ءتورت-بەس باس بۇزار ۇشايىن دەپ تۇرعان ۇشاققا قارۋ كەزەنىپ باسا كوكتەپ كىرىپتى دە, ونداعىلاردى كەپىلدىككە الىپ, وزدەرىن انا ءبىر مەملەكەتكە اپارۋلارىن تالاپ ەتىپتى. اقىلدىڭ ارقاسىندا كەلىسىپ, تالابىن ورىنداپ, كوپ وتپەي وزدەرىن تۇتقىنداپتى. ويپىر-اي دەسەڭشى, ۇشاقتاعى ءدىن امان بولسا دا ءجۇز قارالى پەندەنىڭ باقانداي ەكى تاۋلىك كورگەن قورلىعىن ايتساڭشى...
ە, ونىڭ جانىندا بىزدەگى جاعدايىمىزعا تاۋبە ەتىپ, شۇكىرشىلىك ايتالىق. زامان تۇزەلەر, ءوز بيلىگىمىز وزىمىزگە بەرىلگەلى وتىز شاقتى جىل... تاريحقا وتىز دەگەنىڭ نە ءتايىرى, ەندى ءبىر شيرەك قانا عاسىردى ارتقا تاستاساق, اناۋ قوي ۇستىنە بوزتورعاي جۇمىرتقالار زاماننىڭ دا توبەسى كورىنەدى ەكەن... جىرتىعىمىز تىگىلەر, تەسىگىمىز بۇتىندەلەر, قاشانعى قالىڭ كوپشىلىك قيىندىقتىڭ قامىتىن كيە بەرەر دەيسىڭ. تەك, انانداي پالەكەتتەن ساقتاسىن, بەتىن اۋلاق!
انەبىر ارالداعى قۋسىرىلعان قۋىقتاي ەلدە, پالەكەت جەر ءدۇمپۋى اي سايىن بولىپ تۇرادى دەي مە!.. پالەكەتتەر سىلكىنىستىڭ دە ء«تىلىن» تاۋىپ العان-اۋ شاماسى. الىپ بارا جاتقان ب ۇلىنۋشىلىك ايتىلا قويمايدى. تابيعاتتىڭ ايتىپ كەلمەس زالالىنا نە شارا؟
ە, ونىڭ قاسىندا بىزدەگى حالىق سانىنىڭ كەمۋى نە ءتايىرى! بىلە بىلگەنگە بۇل دا – تابيعاتتىڭ بۇلدىرگىسى. تۋ كەمىسە, ءسابي شەتىنەسە, جاستار سانالىلىقتىڭ ارقاسىندا بالانى ءبىر-ەكەۋمەن شەكتەسە — امالىڭ قايسى! ادامنىڭ ازايۋى بىردەڭە بولار, انانداي تابيعات اجالىنان امان بولايىق. قۇدايىمىز امان بولسا, كەلەر ۇرپاق كەلە جاتار. تەك تاۋبەمىزدى ۇمىتپاي, بارىمىزعا شۇكىرشىلىك ەتەيىك.
ە, ەڭ الدىمەن مىنا داليعان دالاما شۇكىرشىلىك! قۋىقتاي جەردى يەمدەنىپ مەن دە ەلمىن دەگەننەن ساقتاسىن. ءبىلىم-عىلىمىن ىلگەرى وزدىرىپ, انانى دا جاساپ, مىنانى دا جاساپ, اقىرى سولارىنان قالعان ۋلى قالدىعىن كومەر جەر تاپپاي, ءبىزدى ساعالاپ, اقىرى اكەلەتىن بوپتى. كەڭپەيىلدىلىك قانىمىزدا بار قاسيەت... وسىنشاما جەردى كوزدىڭ قاراشىعىنداي ساقتاپ قالعان اتا-باباعا تاۋبە ەتىپ, شۇكىرشىلىك دەلىك.
ويپىرماي, وتكەندەگى انەبىر تەڭىز جاعاسىنداعى ەلدى جويقىن سۋ شايىپ, قانشاما ەل اڭىراپ, باسپاناسىز باز كەشىپ قالدى...
تىزە بەرسەك, اناۋ شەتەلدەگى ايتىپ وتكەن ماندەگى كەساپاتتار جەتىپ ارتىلادى. ە, ونىڭ جانىنداعى بىزدەگى «مايدا-شۇيدە» نە ءتايىرى.
شىدامدىلىق, كونبىستىك سياقتى قاسيەتتەرىمىزدەن ايىرىلماي, بار-بارىنا «شۇكىرشىلىك» ايتىپ جۇرە بەرەيىك, جۇرتىم...
بەرىك سادىر
