ايتا كەتكەن ءجون, ەكى ەل اراسىنداعى بەرىك ءارى دوستىق بايلانىستاردىڭ سيمۆولى رەتىندە بيىل استانادا «قازاقستان مەن رەسەيدىڭ ماڭگىلىك دوستىق اللەياسى» سالتاناتتى تۇردە اشىلدى. جاقىن ارادا ماسكەۋدە «قازاقستان-رەسەي دوستىعى سكۆەرى» اشىلادى.
«مۋزەيلەر, كىتاپحانالار, تەاترلار, كوركەم گالەرەيالار مەن كينەماتوگرافيستەر اراسىنداعى ىنتىماقتاستىق نىعايىپ كەلەدى. جاستارعا, عىلىم مەن سپورتقا ارنالعان بىرقاتار ورتاق فورۋمداردى وتكىزۋ جوسپارلانعان.
عىلىمي-ءبىلىم بەرۋ سالاسىنداعى ءوزارا ءىس-قيمىلعا ەرەكشە ءمان بەرىلىپ وتىر. جوعارى تەحنولوگيالىق جوبالاردى بىلىكتى ماماندارسىز جۇزەگە اسىرۋ مۇمكىن ەمەس. ءبىلىم بەرۋ – جاساندى ينتەللەكت پەن جاپپاي تسيفرلاندىرۋ داۋىرىندە, باستى كاپيتال – ءبىلىم بولىپ سانالاتىن جاڭا زاماننىڭ زياتكەرلىك ىرگەتاسىن قالىپتاستىرادى», دەپ جازدى پرەزيدەنت ءوز ماقالاسىندا.
مەملەكەت باسشىسىنىڭ ايتۋىنشا, قازىرگى ۋاقىتتا قازاقستاندا رەسەيدىڭ توعىز جەتەكشى جوعارى وقۋ ورنىنىڭ فيليالدارى تابىستى جۇمىس ىستەپ تۇر.
«سوڭعى جىلدارى ءبىلىم سالاسىنداعى ارىپتەستىك جاڭا دەڭگەيگە كوتەرىلدى: استانادا مگيمو فيليالى اشىلدى, ال ومبىدا ءال-فارابي اتىنداعى قازاق ۇلتتىق ۋنيۆەرسيتەتىنىڭ فيليالى ىسكە قوسىلدى. بۇل – شەتەلدىك جوعارى وقۋ ورنىنىڭ رەسەي اۋماعىنداعى العاشقى وكىلدىگى. مۇنىڭ ءوزى تەك كادر دايارلاۋ مەن اكادەميالىق بايلانىستاردى نىعايتۋ ەمەس, سونىمەن قاتار سەنىم مەن شىنايى ستراتەگيالىق جاقىنداسۋدىڭ بەرىك كوپىرى. سونىمەن بىرگە, الماتى قالاسىندا رەسەيدىڭ «سيريۋس» مەكتەبىنىڭ فيليالىن سالۋ تۋرالى ماڭىزدى شەشىم قابىلداندى», دەيدى ەل پرەزيدەنتى.
