17 قاراشادان باستاپ «وتباسى بانك» تۇرعىن ءۇي تولەمدەرىن الۋشىلاردان نەسيە وتىنىمدەرىن قابىلداۋدى باستايدى. ولاردىڭ قاتارىندا قورعانىس مينيسترلىگى, ۇقك, ءىىم, تجم, مەملەكەتتىك كۇزەت قىزمەتى, اسكەري پروكۋراتۋرا جانە باسقا دا ۆەدومستۆولاردىڭ قىزمەتكەرلەرى مەن اسكەري قىزمەتشىلەرى بار.
بانك مالىمەتىنشە, بولىمشەلەرگە ءوز بەتىنشە بارۋدىڭ قاجەتى جوق. نەسيە بەرۋ ۆەدومستۆولاردىڭ وزدەرى جاساقتايتىن تىزىمدەر بويىنشا جۇرگىزىلەدى. قازىرگى ۋاقىتتا «وتباسى بانك» ءتيىستى حاتتاردى جولداعان.
تىزىمدەر جاساقتالعاننان كەيىن تۇرعىن ءۇي تولەمدەرىن الۋشىلار بانك بولىمشەلەرىنە جۇگىنىپ, مەنەدجەر تىزىمدە بار-جوعىن تەكسەرىپ, نەسيە ءوتىنىمىن قابىلدايدى.
جاڭا تۇرعىن ءۇي ساتىپ العىسى كەلەتىندەر ءۇشىن «ناۋرىز اسكەري» باعىتى قاراستىرىلعان. نەسيە مولشەرلەمەسى – 9 پايىز. باعدارلاماعا باستاپقى جارناسىز دا قاتىسۋعا بولادى.
ەگەر باستاپقى جارنا 0–20 پايىز ارالىعىندا بولسا, نەسيە سوماسىنىڭ شەگى:
- استانا مەن الماتى ءۇشىن – 36 ميلليون تەڭگە;
- باسقا وڭىرلەر ءۇشىن – 30 ميلليون تەڭگە.
ال باستاپقى جارنا 20–50 پايىز ارالىعىندا بولسا, بانك نەسيە سوماسىن 80 ميلليون تەڭگەگە دەيىن ارتتىرۋدى جوسپارلاپ وتىر.
«ناۋرىز اسكەري» – «ناۋرىز» باعدارلاماسىنىڭ ءبىر بولىگى. قارجى نارىقتىق شارتتارمەن الەۋمەتتىك وبليگاتسيالار شىعارۋ ارقىلى تارتىلادى, ال مەملەكەت سوڭعى مولشەرلەمەنى سۋبسيديالايدى. جاڭا تۇرعىن ءۇيدى تاڭداۋ, برونداۋ جانە ساتىپ الۋ Baspana Market پورتالىندا (otbasybank.kz) جۇزەگە اسىرىلادى.
ەكىنشى دەڭگەيلى تۇرعىن ءۇي ساتىپ العىسى كەلەتىندەر ءۇشىن «اسكەري باسپانا» باعدارلاماسى قولجەتىمدى. مۇندا نەسيە مولشەرلەمەسى – 18 پايىز, باستاپقى جارنا – 20–50 پايىز, ال نەسيە سوماسىنىڭ شەگى – 50 ميلليون تەڭگە. ءۇيدى باعدارلاما قاتىسۋشىسى ءوزى تاڭدايدى.
