سۋرەتتى تۇسىرگەن – ەسەنجول يسابەك
پاۆلودار قالاسىنىڭ تۇرعىنى ينديرا سادۋاقاسوۆا ءاۋ باستا كاسىپكەر بولامىن دەپ ارمانداعان جوقپىن دەيدى. تەك ەكى بالاسىنىڭ جانىندا بولۋ ءۇشىن زاۋىتتاعى قىزمەتىنەن باس تارتىپ, ءۇي جاعدايىندا قولىنان كەلەتىن ىسپەن اينالىسۋدى ءجون ساناپتى.
«تۇراقتى جۇمىسىمنان ءوز ەركىممەن شىعىپ, بالالارىما قارايلاسقىم كەلدى. كۇندەلىكتى ءىشىپ-جەۋىمىزگە از دا بولسا ناپاقا تابۋ ءۇشىن ۇيدە وتىرىپ كاسىپ اشىپ كورەيىن دەپ ويلادىم. ءدامدى اس ازىرلەگەندى ۇناتامىن. ءسويتىپ, العاش رەت قالتامداعى 15 مىڭ تەڭگەگە 5 كيلوگرامم ەت ساتىپ الىپ, مانتى دايىندادىم. ەشبىر جارناماسىز ءارى تۇراقتى تۇتىنۋشىسىز باستالعان ءىسىمدى 500-گە جۋىق وقىرمانى بار ينستاگرام پاراقشاما سالدىم. بەس مينۋتتان كەيىن ءبىر تانىسىم مانتىمنىڭ 3 كيلوسىن ساتىپ الامىن دەپ جازدى. ءسويتىپ, اس ۇيىمدە جارتىلاي دايىن ونىمدەردى ازىرلەۋمەن اينالىسا باستادىم», دەيدى ي.سادۋاقاسوۆا.
جاس كاسىپكەر پاندەميا كەزىندە دە ءىسىن توقتاتپاعان. ويتكەنى ءدامى ءتىل ۇيىرەر مانتىسىن ۇناتاتىنداردىڭ قاتارى ارتا تۇسكەن. ۋاقىت وتە كەلە ينديراعا جاناشىر دوستارى قولداۋ كورسەتىپ, كاسىبىن كەڭەيتۋگە كەڭەس بەرەدى. 2023 جىلى «بيزنەس باستاۋ» باعدارلاماسىنا قاتىسىپ, 5 ملن تەڭگە كولەمىندە قايتارىمسىز گرانتقا يە بولعان. مەملەكەتتىك قولداۋدىڭ ارقاسىندا ءوز ءونىمىن پاتەنتتەيدى ءارى سەرتيفيكات الادى. جالپى اۋماعى 50 شارشى مەتردى قۇرايتىن ورىندى جالعا الىپ, ادامداردى جۇمىسقا قابىلدايدى. كاسىبىن الەۋمەتتىك جەلى ارقىلى جارنامالايدى. قازىرگى ۋاقىتتا كاسىپكەردىڭ كومانداسى پاۆلودار قالاسىندا «ماگيا ۆكۋسا» دەپ اتالاتىن ساۋدا نۇكتەسىندە تاعامنىڭ ءتۇر-ءتۇرىن ازىرلەيدى.
«ەتتى ءتورت جىل كولەمىندە ءبىر جەتكىزۋشىدەن عانا الىپ كەلەمىن. ودان مانتى, تۇشپارا, كوتلەت, قىرىققابات وراماسى, توقاش ازىرلەنەدى. تاعام بيولوگيالىق ىدىرايتىن قاپتاماعا سالىنادى. ياعني ىدىستان قورشاعان ورتاعا ەشقانداي زيان كەلمەيدى», دەيدى ول.
مۇندا 20 ساعات قايناتىلىپ پىسىرىلەتىن سۇيەك سورپاسى ساتىلادى. بۇل تاعام قانت ديابەتى, ارتريت, ارتروز سىندى بۋىن اۋرۋلارىنا شالدىققاندارعا ەم. ينديرا قازىر «ىسكەرلىك بايلانىستار» باعدارلاماسىنا ءوتىنىش بەرگەن. ەگەر ءوتىنىمى ماقۇلدانسا, وتاندىق كوللاگەن ازىرلەمەك. جوعارىدا اتاپ وتكەن سۇيەك سورپاسىن سۇيىق تۇردەن جەلە تۇرىندەگى قويۋ اسقا اينالدىرماق. مۇنداي تەحنولوگيا گەرمانيادا جاسالادى ەكەن. قازىرگى كۇنى كورەيا, قىتاي ەلدەرىنىڭ كوللاگەندەرى بار. سول سياقتى وتاندىق كوللاگەندى شىعارۋعا قولداۋ ءارى ينۆەستور كەرەك. ونىڭ ءبارى ۋاقىت ەنشىسىندە.
جۋىردا جاس كاسىپكەر وبلىس كولەمىندە وتكىزىلگەن «تاۋەلسىزدىك ۇرپاقتارى» بايقاۋىنا قاتىسىپ, بيزنەس اتالىمىندا اقشالاي سىيلىق جەڭىپ الدى. كاسىپكەردىڭ ىسىنە بەرەكە تىلەيمىز.
پاۆلودار وبلىسى
