فوتو: pinterest.com
ينۆەستيتسيالاۋ پايدا تابۋ نەمەسە اكتيۆتەردىڭ قۇنىن ارتتىرۋ ماقساتىندا جۇزەگە اسادى. مۇنى ەكى جولمەن باستاۋعا بولادى: كاسىبي بروكەر ارقىلى شوت اشىپ, ءوز بەتىمەن شەشىم قابىلداۋ نەمەسە ينۆەستيتسيالىق پاي قورىنىڭ پايلارىن ساتىپ الىپ, قاراجاتتى باسقارۋدى كومپانياعا تاپسىرۋ.
بروكەرلىك قىزمەتتەردى تەك قارجى نارىعىن رەتتەۋ جانە دامىتۋ اگەنتتىگىنىڭ (قنردا) ليتسەنزياسى بار ۇيىمدار ۇسىنا الادى. بۇل ينۆەستوردىڭ قۇقىقتىق تۇرعىدان قورعالۋىن قامتاماسىز ەتەدى. رەسمي ءتىزىم www.gov.kz سايتىندا جاريالانعان. ال ليتسەنزياسى جوق كومپانيالارمەن ارەكەتتەسۋ ازاماتتاردى تاۋەكەلگە ۇرىندىرادى. «قىسقا مەرزىمدە جوعارى كىرىس» ۋادەسى – كوبىنە الاياقتىقتىڭ بەلگىسى.
بۇگىندە قازاقستاندا بروكەرلىك شوتتار سانى 4 ميلليوننان استى. بۇل حالىقتىڭ قارجى نارىعىنا دەگەن قىزىعۋشىلىعى ارتقانىن كورسەتەدى. قنردا ازاماتتاردىڭ قۇقىقتارىن قورعاۋ جانە اشىقتىقتى ارتتىرۋ باعىتىندا جۇيەلى شارالار اتقارىپ جاتىر.
بىرىنشىدەن, بروكەرلەر ءار كليەنتتىڭ تاۋەكەل-بەيىنىن باعالاۋعا مىندەتتى. ينۆەستورلار «بىلىكتى» جانە «بىلىكتىلىگى جوق» ساناتتارعا بولىنەدى. كاسىبي سەرتيفيكاتى بار نەمەسە زاڭمەن بەلگىلەنگەن اكتيۆ يەلەرى كەڭەيتىلگەن قارجى قۇرالدارىنا قول جەتكىزە الادى.
ەكىنشىدەن, اگەنتتىك باعالى قاعازدار نارىعىنداعى ايلا-شارعى مەن جاساندى باعا بەلگىلەۋگە قارسى تۇراقتى مونيتورينگ جۇرگىزەدى. مىسالى, اكتسيا قۇنىن ادەيى كوتەرۋ نەمەسە جالعان اقپارات تاراتۋ سەكىلدى ارەكەتتەر ءۇشىن اكىمشىلىك جاۋاپكەرشىلىك قاراستىرىلعان.
ۇشىنشىدەن, ليتسەنزياسى جوق دەلدالدارمەن كۇرەس كۇشەيتىلدى. بۇل – ازاماتتاردى «كەپىلدى تابىس» ۋادە ەتەتىن جالعان ونلاين-پلاتفورمالار مەن قارجى پيراميدالارىنان قورعاۋدىڭ ماڭىزدى تەتىگى.
مامانداردىڭ ايتۋىنشا, قارجىلىق ساۋات پەن ينۆەستيتسيالىق مادەنيەت ەل ەكونوميكاسىنىڭ تۇراقتىلىعىنا دا, جەكە ءال-اۋقاتقا دا اسەر ەتەدى.
ء«ار ازامات نارىق تەتىكتەرىن دۇرىس ءتۇسىنىپ, شەشىمىن سانالى قابىلداسا, قارجى جۇيەسى دە بەرىك بولا تۇسەدى», دەيدى ساراپشىلار.
