شىعارماشىلىق دايىندىقتى تالاپ ەتەتىن ءبىلىم بەرۋ باعدارلامالارىنىڭ توپتارى بويىنشا بەيىندى ماگيستراتۋراعا تۇسۋشىلەردەن قۇجاتتاردى قابىلداۋ اعىمداعى جىلعى 28 قازان مەن 10 قاراشا ارالىعىندا جوعارى جانە (نەمەسە) جوعارى وقۋ ورنىنان كەيىنگى ءبىلىم بەرۋ ۇيىمدارىندا وتەدى. تەستىلەۋدىڭ ءوزى قاراشا-جەلتوقسان ايلارىندا وتەدى. ءوتىنىش بەرۋ كەزىندە ءتۇسۋشى تەستىلەۋدى تاپسىرۋ قالاسىن ءوز ەركىمەن تاڭدايدى. تۇسۋشىلەر وتىنىشتەردى قابىلداۋ مەرزىمى اياقتالعانعا دەيىن (10 قاراشاعا دەيىن) ءبىلىم بەرۋ باعدارلامالارىنىڭ توبى, ءتىلى جانە تەستىلەۋدى تاپسىرۋ قالاسىن وزگەرتۋ بويىنشا وتىنىشكە وزگەرىستەر ەنگىزە الادى. وتىنىشتەردى قابىلداۋ بازاسى جابىلعاننان كەيىن تاڭدالعان ءبىلىم بەرۋ باعدارلامالارىنىڭ توبى مەن تەستىلەۋ تاپسىرۋ قالاسى وزگەرتىلمەيدى. تەستىلەۋدى وتكىزۋ كۇنى تۋرالى اقپارات ءتۇسۋشىنىڭ جەكە كابينەتىندە الداعى 14 قاراشادا بەلگىلى بولادى.
عىلىمي-پەداگوگيكالىق ماگيستراتۋراعا ءتۇسۋ ءۇشىن كەشەندى تەستىلەۋ ەلەكتروندىق فورماتتا وتكىزىلەدى جانە ءۇش بولىمنەن تۇرادى: شەت ءتىلى بويىنشا تەست, وقۋعا دايىندىعىن انىقتاۋعا ارنالعان تەست جانە ءبىلىم بەرۋ باعدارلامالارى توبىنىڭ بەيىنى بويىنشا تەست. تەستىلەۋگە 3 ساعات 55 مينۋت بەرىلەدى. شەكتى بالل – 75 بالل, ونىڭ ىشىندە شەت ءتىلى بويىنشا كەمىندە 25 بالل, وقۋعا دايىندىعىن انىقتاۋعا ارنالعان تەست بويىنشا كەمىندە 7 بالل, ءبىلىم بەرۋ باعدارلامالارى توبىنىڭ بەيىنى بويىنشا: ءبىرىنشى بەيىندى پاننەن كەمىندە 7 بالل, ەكىنشى بەيىندى پاننەن كەمىندە 7 بالل.
بەيىندى ماگيستراتۋراعا تۇسۋشىلەر تەك ءبىلىم بەرۋ باعدارلامالارى توبىنىڭ بەيىنى بويىنشا تەست تاپسىرادى. شەكتى بالل كەمىندە 30 بالل, ونىڭ ىشىندە ءبىرىنشى بەيىندى پاننەن كەمىندە 7 بالل, ەكىنشى بەيىندى پاننەن كەمىندە 7 بالل.
دوكتورانتۋراعا ءتۇسۋ ەمتيحانىن تاپسىرۋعا ءوتىنىش بەرۋ 2025 جىلعى 10 قاراشاعا دەيىن جالعاسادى. دوكتورانتۋراعا تۇسۋشىلەر دتە-گە قاتىسۋ ءۇشىن ءوتىنىش بەرگەنگە دەيىن جوعارى جانە (نەمەسە) جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ قابىلداۋ كوميسسياسىنا قۇجاتتاردى تاپسىرۋى قاجەت. دوكتورانتۋراعا ءتۇسۋ ءۇشىن قازتەست جۇيەسى بويىنشا مەملەكەتتىك ءتىلدى مەڭگەرگەنىن راستايتىن سەرتيفيكات جانە شەت ءتىلىن مەڭگەرگەنىن راستايتىن سەرتيفيكات ۇسىنۋ قاجەت. TOEFL ITP سەرتيفيكاتى بار تۇلعالار دتە باستالعانعا دەيىن اعىلشىن ءتىلىن بىلۋگە ارنالعان قوسىمشا تەستىلەۋدى تاپسىرادى.
ءتۇسۋ ەمتيحانى جەلتوقسان ايىندا وتەدى. ەگەر تۇسۋشىگە بەرىلگەن وتىنىشكە (تەستىلەۋدى تاپسىرۋ قالاسى, ءبىلىم بەرۋ باعدارلامالارىنىڭ توبى) وزگەرىستەر ەنگىزۋ قاجەت بولعان جاعدايدا, وعان وتىنىشتەردى قابىلداۋ بازاسى جابىلعانعا دەيىن (10 قاراشاعا دەيىن) ءوتىنىشتى وڭدەۋگە نەمەسە وشىرۋگە مۇمكىندىك بەرىلەدى. قوسىمشا تەستىلەۋدى وتكىزۋ ورنى, كۇنى مەن ۋاقىتى تۋرالى اقپارات ءتۇسۋشىنىڭ جەكە كابينەتىندە اعىمداعى جىلعى 14 قاراشادا, ءتۇسۋ ەمتيحانى بويىنشا اقپارات 27 قاراشادا بەلگىلى بولادى.
فيلوسوفيا دوكتورلارى (رhD) باعدارلاماسى بويىنشا دوكتورانتۋراعا ءتۇسۋ ەمتيحانىنا اڭگىمەلەسۋ, ەسسە جازۋ جانە ءبىلىم بەرۋ باعدارلاماسى توبىنىڭ بەيىنى بويىنشا ەمتيحان كىرەدى. بەيىنى بويىنشا دوكتورلار باعدارلاماسى بويىنشا, ونىڭ ىشىندە يندۋستريالىق PhD باعدارلامالارى بويىنشا دوكتورانتۋراعا ءتۇسۋ ەمتيحانى اڭگىمەلەسۋ جانە ءبىلىم بەرۋ باعدارلامالارى توبىنىڭ بەيىنى بويىنشا ەمتيحان سۇراقتارى بولىمدەرىنەن تۇرادى. مەملەكەتتىك ءبىلىم بەرۋ تاپسىرىسى بويىنشا فيلوسوفيا دوكتورلارى (رhD) باعدارلاماسى بويىنشا دوكتورانتۋراعا ءبىلىم الۋ ءۇشىن ءتۇسۋ ەمتيحانىنان كەمىندە 75 بالل, بەيىنى بويىنشا دوكتورلار باعدارلاماسى بويىنشا, ونىڭ ىشىندە يندۋستريالىق PhD باعدارلامالارى بويىنشا دوكتورانتۋراعا – كەمىندە 50 بالل جيناعان تۇلعالار كونكۋرستىق نەگىزدە قابىلدانادى.
جالپى, كەشەندى تەستىلەۋگە ءوتىنىش بەرۋ 2025 جىلعى 10 قاراشاعا دەيىن جالعاسادى.
