سۋرەت: qyzylqoga.kz
بۇگىندە 20 مىڭنان استام جۇمىس ورنىن قۇرۋعا مۇمكىندىك بەرەتىن 10,2 ترلن تەڭگەگە جۋىق سوماعا ءىرى يندۋستريالىق جوبالار پورتفەلى جاساقتالدى. جالپى, ونەركاسىپتە يندۋستريالىق ينۆەستيتسيالىق جوبالاردى جۇزەگە اسىرۋ ەسەبىنەن 30 مىڭنان استام جۇمىس ورنى قۇرىلادى.
جوبالار شيكىزات باعاسىنىڭ اۋىتقۋلارىنا تاۋەلدىلىكتى ازايتۋعا جانە ناقتى ونەركاسىپتىك ءوندىرىستى دامىتۋعا باعىتتالعان. ولاردىڭ ىشىندە «ەۆروحيم–قاراتاۋ» جشس جامبىل وبلىسىندا كۇكىرت قىشقىلى, مينەرالدى تىڭايتقىشتار جانە يندۋستريالىق ونىمدەردى وندىرەدى. ينۆەستيتسيا كولەمى – 536 ملرد تەڭگە. 1,2 مىڭ جۇمىس ورنى اشىلادى. جوسپارلانعان ءونىم – جىلىنا 800 مىڭ توننا. بۇل كەلەسى جىلى ىسكە قوسىلادى.
تۇركىستان وبلىسىنداعى «ساستوبە حيميالىق كەشەنى» جشس كاۋستيكالىق سودا, پۆح جانە ىلەسپە ماتەريالدار شىعارادى. ينۆەستيتسيا كولەمى – 153,9 ملرد تەڭگە. 940 جۇمىس ورنى اشىلادى. جىلىنا 100 مىڭ توننا كاۋستيكالىق سودا, 120 مىڭ توننا پۆح, 200 مىڭ توننا كالتسي كاربيدى جانە 400 مىڭ توننا اك وندىرىلەدى. 2027 جىلى ىسكە قوسىلادى.
«Qazaq Kalium Ltd» جك – بقو-داعى «ساتيمولا» كەن ورنىنان كالي تۇزدارى بويىنشا بايىتۋ-ءوندىرۋ كەشەنى. ينۆەستيتسيا كولەمى – 1,2 ترلن تەڭگە. 4 000 جۇمىس ورنى اشىلادى. جوسپارلانعان ءونىم – جىلىنا 1,5 ملن توننا كالي تىڭايتقىشى. 2027 جىلى ىسكە قوسىلادى.
تۇركىستان وبلىسىنداعى «Taiqonyr Qyshqyl Zauyty» جشس كۇكىرت قىشقىلى زاۋىتى. ينۆەستيتسيا كولەمى – 113,5 ملرد تەڭگە. 274 جۇمىس ورنى ورنى اشىلادى. جىلىنا 800 مىڭ توننا كۇكىرت قىشقىلى شىعارىلادى. 2027 جىلى ىسكە قوسىلادى.
قاراعاندى وبلىسىندا بولات ونىمدەرىنىڭ جاڭا تۇرلەرىن شىعارۋ ارقىلى «Qarmet» اق ءوندىرىسىن كەڭەيتۋ. ينۆەستيتسيا كولەمى – 1,6 ترلن تەڭگە. 1,9 مىڭ جۇمىس ورنى اشىلادى. جوسپارلانعان ءونىم – جىلىنا 5 ميلليون توننا بولات. وندىرىسكە قوسۋ مەرزىمى – 2028 جىل.
«سسكوب» اق-نىڭ قوستاناي وبلىسىنداعى ىستىقتاي بريكەتتەلگەن تەمىر وندىرەتىن زاۋىتى (I كەزەڭ). ينۆەستيتسيا كولەمى – 920 ملرد تەڭگە. 1 مىڭ جۇمىس ورنى اشىلادى. ءوندىرىس كولەمى جىلىنا – 2 ملن توننا. 2028 جىلى ىسكە قوسىلدى.
سونداي-اق مەملەكەت باسشىسىنىڭ شيكىزات ەمەس سەكتورعا, قوسىلعان قۇن مەن تۇراقتى جۇمىس ورىندارىن بەرەتىن جوبالارعا باسا نازار اۋدارا وتىرىپ, جاڭا ينۆەستيتسيالىق تسيكلدى قالىپتاستىرۋ جونىندەگى تاپسىرمالارى شەڭبەرىندە ۇكىمەت شەتەلدىك ينۆەستورلاردى وڭدەۋ, مەتاللۋرگيا, حيميا جانە ماتەريالدار وندىرىسىنە تىكەلەي تارتۋ جونىندەگى جۇمىستاردى كۇشەيتتى.
شەتەلدىكتەردىڭ قاتىسۋىمەن شامامەن 5,7 ترلن تەڭگەگە 20 ءىرى جوبادان تۇراتىن پورتفەل جاساقتالدى, ولار بويىنشا 11 مىڭنان استام جۇمىس ورنى اشىلادى. مۇنداي جوبالاردىڭ ەڭ كوبى جامبىل وبلىسىندا شوعىرلانعان – بەس جوبا, ال پاۆلودار وبلىسىندا – ءتورت جوبا. ينۆەستيتسيا كولەمى بويىنشا جامبىل وبلىسى 1,47 ترلن تەڭگەگە, پاۆلودار وبلىسى 1,02 ترلن تەڭگەگە, سونداي-اق قوستاناي وبلىسى 920 ملرد تەڭگەگە ءىرى جوبامەن كوش باستاپ تۇر.
قۇرىلىس ماتەريالدارىن ءوندىرۋ, اعاش وڭدەۋ جانە ماشينا جاساۋ سالاسىندا دا بىرقاتار جوبا جۇزەگە اسۋدا.
بۇدان باسقا, ەكى ەلدەن كوپ قاتىسۋشىسى بار 9 كوپجاقتى جوبا جۇزەگە اسىرىلۋدا, قۇيىلاتىن قاراجات 2,4 ملرد اقش دوللارى شاماسىندا, ولار بويىنشا 2,8 مىڭنان استام جۇمىس ورنى قۇرىلادى.
«ۇكىمەت وڭ ينۆەستيتسيالىق كليماتتى قامتاماسىز ەتەتىن بىرقاتار شارا قابىلداۋدا. كۆازيمەملەكەتتىك سەكتورداعى قارجى تەتىكتەرىن تارتۋ ارقىلى جوبالاردى قارجىلاندىرۋعا قولداۋ كورسەتىلەدى. ماسەلەن, 2022 جىلدان بەرى «ارالاس قارجىلاندىرۋ» قاعيداتىن قوسا العاندا, ەكونوميكانىڭ ءتۇرلى سەكتورلارىندا 116 جوبانى جۇزەگە اسىرۋعا 700 ملرد تەڭگەدەن استام قارجى ءبولىندى. بيىل جانە الداعى ەكى جىلدا ىسكە قوسىلاتىن جوبالاردىڭ ەسەبىنەن 30 مىڭنان استام تۇراقتى جۇمىس ورنىن قۇرۋ جوسپارلانۋدا», دەدى ونەركاسىپ جانە قۇرىلىس ۆيتسە-ءمينيسترى ولجاس ساپاربەكوۆ.
شەتەلدىك ينۆەستورلار ءۇشىن جاعدايدىڭ جاقسارۋى, ينۆەست شتابتىڭ جۇمىسى جانە نەگىزگى يندۋستريالىق ايماقتارداعى جوبالاردىڭ ناقتى جيىنتىعى قولايلى ينۆەستيتسيالىق كليمات تۋعىزىپ وتىر.
يندۋستريالىق باستامالارعا ينفراقۇرىلىممەن قامتاماسىز ەتۋ جانە ماقساتتى تۇردە قارجىلاندىرۋ ارقىلى قولداۋ كورسەتىلۋدە. «ارالاستىرا قارجىلاندىرۋ» قاعيداتى مەملەكەتتىك قاراجاتتى نارىقتاعى قارجىمەن بىرىكتىرۋگە جول اشىپ, ناتيجەسىندە سالىستىرمالى تۇردە از بيۋدجەتتىك ينۆەستيتسيالارمەن ايتارلىقتاي كوپ ينۆەستيتسيالار تارتۋعا مۇمكىندىك تۋىپ وتىر. بۇل رەتتە 2026 جىلعا ارنالعان بيۋدجەتتە سالانى قولداۋدىڭ جاڭا قۇرالدارى كوزدەلگەن, ماسەلەن, قدب, ونەركاسىپتى دامىتۋ قورى جانە «Qazaqstan Investment Corporation» ارقىلى 30-عا جۋىق جاڭا جوبانى قولداۋ جوسپارلانۋدا. بۇل جۇزدەگەن ميلليارد تەڭگە ينۆەستيتسيالار تارتۋدى جانە شيكىزاتتىق ەمەس ءونىم ءوندىرۋ كولەمىنىڭ ارتتىرۋدى قامتاماسىز ەتەدى.
سونداي-اق 2026–2028 جىلدارعا ارنالعان ينۆەستيتسيالىق باستامالار قولعا الىندى, سونىڭ ىشىندە دامۋ ينستيتۋتتارىنىڭ كاپيتالىن ۇلعايتۋ جانە جابدىقتى جاڭارتۋ ءۇشىن ليزينگتىك قارجىلاندىرۋ باعدارلاماسى دايىندالدى.
