جاڭا ءۇي بالپىق بي اۋىلىندا بوي كوتەرىپ, ونىڭ كىلتتەرى 15 دارىگەرگە, 4 مۇعالىمگە جانە ءبىر پوليتسەيگە تابىستالدى. سوڭعى ءۇش جىلدا اۋدانعا 55 دارىگەر كەلگەن, ولاردىڭ بارلىعىنا جاعداي جاسالىپ, 10 ميلليون تەڭگە كولەمىندە كوتەرمە جاردەماقى بەرىلۋدە.
ءوڭىر باسشىسى بەيبىت يساباەۆ جۇمىس ساپارى بارىسىندا جاڭا ءۇيدى ارالاپ, اباتتاندىرۋ مەن ينفراقۇرىلىم جۇمىستارىنىڭ ساپاسىنا نازار اۋداردى.
– اۋدانعا كەلگەن ماماندارعا قولايلى جاعداي جاساۋ – ەڭ باستى مىندەت. بۇل ءۇي دارىگەرلەر مەن مۇعالىمدەرگە ارنالعان العاشقى قادام عانا. بولاشاقتا وسىنداي بىرنەشە كوپقاباتتى تۇرعىن ءۇي سالۋ جوسپارلانىپ وتىر, – دەدى وبلىس اكىمى.
قونىستانۋشىلاردىڭ اراسىندا نەۆروپاتولوگ نۇرگۇل بۋحاروۆا, پوليتسەي ەلامان داۋلەتوۆ جانە مۇعالىم ءمولدىر جەڭىس بار. ولار جاڭا پاتەرگە يە بولىپ, مەملەكەت قامقورلىعىنا ريزاشىلىقتارىن ءبىلدىردى.
قۇرىلىس بيىل ءساۋىر ايىندا باستالىپ, نەبارى بىرنەشە ايدا تولىق اياقتالعان. ءۇيدىڭ اينالاسى اباتتاندىرىلىپ, ينجەنەرلىك جەلىلەر تارتىلعان.
جالپى 2022–2024 جىلدارى كوكسۋ اۋدانىندا 175 ءۇي پايدالانۋعا بەرىلسە, بيىل تاعى 110 وتباسى جاڭا باسپاناعا قول جەتكىزدى. بۇل اۋدان بويىنشا تۇرعىن ءۇي كەزەگىن 5,8 پايىزعا قىسقارتۋعا مۇمكىندىك بەرمەك.
