ەنەرگەتيكا سالاسىنداعى جەتەكشى كومپانيانىڭ باتىس وڭىرلىك فيليالىنىڭ باس ينجەنەرى بەيبىت باعىتوۆتىڭ ايتۋىنشا, پرەزيدەنتتىڭ تاپسىرماسىنا سايكەس اتىراۋ وبلىسىندا 2023 جىلعى جەلتوقساندا «باتىس قازاقستان ەنەرگيا جۇيەسىن قازاقستان بىرىڭعاي ەلەكتر ەنەرگەتيكالىق جۇيەسىمەن بىرىكتىرۋ» جوباسى قولعا الىنىپتى. جوبانى ىسكە اسىرۋدى الداعى 2027 جىلعى جەلتوقساندا اياقتاۋ كوزدەلىپ وتىر.
«جوبانى ىسكە اسىرۋداعى نەگىزگى ماقسات – باتىس وڭىردەگى ەنەرگەتيكا سالاسىن دامىتۋ ءارى سەنىمدىلىگىن ارتتىرۋ. سونىمەن قاتار ءوندىرىستى وركەندەتۋگە ۇلەس قوسىپ جۇرگەن ونەركاسىپ سالاسىنداعى كومپانيالارى كوپ وڭىرلەردىڭ الەۋمەتتىك-ەكونوميكالىق دامۋىنا ۇزاقمەرزىمدى وڭ ىقپال ەتۋ. بۇل جوبا باتىس ايماقتاعى ەنەرگيا جۇيەسىن بىرىڭعاي ەلەكتر ەنەرگەتيكالىق جۇيەسىمەن بىرىكتىرىپ قانا قويماي, ۇلتتىق ەلەكتر تورابىن نىعايتۋعا, باتىس وڭىرلەردى ەلەكترمەن جابدىقتاۋدىڭ سەنىمدىلىگىن ارتتىرۋعا, ونەركاسىپتىڭ, شاعىن جانە ورتا بيزنەستىڭ ءارى الەۋمەتتىك ينفراقۇرىلىمنىڭ ودان ءارى دامۋىنا سەرپىن بەرەتىن تۇراقتى ەنەرگەتيكالىق نەگىز قالىپتاستىرۋعا مۇمكىندىك بەرەدى. جوبانىڭ اتىراۋ جانە اقتوبە وبلىستارى ءۇشىن ەرەكشە ماڭىزى بار. ويتكەنى بۇل – اتالعان وڭىرلەردى قازاقستاننىڭ بىرىڭعاي ەلەكتر ەنەرگەتيكالىق جۇيەسىمەن تولىققاندى بايلانىستىرۋعا مۇمكىندىك بەرەتىن العاشقى ءارى ەڭ ءىرى ينفراقۇرىلىمدىق جوبا. اسىرەسە اتىراۋ وبلىسى ەلىمىزدەگى نەگىزگى ونەركاسىپتىك ورتالىقتىڭ ءبىرى بولىپ وتىر. سوندىقتان ءىرى كاسىپورىندار مەن شاعىن جانە بيزنەستىڭ تۇراقتى جۇمىسىن وركەندەتۋ, تۇتىنۋشىلاردى ساپالى ەلەكترمەن قامتاماسىز ەتۋ ءۇشىن جەلىلىك ينفراقۇرىلىمى جاقسارعان جوعارى كەرنەۋلى جەلىمەن قامتاماسىز ەتۋدى ماقسات ەتتىك», دەيدى ب.باعىتوۆ.
باس ينجەنەردىڭ دەرەگىنە سۇيەنسەك, اتالعان جوبا اقتوبە وبلىسىنداعى ولكە اۋىلىنان اتىراۋ وڭىرىندەگى قاراباتان ەلدى مەكەنىنە دەيىن 578,2 شاقىرىمدىق اۋە ەلەكتر جەلىسى تارتىلىپ جاتىر. ونىڭ ىشىندە 238,9 شاقىرىمى مۇنايلى ءوڭىردىڭ, ال 339,3 شاقىرىم كورشى وبلىسىندا اۋماعىندا تارتىلادى. ستراتەگيالىق ماڭىزى زور اۋقىمدى جوبانىڭ قۇنى – 208 ملرد تەڭگە.
«جوبا اياسىندا اقتوبە وبلىسىندا ورنالاسقان 500 كۆ قۋاتى بار «ولكە» قوسالقى ستانساسىن كەڭەيتۋ كوزدەلدى. ال اتىراۋ وبلىسىنىڭ ماقات اۋدانىندا 500 كۆ «قاراباتان» قوسالقى ستانساسى سالىنادى. سونىمەن قاتار 500 كۆ «ولكە – قاراباتان» اۋە ەلەكتر جەتكىزۋ جەلىسىن سالۋ كوزدەلدى. جوبا ىسكە قوسىلعاننان كەيىن بۇل نىساندار باتىس وڭىرلەر مەن قازاقستان ەنەرگيا جۇيەسىنىڭ نەگىزگى بولىگى اراسىندا جاڭا ەلەكتر بايلانىسىن قالىپتاستىرادى», دەدى باس ينجەنەر.
قازىر جوبادا كوزدەلگەن جۇمىس كەستەگە سايكەس قارقىندى جۇزەگە اسىرىلىپ جاتىر. «قاراباتان» جانە «ولكە» قوسالقى ستانسالارى ءۇشىن نەگىزگى جوعارى ۆولتتى جابدىقتار, ونىڭ ىشىندە ەلەگازدى اجىراتقىشتار, ايىرعىشتار, 500 كۆ اۆتوترانسفورماتورلار مەن رەاكتورلار جەتكىزىلدى. ال «قاراباتان» قوسالقى ستانساسىنىڭ الاڭىندا قۇرىلىس-مونتاج جۇمىسى جالعاسىپ جاتىر. كورشى وڭىردەگى «ولكە» قوسالقى ستانساسىندا 500 كۆ اشىق تاراتۋ قۇرىلعىسىن كەڭەيتۋگە ارنالعان اۋماقتى دايىنداۋ قولعا الىنىپتى.
«ەكى وبلىستاعى ولكە اۋىلىنان قاراباتان ەلدى مەكەنىنىڭ ارالىعىن جالعايتىن 500 كۆ اۋە ەلەكتر جەتكىزۋ جەلىسىنىڭ بويىندا قۇرىلىس جۇمىسى قارقىندى جۇرگىزىلىپ كەلەدى. وسى كەزگە دەيىن تىرەكتەرگە ارنالعان 4 731 ىرگەتاس جەتكىزىلىپ, ونىڭ 4 156-سى ورناتىلدى. مەتالدان جاسالعان 775 تىرەك ورناتىلاتىن ورنىنا جەتكىزىلدى. اتالعان تىرەكتەردىڭ 619-ى مونتاجدالدى. مۇنداي جۇمىس بىرنەشە ۋچاسكەدە قاتار جۇرگىزىلىپ جاتىر. الداعى كەزەڭدە اتالعان جوبا ەلەكتر جەتكىزۋ جەلىسىن كەزەڭ-كەزەڭىمەن قالىپتاستىرۋعا مۇمكىندىك بەرەدى», دەپ مالىمدەدى ب.باعىتوۆ.
ونىڭ مالىمەتىنە قاراعاندا, اتالعان جوبانى ىسكە اسىرۋ ماقساتىندا اۋە جەلىسىن تارتۋعا 217 ال قوسالقى ستانسا قۇرىلىسىنا 67 ادام, 63 ارنايى تەحنيكا جۇمىسقا تارتىلىپتى. سونداي-اق وتاندىق ءوندىرىستىڭ ءونىمىن كەڭىنەن قولدانۋعا باسىمدىق بەرىلىپ وتىر. ماسەلەن, اۋە جەلىسى ءۇشىن ارالىق جانە انكەرلىك تىرەكتەر پەتروپاۆل قالاسىندا جاسالعان. ال تىرەكتەرگە ارنالعان ىرگەتاستار شىمكەنت شاھارىندا دايىندالعان.
«قاراباتانداعى قوسالقى ستانسانىڭ قۇرىلىس الاڭىنا بىرنەشە قۇرىلعى جەتكىزىلدى. ونىڭ ىشىندە قۋاتى 167 مىڭ كۆا قۇرايتىن اۆتوترانسفورماتوردىڭ ءتورت جيىنتىعى بار. مۇندا 60 مىڭ كۆار شۇنتتاۋشى رەاكتوردىڭ جەتەۋى, باسقارىلاتىن 180 مۆار شۇنتتاۋشى رەاكتوردىڭ بىرەۋى ورناتىلادى. رەاكتورلار مەن اۆتوترانسفورماتورلار – شىمكەنتتەن جەتكىزىلگەن وتاندىق ونىمدەر», دەيدى ب.باعىتوۆ.
اتىراۋ وبلىسى
