترانسفورماتسياسىنا قاتىستى تاسىلدەرى قارالدى. حالىققا ءمامس شەڭبەرىندە كورسەتىلەتىن مەديتسينالىق كومەكتىڭ قولجەتىمدىلىگى مەن ساپاسىن ارتتىرۋعا قاتىستى جۇرگىزىلىپ جاتقان جۇمىستارعا نازار اۋدارىلدى.
ەلىمىزدە مىندەتتى الەۋمەتتىك مەديتسينالىق ساقتاندىرۋ جۇيەسىمەن شامامەن 17 ملن ادام قامتىلعان, ونىڭ 12 ملن-عا جۋىعى جەڭىلدىككە يە ساناتتارعا جاتادى. دەنساۋلىق ساقتاۋ ءمينيسترى اقمارال ءالنازاروۆا ءمامس قاراجاتىنىڭ جيىنتىق كولەمى 6 جىل ىشىندە 6,8 ترلن تەڭگەدەن اسقانىن باياندادى, ونىڭ 2 ترلن تەڭگەسى – ازاماتتاردىڭ جەڭىلدىككە يە ساناتتارى ءۇشىن بەرىلگەن مەملەكەتتىك جارنالار. تەك بيىلدىڭ وزىندە عانا وسى ماقساتتارعا 1,4 ترلن تەڭگە اۋدارىلعان.
جيىنعا قاتىسۋشىلار مىندەتتى الەۋمەتتىك ساقتاندىرۋ پاكەتى كەلەسى جىلدىڭ 1 قاڭتارىنان باستاپ كەڭەيتىلەتىنىنە بايلانىستى تسيفرلىق تەتىكتەردى ەنگىزۋ ارقىلى قاداعالاۋدى كۇشەيتە ءتۇسۋ مەن جۇيەنىڭ اشىقتىعى ماسەلەلەرىن تالقىلادى. كەلەر جىلدان باستاپ حالىقتى مىندەتتى الەۋمەتتىك مەديتسينالىق ساقتاندىرۋمەن قامتۋ ايتارلىقتاي كەڭەيەدى. ءتيىستى زاڭنامالىق وزگەرىستەر جاڭا جىلدان باستاپ كۇشىنە ەنەدى.
بۇگىندە ەلىمىزدە مەديتسينالىق كومەكتىڭ 92%-ى اۆتوماتتى تۇردە جۇزەگە اسىرىلادى. كەلەسى جىلدىڭ سوڭىنا دەيىن ونى 100%-عا دەيىن جەتكىزۋ جوسپارلانىپ وتىر, بۇل ادامي فاكتوردى تولىعىمەن الىپ تاستاۋعا مۇمكىندىك بەرەدى.
ودان بولەك, ساتىپ الۋ, مەديتسينالىق قىزمەتتەرگە اقى تولەۋ سياقتى باسقا دا نەگىزگى بيزنەس-ۇدەرىستەر تسيفرلاندىرىلدى. قوردىڭ اقپاراتتىق جۇيەسىن دەنساۋلىق ساقتاۋ, ەڭبەك جانە حالىقتى الەۋمەتتىك قورعاۋ مينيسترلىكتەرى ءارى eGov جۇيەلەرىمەن ينتەگراتسيالاۋ جەڭىلدىككە يە ساناتتارعا قاتىستى دەرەكتەردىڭ اۆتوماتتى تۇردە جاڭارتىلۋىن قامتاماسىز ەتتى, مەديتسينالىق ساقتاندىرۋ جۇيەسى جارنالارىن ەسەپكە الۋدىڭ دالدىگىن ارتتىردى.
بيىل حالىقتىڭ مەديتسينالىق قىزمەتتەر كولەمىنە ناقتى قاجەتتىلىگىن ەسەپتەۋدى ەسكەرە وتىرىپ, جوسپارلاۋ قاعيدالارىن, ادىستەرى مەن تاسىلدەرىن بەكىتۋ ماڭىزدى قادام بولدى. كەلەسى جىلى جوسپارلاۋدىڭ بارلىق ۇدەرىسىن تسيفرلاندىرۋ اياقتالادى, بۇل ەسەپتەۋلەردى تەك بۇرىنعى دەرەكتەر نەگىزىندە عانا ەمەس, سونىمەن قاتار كورسەتىلگەن مەديتسينالىق كومەكتىڭ ناقتى كولەمىن ءارى بولجامداردى ەسكەرە وتىرىپ جۇزەگە اسىرۋعا مۇمكىندىك بەرەدى.
بيىلعى 1 شىلدەدەن بەرى مەديتسينالىق قىزمەتتەردىڭ ساپاسىنا مونيتورينگ جاساۋ مەن اقى تولەۋ بىرىڭعاي تسيفرلىق كونتۋرعا بىرىكتىرىلگەن. جاڭا مودۋل تولەم قۇجاتتارىنىڭ سانىن 9-دان 3-كە دەيىن قىسقارتتى, 1س بۋحگالتەريامەن ۇزدىكسىز ينتەگراتسيانى قامتاماسىز ەتتى. بۇعان قوسا جۇيەنىڭ ء«السىز تۇستارى» دا انىقتالدى. ىقتيمال تاۋەكەلدەر دەنساۋلىق ساقتاۋ مينيسترلىگىنىڭ باقىلاۋىندا, ولار تسيفرلىق قۇرالداردى ەنگىزۋ ارقىلى جويىلادى.
مەديتسينالىق ۇيىمداردا Face ID جۇيەسى ەنگىزىلىپ جاتىر, بۇل بۇگىندە مەديتسينالىق مەكەمەلەر تاراپىنان تىركەۋلەر سانىن 7%-عا تومەندەتۋگە, بيۋدجەت قاراجاتىنىڭ شامامەن 10,5 ملرد تەڭگەسىن ۇنەمدەۋگە مۇمكىندىك بەردى.
كەلەسى جىلى مەديتسينالىق قىزمەتتەردى بولۋگە رەيتينگتىك باعانى ەسەپتەۋ ينديكاتورلارىن تولىق تسيفرلاندىرۋ جوسپارلانىپ وتىر. سونىڭ ناتيجەسىندە مەديتسينالىق كومەكتىڭ جوعارى ساپاسى مەن قولجەتىمدىلىگىن قامتاماسىز ەتە العان جەتكىزۋشىلەر قارجىلاندىرۋ مۇمكىندىگىنە يە بولادى. كەلەسى جىلى مەديتسينالىق دەرەكتەردىڭ بىرىڭعاي قويماسىن قالىپتاستىرۋ جونىندەگى جۇمىستىڭ اياقتالۋى كورسەتىلەتىن مەديتسينالىق كومەكتى جوسپارلاۋ مەن ساپاسىن جاقسارتۋعا اسەر ەتەدى.
حالىققا ارنالعان ءدارى-دارمەكتەردى جوسپارلاۋ مەن بەرۋ تيىمدىلىگى ماسەلەلەرىنە دە نازار اۋدارىلدى. كلينيكالىق حاتتامالاردى تسيفرلاندىرۋ مەن بىرلەسىپ تولەۋ تەتىكتەرىن ەنگىزۋ جۇمىستارى كەزەڭ-كەزەڭىمەن جۇرگىزىلىپ كەلەدى, بۇل ەم الۋشىلاردى قاجەتتى پرەپاراتتارمەن قامتاماسىز ەتۋ ۇدەرىستەرىن وڭتايلاندىرۋعا مۇمكىندىك بەرەدى.
– ماقسات – كورسەتىلەتىن مەديتسينالىق قىزمەتتەردىڭ ساپاسىن ۇنەمى جاقسارتا وتىرىپ, قولجەتىمدىلىگىن ارتتىرۋ. تسيفرلاندىرۋدىڭ العاشقى ناتيجەلەرىن قازىردىڭ وزىندە كورىپ وتىرمىز. وزىق تەحنولوگيالاردى قارقىندى ەنگىزۋدى جالعاستىرۋ قاجەت. ۇدەرىستەردى اۆتوماتتاندىرۋ مەديتسينالىق قۇرامدى بيۋروكراتيالىق راسىمدەردەن بوساتىپ قانا قويماي, ەمدەۋ مەن ءدارى-دارمەككە بولىنگەن قاراجاتتىڭ جۇمسالۋىنىڭ اشىقتىعىن قامتاماسىز ەتەدى. سول كەزدە ازاماتتار دا, دارىگەرلەر دە, مەملەكەت تە رەفورمالاردىڭ ناتيجەلەرىن ايقىن كورەتىن بولادى, – دەدى ولجاس بەكتەنوۆ.
جيىن قورىتىندىسىندا پرەمەر-مينيستر دەنساۋلىق ساقتاۋ, جاساندى ينتەللەكت جانە تسيفرلىق دامۋ مينيسترلىكتەرىنە ۇدەرىستەردى تسيفرلاندىرۋ جۇمىسىن جانداندىرۋدى تاپسىردى. قارجى مينيسترلىگى دەنساۋلىق ساقتاۋ جۇيەسىندە قارجىلىق ءتارتىپتى كۇشەيتۋگە قاتىستى شارالار قابىلدايدى.
