قالا بيلىگى مەرزىمىندە ورىندالماعان, ياكي ستاندارتتاردى ساقتامايتىن, ءوز مىندەتىن ورىندامايتىن كومپانيالاردى جۇمىسقا ارالاستىرماۋدى كوزدەپ وتىر. باقىلاۋدى كۇشەيتۋمەن قاتار, رەسپۋبليكا دەڭگەيىندە ساتىپ الۋ ەرەجەلەرىنە وزگەرىستەر ەنگىزىلدى, بۇل كەزدەيسوق كومپانيالاردى تەندەرگە جولاتپاۋعا سەپتىگىن تيگىزبەك. سونىمەن قاتار, سەنىمسىز جەتكىزۋشىلەرگە ايىپپۇل سالىپ, شەكتەۋدى قاتاڭداتۋدى كوزدەيتىن ۇسىنىس جاساپ جاتىر. وڭىرلىك كوممۋنيكاتسيالار قىزمەتىندەگى ءباسپاسوز ءماسليحاتىندا وسىنداي وي ايتىلدى.
ء«بىز ادال بيزنەسكە بارىنشا جاعدايدى جاسايمىز. الماتىدا ادال مەردىگەرلەر جۇمىس ىستەۋى كەرەك. مىندەتتەمەسىن مەرزىمى, ساپاسى جاعىنان بولسىن, مەجەلى ۋاقىتىندا ورىندامايتىن كەز كەلگەن كومپانيانى قوشتامايمىز. اقشا تاۋىپ, جۇمىسىنا ءجۇردىم-باردىم قارايتىن مەردىگەرلەر بۇل جەردە تابىس تابا المايدى. ولارعا تالاپ كۇشەيەدى. بىراق ادال بيزنەستى ءبىز ءاردايىم قولدايمىز», — دەدى قالا اكىمىنىڭ ورىنباسارى ولجاس سماعۇلوۆ.
بيىلعى 9 ايدا الماتىدا بىرىڭعاي ساتىپ الۋلاردى ۇيىمداستىرۋشى جالپى سوماسى 752,6 ميلليارد تەڭگەگە 1 274 بايقاۋ وتكىزگەن. ونىڭ 491 ميلليارد تەڭگەسى قۇرىلىس پەن ينفراقۇرىلىمدىق جۇمىستارعا تيەسىلى. بىراق مەردىگەردىڭ كەيبىرى ءىستى يگەرە الماي, تاپسىرىستى ءۇشىنشى بىرەۋگە وتكىزىپ, جۇمىسقا كەسىرىن تيگىزگەن. بيلىك مۇنداي كومپانيالاردىڭ بولاشاقتاعى بايقاۋعا قاتىسۋىنا شەكتەۋ قويىپ, باقىلاۋدى كۇشەيتە تۇسپەك.
«بيىل ءبىزدى مىندەتىن دۇرىس ورىنداماعان مەردىگەرلەر ءبىراز اۋرەلەدى. بۇعان تەندەردە كومپانيالاردىڭ جالپى تاجىريبەسى ەسكەرىلىپ, نىساننىڭ كۇردەلىلىگىن سارالاماعانى سەبەپ بولعان. بۇرىن شاعىن جۇمىس ىستەگەن كومپانيالار ۇلكەن جوبالاردى جەڭىپ الدى. مينيسترلىك كەيىن ەرەجەگە وزگەرىس ەنگىزدى: ەندى تاجىريبەگە سارالانعان ءتاسىل قولدانىلىپ, مەملەكەتتىك ساتىپ الۋعا قاتىسۋى ناقتى ەسكەرىلەتىن بولادى», — دەدى مەملەكەتتىك اكتيۆتەر باسقارماسىنىڭ باسشىسى ەركىنبەك امىرعاليەۆ.
وسى ورايدا الماتى قالاسى قارجى مينيسترلىگىنە تومەندەگىدەي ۇسىنىستارىن ءبىلدىردى.
قۇرىلىس جۇمىسى بويىنشا اۆانستىق تولەمدى تاپسىرىس بەرۋشىنىڭ قۇقىعى رەتىندە قاراستىرۋ (قازىرگى كەزدە بۇل مىندەتتى شارت),
سەنىمسىز جەتكىزۋشىنىڭ تىزىمىندە بولۋدى 2 جىلدان 3 جىلعا دەيىن ۇزارتۋ.
وعان قوسا قازىرگى كەزدە ايىپپۇل كولەمى تەك 0,01% بولعاندىقتان, بۇل تيىمسىزدەۋ بولىپ تۇر. سوندىقتان الماتى بيلىگى ونى شارت سوماسىنىڭ 25%-عا دەيىن ۇلعايتۋدى ويلاستىرىپ وتىر.
«بيۋدجەتتىڭ ءار تەڭگەسى ءتيىمدى جۇمسالۋى ءتيىس, بۇل قاعيدا الماتىدا ناقتى جۇمىس ىستەپ تۇر», - دەيدى اكىمدىك وكىلدەرى.
