جاساندى ينتەللەكت كومەگىمەن جۇمىس ىستەيتىن پلاتفورما ادامنىڭ جۇرەك-قان تامىرلارى جۇيەسىندەگى اۋىتقۋلاردى دەر كەزىندە انىقتاپ, ونىڭ قاۋىپتىلىك دەڭگەيىن اۆتوماتتى تۇردە باعالاي الادى. سونداي-اق مەديتسينا قىزمەتكەرلەرىنىڭ جۇمىسىن جەڭىلدەتۋگە سەپتىگىن تيگىزەدى.
عىلىم جانە جوعارى ءبىلىم مينيسترلىگى تاراتقان اقپاراتىنا سۇيەنسەك, پايدالانۋشى پلاتفورماعا PDF فورماتىنداعى قان تالداۋىنىڭ ناتيجەسىن جۇكتەپ, ارنايى دايىندالعان ساۋالنامادان وتەدى. كەيىن جۇيە بارلىق اقپاراتتى جىلدام وڭدەپ, تاۋەكەلدەردى شىعارىپ بەرەدى. ناتيجە قورىتىندىسىندا ادام ومىرىنە قاۋىپتى جاعداي بولسا, ناۋقاسقا بىردەن دارىگەرگە جۇگىنۋ ۇسىنىلادى.
پلاتفورما جۇمىسى كۇردەلى الگوريتمنەن تۇرادى. ول دياگنوستيكانىڭ جانە تاۋەكەلدەردى جىكتەۋدىڭ جوعارى دالدىگىن قامتاماسىز ەتەتىن تەرەڭ نەيروندىق جەلىلەر (DNNs) مەن ۇلكەن تىرەك ۆەكتورلارىنىڭ ادىسىنەن (Large-margin SVMs) تۇرادى.
قازۇۋ بازاسىنداعى جاساندى ينتەللەكت جانە زاتتار ينتەرنەتى زەرتحاناسىنىڭ عىلىمي قىزمەتكەرى ءاسيا بالتاباەۆا: «اتالعان جوبانىڭ باستى ارتىقشىلىعى – جىلدامدىعىندا. ەكىنشىدەن, دالدىگىندە. «Zhurek AI» مىڭداعان ناقتى مەديتسينالىق دەرەكتەر نەگىزىندە ازىرلەندى, سوندىقتان ول كەيدە دارىگەرلەر بايقاماي قالاتىن جاسىرىن اۋىتقۋلاردى دا كورە الادى. بۇل ەرتە دياگنوستيكا ءۇشىن وتە ماڭىزدى», دەيدى.
جوبانى عىلىم جانە جوعارى ءبىلىم مينيسترلىگى قارجىلاندىرادى. يننوۆاتسيالىق پلاتفورمانى قازۇۋ 15 عالىمى بىرلەسىپ ازىرلەدى. بولاشاقتا ماماندار جۇيەنى تولىق ىسكە قوسىپ, ءارى قاراي كوممەرتسيالاندىرۋدى جوسپارلاپ وتىر.
