سۋرەت: gov.kz
اكتسيا اياسىندا ەلىمىزدىڭ بارلىق وڭىرلەرى مەن رەسپۋبليكالىق ماڭىزى بار قالالار اباي وبلىسىنا ءبىر-ءبىر الەۋمەتتىك نەمەسە مادەني نىسان سىيعا تارتادى. كەڭەستە سەمەي قالاسىنىڭ باس جوسپارىنا وزگەرىستەر ەنگىزۋ, ارنايى ەكونوميكالىق ايماق (اەا) قۇرۋ ماسەلەلەرى تالقىلاندى. اەا قۇرامىنا 1 200 گەكتار الاڭدى قامتيتىن جاڭا اكىمشىلىك-ىسكەرلىك ورتالىق, زاماناۋي تۇرعىن ءۇي كەشەندەرى, 40-تان استام اكىمشىلىك, كوممەرتسيالىق جانە الەۋمەتتىك نىسان كىرەتىن بولادى.
سەمەي قالاسىندا جاڭا ينجەنەرلىك ينفراقۇرىلىم, قازاندىق, جىلۋ, ەلەكتر, سۋ قۇبىرى مەن سۋ بۇرۋ جەلىلەرىن سالۋ مىندەتتەرى قارالدى. بۇگىندە اباي وبلىسىنىڭ اكىمدىگى اكتسيا اياسىنداعى جوبالاردى جۇزەگە اسىرۋ بويىنشا وڭىرلەرمەن بەلسەندى جۇمىس جۇرگىزىپ جاتىر. «ابايعا قۇرمەت» اكتسياسىن العاشقىلاردىڭ ءبىرى بولىپ ماڭعىستاۋ وبلىسىنىڭ تۇرعىندارى قولداپ, دوستىق ءۇيىنىڭ قۇرىلىسىن باستاپ كەتتى.
تۇركىستان وبلىسى – كورمە ورتالىعىن, قىزىلوردا وبلىسى – «اناعا تاعزىم» عيماراتىن, اتىراۋ وبلىسى – «اباي الەمى» ورتالىعىن سالادى. شىمكەنت – شىعارماشىلىق ورتالىعىن, سولتۇستىك قازاقستان وبلىسى – مەملەكەتتىك رامىزدەر الاڭىن, شىعىس قازاقستان وبلىسى – ەرتىس وزەنى جاعالاۋىن اباتتاندىرادى. اقتوبە وبلىسى – جەكپە-جەك سارايىن, پاۆلودار وبلىسى – ۇستەل تەننيسى ورتالىعىن تۇرعىزادى. استانا «كەلەشەك» مەكتەبىن سىيعا تارتسا, الماتى – مەدياورتالىق, قاراعاندى وبلىسى – بوتانيكالىق باق, باتىس قازاقستان وبلىسى – جەلىلىك ساياباق, قوستاناي وبلىسى – رۋحانيات ورتالىعىن سالادى.
قانات بوزىمباەۆ قالعان وڭىرلەرگە جوبالاردى ايقىنداۋ مەن جۇزەگە اسىرۋ جۇمىستارىن جەدەلدەتۋدى تاپسىردى. «ۇيلەستىرىلگەن جۇمىستىڭ ناتيجەسىندە بارلىق جوبانى بىرىڭعاي ارحيتەكتۋرالىق ستيلدە ءساتتى اياقتاپ, اباي اتىنا لايىقتى ءارى ءوڭىردىڭ بولاشاعى ءۇشىن ماڭىزدى ينفراقۇرىلىم قۇراتىنىمىزعا سەنىمدىمىن», دەدى ول.
جۇكتەلگەن مىندەتتەردى ءتيىمدى ءارى ۋاقتىلى جۇزەگە اسىرۋ ءۇشىن پرەمەر-ءمينيستردىڭ ورىنباسارى ونەركاسىپ جانە قۇرىلىس, قارجى, ۇلتتىق ەكونوميكا مينيسترلىكتەرىنە جانە وڭىرلەردىڭ اكىمدەرىنە بىرقاتار تاپسىرما بەردى.
