فوتو: عىلىم جانە جوعارى ءبىلىم مينيسترلىگى
پرەزيدەنت جاريالاعان «جۇمىسشى ماماندىقتارى جىلى» باستاماسىنا ارنالعان سەسسياعا مەملەكەتتىك ورگانداردىڭ, بيزنەس قاۋىمداستىعى مەن اكادەميالىق ورتا وكىلدەرى قاتىستى.
«بۇگىندە ءبىز ءبىلىم بەرۋ جۇيەسى مەن ەڭبەك نارىعى اراسىنداعى جۇيەلى بايلانىستى قالىپتاستىرىپ كەلەمىز. اسىرەسە ەنەرگەتيكا سياقتى ستراتەگيالىق ماڭىزى بار سالالار ءۇشىن بۇل باعىت وتە وزەكتى. عىلىم جانە جوعارى ءبىلىم مينيسترلىگى ۋنيۆەرسيتەتتەرمەن جانە جۇمىس بەرۋشىلەرمەن بىرلەسە وتىرىپ, تسيفرلاندىرۋ مەن «جاسىل» تەحنولوگيالاردى ەنگىزۋ جاعدايىندا جۇمىس ىستەي الاتىن جاڭا بۋىن مامانداردى دايارلاۋعا باعىتتالعان جاڭا ءبىلىم بەرۋ باعدارلامالارىن ازىرلەپ جاتىر», دەدى عىلىم جانە جوعارى ءبىلىم ءمينيسترى ساياسات نۇربەك.
نازارباەۆ ۋنيۆەرسيتەتىنىڭ پرەزيدەنتى, دوكتور ۆاكار احماد ەنەرگەتيكا سالاسىنىڭ بولاشاعىن قالىپتاستىرۋدا تەحنيكالىق جانە كاسىبي ءبىلىم بەرۋدىڭ ءرولىن اتاپ ءوتىپ, مەملەكەت, بيزنەس جانە جوعارى وقۋ ورىندارىنىڭ تىعىز ىنتىماقتاستىعىنىڭ ماڭىزدىلىعىن ەرەكشە اتاپ ءوتتى.
سونداي-اق قاتىسۋشىلار قازاقستان ەنەرگەتيكا سالاسىنىڭ بولاشاعى ادامي كاپيتالدىڭ دامۋىنا تىكەلەي بايلانىستى ەكەنىن, ال مەملەكەت, بيزنەس جانە ءبىلىم بەرۋ اراسىنداعى ءتيىمدى سينەرگيا ەلدىڭ ورنىقتى ءارى يننوۆاتسيالىق دامۋىن قامتاماسىز ەتەتىنىن اتاپ ءوتتى.
