ERG Skills International حالىقارالىق كاسىبي شەبەرلىك سايىسى ەلدەگى كادرلىق الەۋەتتى دامىتۋ مەن جۇمىسشى ماماندىقتارىن ناسيحاتتاۋدىڭ ماڭىزدى كەزەڭىنە اينالدى.
شەبەرلىك, تەحنولوگيا, بولاشاق. سايىسقا قاتىسقان 160 ۇمىتكەر مەن ولاردىڭ تالىمگەرلەرى ءوز ماماندىقتارىنا ادالدىقتىڭ ۇلگىسىن كورسەتۋدە وسى يدەيالىق باعىتتاردى ۇستاناتىندارىن بايقاتتى. Eurasian Resources Group كومپانياسى ۇيىمداستىرعان بايقاۋدا وتاندىق تاۋ-كەن جانە مەتاللۋرگيا كەشەنىنىڭ ۇزدىك ماماندارى مەن ستۋدەنتتەرى جانە قىتايدان كەلگەن بىلىكتى قىزمەتكەرلەر ونەر كورسەتتى. اتاپ ايتقاندا, «Qarmet» اق, «التىنالماس اك» اق, «قازاقمىس» توبى, ERG كاسىپورىندارىنىڭ بەلدى ماماندارى بار. اقسۋداعى ءوندىرىس الاڭدارى مەن كاسىپتىك كوللەدجدەر بۇل كۇندەرى كاسىبيلىك, قۇزىرەت پەن وندىرىسكە زاماناۋي كوزقاراستارى بەزبەندەلگەن تارتىس الاڭىنا اينالدى.
ۇيىمداستىرۋشىلار اتاپ كورسەتكەندەي, بايقاۋ جۇمىسشى ماماندىقتار سالاسىنداعى كاسىبيلىكتىڭ ەتالونى سانالاتىن – WorldSkills ستاندارتتارى بويىنشا وتكىزىلدى. قۇيۋ ءىسى, دانەكەرلەۋ تەحنولوگيالارى, تەمىر جونۋ مەن سلەسارلىق, ونەركاسىپ اۆتوماتيكاسى, ەلەكترومونتاج, CAD ينجەنەرلىك گرافيكاسى, زەرتحانالىق-حيميالىق تالداۋ, ەڭبەكتى قورعاۋ مەن تاۋ-كەن ءىسى, ماركشەيدەرلىك, پايدالى قازبانى بايىتۋ, ساندىق باسقارۋ قوندىرعىسى بار ستانوك وپەراتورى سىندى 13 نەگىزگى قۇزىرەت بويىنشا وتكەن جارىستار 5 كۇنگە جالعاستى. ءبىلىم بەرۋ باعىتىنا ەرەكشە نازار اۋدارىلدى. ERG مەن كوللەدجدەر اليانسى, سونداي-اق باسقا دا وقۋ ورىندارىنىڭ وكىلدەرى, ۇزىن سانى 15 كوللەدج بەن ۋنيۆەرسيتەت وكىلدەرى قاتىستى. بۇل قاتاردان رۋدنىي يندۋستريالدىق ينستيتۋتى, تورايعىروۆ ۋنيۆەرسيتەتى, اقتوبە جوعارى پوليتەحنيكالىق كوللەدجى, اقسۋ قارا مەتاللۋرگيا كوللەدجىن بولە-جارا ايتۋعا بولادى. بايقاۋعا قاتىسقان ستۋدەنتتەر جوعارىدا اتالعان وقۋ ورىندارى قازاقستاننىڭ تاۋ-كەن مەتاللۋرگيا كەشەنىنە بىلىكتى ماماندار دايىنداپ وتىرعانىن تاعى ءبىر مارتە دالەلدەدى.
ء«بىزدىڭ كومپانيا كادرلاردى دايارلاۋ ەكوجۇيەسىن جۇيەلى تۇردە دامىتىپ كەلەدى. مەكتەپ قابىرعاسىندا كاسىبي باعدار بەرۋدەن باستاپ, كوللەدجدەر مەن جوعارى وقۋ ورىندارىنداعى, سونداي-اق ءبىزدىڭ كورپوراتيۆتىك ۋنيۆەرسيتەتىمىزدەگى وقىتۋ باعدارلامالارىن تۇگەل قامتيمىز. ERG Skills International سايىسىن وتكىزۋ – اتالعان ەكوجۇيەنىڭ تاعى ءبىر ءتيىمدى ەلەمەنتى. بۇل تەك جەكە ماماندار ءۇشىن عانا ەمەس, بۇكىل سالا ءۇشىن ماڭىزدى ەكەنىنە سەنىمدىمىن. ول ەڭبەك ستاندارتتارىن جوعارىلاتىپ, جاس مامانداردىڭ كاسىبي قۇزىرەتتەرىن دامىتۋعا ىقپال ەتەدى», دەيدى ERG-ءدىڭ قازاقستانداعى باس ديرەكتورى سەرىك شاحاجانوۆ.
ءوز شەبەرلىگىن دالەلدەۋگە بەل بۋعان قاتىسۋشىلار اراسىندا «قازاقستان ءاليۋمينيى» اق ەلەكتر ستانساسىنىڭ 19 جاستاعى قىزمەتكەرى قايسار داۋلەتباي دا بار. ول «توكارلىق ءىس» قۇزىرەتىندە شەبەرلىگىن كورسەتكەن.
«بۇگىنگى بايقاۋدا ءبىزدىڭ كوماندامىز ساتتىلىككە سەنىپ, قولدان كەلگەن شەبەرلىكتەرىن پاش ەتتى. جارىس شارتتارىنا سايكەس, سىزبالار بويىنشا تاپسىرمالاردى ورىنداپ, جاڭا بولشەكتەر شىعاردىق. بىلتىر مەن WorldSkills پاۆلودار – 2024 وڭىرلىك چەمپيوناتىنىڭ جەڭىمپازى, سونداي-اق EnergySkills جۇلدەگەرى اتاندىم. بيىلعى حالىقارالىق باسەكەدە دە ۇزدىكتەر قاتارىنان كورىنىپ وتىرمىن», دەيدى جىگەرلى جاس.
ERG Service كومپانياسىنىڭ سبب توكارى دميتري گۋسەۆ بايقاۋ كەزىندەگى ەرەجەلەر جوعارى دالدىكتى جانە وڭدەۋ تەحنولوگياسىن تەرەڭ مەڭگەرۋدى تالاپ ەتكەنىن جەتكىزدى.
«جاڭا بۋىنداعى زاماناۋي سبب توكارلىك ستانوگىندا جۇمىس ىستەۋ اسىرەسە, قىزىقتى بولدى. ونى شەكتەۋلى ۋاقىت ىشىندە يگەرۋ ناعىز سىناققا اينالدى. بىراق ءدال وسىنداي مىندەتتەر كاسىبي دامۋعا جانە ءوز قابىلەتىڭدى ارتتىرۋعا سەنىمدىلىك بەرەدى. ERG Skills International-داعى جەڭىس – تەك جەكە كۇش-جىگەردىڭ عانا ەمەس, سونىمەن قاتار ارىپتەستەرىمنىڭ جانە ءوسۋ ءۇشىن بارلىق جاعدايدى جاساپ وتىرعان كومپانيانىڭ تۇراقتى قولداۋىنىڭ ناتيجەسى», دەدى دميتري گۋسەۆ.
قىتايدىڭ شانسي ەنەرگەتيكالىق كاسىپتىك-تەحنيكالىق كوللەدجىنەن قاتىسقان 2-كۋرس ستۋدەنتى حوۋ يۋ حان اسپاناستى ەلىنەن 4 بىردەي ۇمىتكەر ونەر كورسەتكەنىن جەتكىزدى. ايتۋىنشا, بۇل بايقاۋعا قاتىسا وتىرىپ ول ءوزىنىڭ كاسىپتىك داعدىلارىنداعى كەمشىلىكتەرىن اڭعارىپتى.
«مەن ءۇشىن بۇل بايقاۋ ۇلكەن تاجىريە الاڭى بولدى. بارلىق جاعىنان ۇيرەنگەن ىستەرىم كوپ. تاجىريبەم ءالى دە از ەكەنىن بايقادىم. قىتايدان كەلگەن وزگە قاتىسۋشىلار ماعان قاراعاندا لايىقتىراق ونەر كورسەتتى دەپ ويلايمىن», دەيدى ول.
بايقاۋ قورىتىندىسىندا «تاۋ-كەن ءىسى», «CAD ينجەنەرلىك گرافيكاسى», «حيميالىق تالداۋ زەرتحاناشىسى», «قۇيۋ ءوندىرىسى», «ماركشەيدەرلىك ءىس جانە گەودەزيا», «پايدالى قازبانى بايىتۋ», «ەڭبەكتى قورعاۋ», «ونەركاسىپتىك اۆتوماتيكا», «دانەكەرلەۋ تەحنولوگيالارى», «سلەسارلىك ءىس», «توكارلىك ءىس», «سبب توكارلىك ءىسى», «ەلەكترومونتاج» قۇزىرەتتەرى بويىنشا ۇزدىكتەر انىقتالدى.
جالپى, ERG Skills كاسىبي شەبەرلىك بايقاۋى 2023 جىلدان بەرى جىل سايىن تۇراقتى وتكىزىلىپ كەلە جاتىر. ال ERG Skills International كاسىبي شەبەرلىك كونكۋرسىن وتكىزۋ كومپانيانىڭ تەحنيكالىق جانە كاسىپتىك ءبىلىم بەرۋ جۇيەسىن جاڭعىرتۋداعى, سونداي-اق وتاندىق تاۋ-كەن-مەتاللۋرگيا كەشەنى ءۇشىن كادرلار دايارلاۋدىڭ ۇزدىك حالىقارالىق تاجىريبەلەرىن ىلگەرىلەتۋدەگى كوشباسشىلىعىن راستادى. ءىس-شارا وندىرىستىك كاسىپورىندار مەن ءبىلىم بەرۋ ۇيىمدارى اراسىنداعى ىنتىماقتاستىقتى نىعايتۋدا, كاسىبي قۇزىرەتتىلىكتى دامىتۋعا جانە جۇمىسشى كاسىپتەرىن تانىمال ەتۋگە ىقپال ەتەتىن ماڭىزدى قادام بولدى.
پاۆلودار وبلىسى
اقسۋ قالاسى
