ينۆەستيتسيالىق باعدارلامانى ىسكە اسىرۋ شەڭبەرىندە جۇرگىزىلگەن, قۇنى 4 ميلليارد تەڭگەدەن اساتىن قوسالقى ستانسا قۇرىلىسىندا قۇرىلىس-مونتاج جۇمىسى تولىعىمەن اياقتالىپ, پايدالانۋعا بەرىلدى. جاڭا ستانسادا وزىق حالىقارالىق ستاندارتتارعا سايكەس كەلەتىن زامانعا ساي جابدىقتار ورناتىلعان.
– جوبا بويىنشا مۇندا 2ح10 مۆا قۋات ترانسفورماتورلارى قاراستىرىلعان. سونداي-اق جاڭا نىساندا «موەك» اق وڭىرلىك ورتالىعىنىڭ ديسپەتچەرلىك قالقانىنا دەرەكتەردى بەرە وتىرىپ, قوسالقى ستانسانىڭ مونيتورينگى مەن باسقارۋ جۇيەسى ەنگىزىلدى. بۇل ناقتى ۋاقىت رەجىمىندە جەدەل اقپاراتتى, تەلەولشەمدەردىڭ اعىمداعى ماندەرىن, كوممۋتاتسيالىق اپپاراتتاردىڭ جاي-كۇيىن كورسەتۋگە, سونداي-اق جەلىنىڭ جاعدايىن باعالاۋدى ورىنداۋعا مۇمكىندىك بەرسە, ال ول ءوز كەزەگىندە ەلەكتر قۋاتىن ءبولۋ مەن تۇتىنۋدىڭ ناقتى ەسەبىن جۇرگىزۋگە مۇمكىندىك بەرەدى, – دەيدى «ماڭعىستاۋ وڭىرلىك ەنەرگوكومبيناتى» اق دامۋ جانە قامتاماسىز ەتۋ جونىندەگى باسقارما توراعاسىنىڭ پايدالانۋ جونىندەگى ورىنباسارى مۇرات يمانوۆ.
سايىن شاپاعاتوۆ اۋىلىنىڭ تۇتىنۋشىلارىن ەلەكترمەن جابدىقتاۋدى «اقشۇقىر» پس-110/10 كۆ, «اۋەجاي» پس-110/10 كۆ ەكى قوسالقى ستانساسى جۇزەگە اسىرادى. اۋىلدا شاعىن جانە ورتا بيزنەس نىساندارى, جاڭا تۇرعىن ۇيلەر مەن الەۋمەتتىك نىسانداردىڭ اشىلۋىنا بايلانىستى ەلەكتر جەلىلەرىنە تۇسەتىن جۇكتەمەنىڭ ارتۋى بايقالدى. بۇل جاعدايلار «موەك» اق-نا جاڭا قوسالقى ستانسا سالۋ قاجەتتىگىن اڭعارتقان بولاتىن. ناتيجەسىندە, كەشە عانا حالىق يگىلىگىنە بەرىلگەن قوسالقى جاڭا ستانسا اشىلدى. ستانسا تۇرعىندار سانى ءالى دە ارتا تۇسەتىن اۋىلعا بارىنشا قاجەتتى نىسانداردىڭ ءبىرى.
ماڭعىستاۋ وبلىسى
