ول بيىل ۇزىندىعى 1,7 مىڭ شاقىرىم بولاتىن 9 جاڭا جول ۋچاسكەسى ىسكە قوسىلعانىن ايتتى.
«وسىلايشا اقىلى ۋچاسكەلەردىڭ جالپى سانى 26 بىرلىككە, ال ۇزىندىعى 4 900 شاقىرىمعا جەتتى. وسى جىلدىڭ 11 ايىندا اقىلى جولداردان 79 ملرد تەڭگە ءتۇستى», دەدى دارحان يماناشەۆ.بۇل قاراجاتقا ۇزىندىعى 4,9 مىڭ شاقىرىم 26 اقىلى ۋچاسكەنى كۇتىپ ۇستاۋ جانە اعىمداعى جوندەۋ, اقى الۋ جۇيەسىنىڭ ينفراقۇرىلىمىن قامتاماسىز ەتۋ, سونداي-اق سوڭعى جىلدارى 1 مىڭعا جۋىق جول-پايدالانۋ تەحنيكاسى ساتىپ الىنعانى, ينۆەستور شىعىندارىن وتەۋ جانە وزگە دە اكىمشىلىك شىعىستار جۇزەگە اسىرىلعانى ايتىلدى.
سونىمەن قاتار دارحان يماناشەۆ اۆتوجول قۇرىلىسىنا جاڭا تەحنولوگيالاردى ەنگىزۋ بويىنشا جۇرگىزىلىپ جاتقان جۇمىستار تۋرالى دا ايتىپ ءوتتى. ونىڭ ايتۋىنشا, جاڭا ۋچاسكەلەردە قۇرىلىس نىساندارىن اقپاراتتىق مودەلدەۋ تەحنولوگياسى قولدانىلادى. كەپىلدىگى بار ۋچاسكەلەردە جاساندى ينتەللەكت ارقىلى جول جامىلعىسىنداعى اقاۋلاردى اۆتوماتتى انىقتاۋ جۇيەسى پايدالانىلادى.
«ورىندالاتىن جۇمىستار مەن قولدانىلاتىن جول-قۇرىلىس ماتەريالدارىنىڭ ساپاسىن باقىلاۋعا ەرەكشە كوڭىل بولىنەدى», دەدى د.يماناشەۆ.سپيكەر بۇل باعىتتا كەلەسى تسيفرلىق شەشىمدەر قولدانىلىپ جاتقانىن ايتتى:
- «Q-RAM» جۇيەسى – قايتا جاڭعىرتۋ, ورتاشا جانە كۇردەلى جوندەۋ نىساندارىنداعى جۇمىستىڭ بارىسىن باقىلاۋ;
- «KazRoadLab» – زەرتحانالىق سىناق ناتيجەلەرىن ناقتى ۋاقىت رەجيمىندە باقىلاۋ;
- «Smart Road Diagnostic System» – GPS كوورديناتتارىمەن جاساندى ينتەللەكت الگوريتمدەرى نەگىزىندە جول توسەمىنىڭ جاي-كۇيىن تالداۋ;
- «تسيفرلىق تەڭگە» مەحانيزمى – شىعىستاردىڭ اشىقتىعىن قامتاماسىز ەتۋ.
ايتا كەتەيىك, بۇعان دەيىن بيىل ەلىمىزدە 13 مىڭ شاقىرىم اۆتوجول جوندەۋ جۇمىستارىمەن قامتىلعانىن جازعان ەدىك.
