استانا قالاسى اكىمدىگىنىڭ ورتالىقتاندىرىلعان كىتاپحانالار جۇيەسىنە قاراستى №12 كوپشىلىك كىتاپحاناسىندا الاش ارداقتىسى مىرجاقىپ دۋلات ۇلىنىڭ تۋعانىنا 140 جىل تولۋىنا وراي «ۇلت رۋحىنىڭ شامشىراعى» اتتى ءىس-شارا ءوتتى. وندا تاريح عىلىمدارىنىڭ دوكتورى, پروفەسسور, مىرجاقىپتانۋشى مارات ابسەمەت الاش كوسەمى حاقىندا تىڭ دەرەكتەرىمەن ءبولىسىپ, ءدارىس وقىدى.
– جالپى, مىرجاقىپ تاقىرىبىنا قالاي كەلدىڭ دەگەندە, مەن مىرجاقىپ دۋلات ۇلى حاقىندا ەڭ ءبىرىنشى عىلىمي ديسسەرتاتسيا قورعاعان ازاماتپىن. ويتكەنى الاش ارىسىنىڭ ەسىمىن بالا كۇنىمنەن ەستىپ ءوستىم. اتام ابسەمەت سول الاشتىقتارمەن بايلانىستا بولعان ادام. كىشكەنتايىمدا ۇيگە كوپ كىسى كەلەتىن, اكەمنىڭ اقىلىمەن سول شەجىرەلى اقساقالداردان ەسكى تاريحتى ماگنيتوفونعا جازىپ الاتىن بولدىم. قارتتار باياعىنىڭ باتىرلارى, حان كەنە, ءاليحان بوكەيحان تۋرالى ايتا كەلىپ, مىرجاقىپ تاقىرىبىنا دا اۋىساتىن. ءتىپتى ءبىر اقساقال مىرجاقىپتىڭ «باقىتسىز جامال» رومانىنداعى ولەڭ جولدارىن دومبىرامەن ايتىپ شىقتى. مەن وسىعان ەرەكشە تاڭ قالدىم. ول كەزدە الاش ارىستارىنىڭ ەسىمىن اۋىزعا الۋ وتە قيىن ەدى. كەيىن عالىمدىق جولعا بەت بۇرعاندا مىرجاقىپ تاقىرىبىنا بىردەن قىزىعۋشىلىق تانىتتىم, – دەدى مارات ورالباي ۇلى.
ءىس-شاراعا ءبىر توپ ستۋدەنتتەر قاتىسىپ, ويلارىن ورتاعا سالدى. اراكىدىك سۇراقتار قويىلىپ, الاش ارىسىنىڭ ءومىرى ەگجەي-تەگجەيلى سارالاندى. جيىندا ءسوز العان استانا قالاسى «رۋحانيات» مەكەمەسىنىڭ باسشىسى, اقىن ارمان شەريزات ماعىنالى ءدارىس يەسىنە العىس ءبىلدىرىپ, مىرجاقىپقا ارنالعان جىرىن وقىدى. جيىندا پروفەسسور مارات ابسەمەت مىرجاقىپ مۇراسىنىڭ شەتەلدەردە دە كەڭ تانىلعانىن ايتىپ, جاستاردى رۋحتى بولۋعا شاقىردى.
– مىرجاقىپ دۋلات ۇلىنىڭ شىعارمالارى ەرتە كەزدەن شەت ەلدە اۋدارىلىپ, جارىق كورە باستاعان. ءتىپتى تۇركيادا بولعاندا ءبىر اقساقال كەلىپ, تۇرىك تىلىندەگى «باقىتسىز جامال» كىتابىن ۇسىندى. بۇل سوناۋ 30-جىلدارى جارىق كورگەن. مۇستافا كەمال اتاتۇرىك قازاق زيالىلارى ەڭبەگىمەن تانىستى دەگەن دەرەك بار. سونىمەن قاتار جاپون ۋياما توموحيكو 1992 جىلى حوككايدو قالاسىندا مىرجاقىپ دۋلات ۇلى شىعارماشىلىعىنان ديسسەرتاتسيا قورعادى. مىنە, وسىلايشا ارىسىمىزدىڭ اسقاق يدەيالارى باسقا ەلدەردىڭ دە قىزىعۋشىلىعىن تۋدىرعان. سوندىقتان, جاستار, سەندەر رۋحتى بولىڭدار, بىزگە ءدال قازىر ۇلتتىق رۋح اۋاداي قاجەت. رۋح كوتەرۋ ءۇشىن مىرجاقىپتاي اتالارىڭنىڭ كىتاپتارىن وقىڭدار, – دەدى عالىم.
جيىن سوڭىندا مودەراتور جاننا شەريزاتقىزى مارات ورالباي ۇلىنا ريزاشىلىعىن ءبىلدىرىپ, ارنايى العىس حات تابىستادى. سونىمەن بىرگە, قاناتتانعان ستۋدەنتتەر الاش ارىسىنا ارنالعان جىرلارىن وقىپ, لەبىزدەرىن جەتكىزدى.
