سۋرەتتى تۇسىرگەن – ەرلان ومار, «ەQ»
ەلىمىزدە كەيىنگى جىلدارى ءبىلىم بەرۋ سالاسىنىڭ قىزمەتكەرلەرىنە ايرىقشا كوڭىل بولىنە باستادى. مۇنى «پەداگوگ مارتەبەسى تۋرالى» زاڭىنىڭ قابىلدانۋىنان باستاپ, جالاقىنىڭ جۇيەلى جانە تۇراقتى ارتتىرۋىنان, الەۋمەتتىك كومەكتەردى قاراستىرۋ, پەداگوگيكالىق ماماندىقتارىندا وقيتىن ستۋدەنتتەرگە وزگەلەرگە قاراعاندا ارتىعىراق ستيپەنديا تولەۋ, سانات بويىنشا قوسىمشا ۇستەماقىلاردىڭ ەنگىزىلۋى, ۇدايى تەگىن وقىتىپ وتىرۋ سەكىلدى كەشەندى قولداۋدىڭ ىسكە اسىرىلۋىنان كورە الامىز.
بۇل ماماندىقتىڭ ماڭىزى, سالماعى ونىڭ جاۋاپكەرشىلىگىندە بولسا كەرەك. سەبەبى ول – تۇلعا قالىپتاستىرۋشى, ۇرپاق بولمىسىنىڭ باعبانى. سوندىقتان دا قاي كەزدە بولسىن قوعام مۇعالىمنەن بالاعا بەرەتىن بىلىممەن قاتار دۇرىس تاربيەلەۋدى كۇتەدى. سەبەبى ۇرپاق تاربيەسى اتا-انا مەن پەداگوگتىڭ قولىندا. وسى جاۋاپكەرشىلىك جۇگى مەملەكەت باسشىسى يدەياسىمەن قولعا الىنعان «ادال ازامات» ءبىرتۇتاس تاربيە باعدارلاماسىندا ايقىندالىپ وتىر. باستى مىندەت – جاس ۇرپاقتىڭ ساناسىنا ۇلتتىق جانە جالپىادامزاتتىق قۇندىلىقتاردى ءسىڭىرۋ, ولاردى وتانشىل رۋحتا تاربيەلەپ, جاڭاشىلدىق پەن جاسامپازدىققا باۋلۋ.
