سۋرەت: ulysmedia.kz
ساتىپ الۋ راسىمدەرىن جاڭعىرتۋ شاراسى 824 ملرد تەڭگەنى ۇنەمدەۋگە ءارى قايتا بولۋگە مۇمكىندىك جاساپ, ۇدەرىستى 3–6 ەسە جەدەلدەتتى. ناتيجەسىندە, مەملەكەتتىك قارجىنىڭ يگەرىلۋ تيىمدىلىگى ارتتى. سونىمەن قاتار جاسالعان شارتتاردىڭ جالپى كولەمى 2 ەسەگە ءوستى, وتاندىق وندىرۋشىلەردەن ساتىپ الۋ كولەمى 1,5 ەسەگە ارتتى. بۇل – ىشكى نارىقتى قولداۋدىڭ ايقىن كورىنىسى. ال شاعىمدار سانىنىڭ 25 پايىزعا قىسقارۋى جۇيەدەگى اشىقتىق پەن ءتارتىپتىڭ كۇشەيگەنىن اڭعارتادى.
مەملەكەتتىك اۋديت جۇيەسى دە الدىن الۋ تەتىكتەرىن كۇشەيتىپ, 396 ملرد تەڭگە كولەمىندەگى ءتيىمسىز شىعىستارعا جول بەرمەدى. بيۋدجەتتى ونلاين-مونيتورينگتەۋ ارقىلى ءتۇرلى الاياقتىق سحەمالاردىڭ جولى كەسىلىپ, شامامەن 1 ملرد تەڭگە مەملەكەت قازىناسىنا قايتارىلدى. بۇل باقىلاۋدىڭ زاماناۋي قۇرالدارى قارجى ءتارتىبىن نىعايتۋدا شەشۋشى ءرول اتقاراتىنىن كورسەتەدى.
بۇعان قوسا «قارجى ورتالىعى» اكتسيونەرلىك قوعامىنىڭ قىزمەتىن ترانسفورماتسيالاۋ اياسىندا ءبىلىم بەرۋدى قارجىلاندىرۋدىڭ بىرىڭعاي «Bilimge» پورتالى ىسكە قوسىلدى. جەكەمەنشىك مەكتەپتەردى اككرەديتتەۋ قۇجاتتارىنان باستاپ, قارجىلاندىرۋ مەن تولەمدەرگە دەيىنگى بارلىق ۇدەرىس تولىق تسيفرلاندىرىلدى.
ۇدەرىستەردى اۆتوماتتاندىرۋدىڭ ارقاسىندا 765 جەكەمەنشىك مەكتەپپەن جەدەل شارت جاسالىپ, ونىڭ 656-سى 38 ملرد تەڭگەگە قارجىلاندىرىلدى. ەڭ باستىسى, قارجىلاندىرۋ مەرزىمى 10–15 كۇنگە دەيىن قىسقارىپ, ءبىلىم بەرۋ ۇيىمدارى ءۇشىن قولايلى ءارى اشىق جۇيە قالىپتاستى.
