تاۋلى ايماق تۇرعىندارى تالاي جىلداردان بەرى مەديتسينالىق مەكەمەنىڭ قاجەتتىلىگىن سەزىنىپ كەلگەن ەدى. بيىل جۇرتشىلىق تىلەگى ورىندالىپ, جاڭادان سالىنعان مەديتسينالىق پۋنكت پايدالانۋعا بەرىلدى.
اۋىل تۇرعىندارىنىڭ قۋانىشىن تاسىتقان ءىس-شاراعا كەگەن اۋدانىنىڭ اكىمى نۇرباقىت تەڭىزباەۆ, مەكەمە باسشىلارى, قوعامدىق ۇيىم توراعالارى, ەڭبەك ارداگەرلەرى قاتىسىپ, اقجارما لەبىزىن ءبىلدىردى.
– اۋىلىمىزدا بۇرىن-سوڭدى مۇنداي نىسان بولماعان. باس اۋىرىپ, بالتىر سىزداسا ساتىعا, ودان ءارى 150 شاقىرىم ءجۇرىپ, اۋدانداعى ورتالىق اۋرۋحاناعا باراتىنبىز. شاعىن دا بولسا بۇگىنگى اشىلعان مەديتسينالىق پۋنكت تۇرعىنداردىڭ دەر شاعىندا العاشقى مەديتسينالىق كومەك الۋىنا پايداسىن تيگىزەتىن بولادى. بۇل وڭىرگە جىلدان جىلعا تۋريستەر دە كوپتەپ كەلىپ جاتىر. سول سەبەپتى مەديتسينالىق كومەكتى قاجەت ەتەتىن ادامدار سانى ارتپاسا كەمىمەيدى, – دەگەن زەينەت جاسىنداعى مەدبيكە رايگۇل قۇدايبەرگەنوۆا اۋىل تۇرعىندارىنىڭ اتىنان ءساندى دە ساپالى عيمارات تۇرعىزعان مەردىگەر كومپانيا وكىلدەرىنە العىسىن ءبىلدىردى.
اۋدان اكىمى نۇرباقىت مولداحمەت ۇلى دا ءوز سوزىندە مەديتسينالىق پۋنكتتىڭ اۋىلداعى الەۋمەتتىك ينفراقۇرىلىمدى نىعايتىپ, تۇرعىندارعا كورسەتىلەتىن مەديتسينالىق قىزمەت ساپاسىن ارتتىرۋعا سەپتىگىن تيگىزەتىنىن اتاپ ءوتتى.
