جيىندا ءسوز العان پرەمەر-ءمينيستردىڭ ورىنباسارى ە.كوشەرباەۆ كەيىنگى جىلدارى ءبىلىم ۇيىمدارى مەن پەداگوگتەردىڭ قوعامداعى ءرولى ارتىپ كەلە جاتقانىن جەتكىزدى. ونىڭ ويىنشا, وسىعان وراي مۇعالىمدەردىڭ جاۋاپكەرشىلىگى دە, سوعان ساي جالاقىسى دا جىل ساناپ كوبەيىپ جاتىر.
– ەلىمىزدىڭ ەكونوميكاسىن دامىتۋ جاڭا زاماندا جاڭا مىندەتتەر جۇكتەدى. بۇل ءبىلىم سالاسىنا جاۋاپكەرشىلىكتى ارتتىرا ءتۇستى. ويتكەنى بىزگە قوعامنىڭ تالابىن قاناعاتتاندىراتىن, وزگەرىستەرگە بەيىم ۇرپاق قالىپتاستىرۋ قاجەت. مۇنداي ۇلى ءىس – البەتتە پەداگوگتىكى. قازىرگى زاماندا مۇعالىم ءبىلىم بەرۋشى عانا ەمەس, جاڭالىقتى جاساۋشى, وقۋشىنى باعىتتاۋشى بولۋى كەرەك. وسى رەتتە پرەزيدەنتىمىز ەرەكشە ءمان بەرىپ وتىرعان ۇرپاق تاربيەسىنە بىلىممەن بىردەي نازار اۋدارعان ابزال. تسيفرلىق ترانسفورماتسيا جاعدايىندا تەك ءبىلىم بەرۋ عانا ەمەس, بالالاردى جىلدام وزگەرتىپ جاتقان ومىرگە بەيىمدەۋ ماڭىزدى. جاساندى ينتەللەكت پەن جاڭا تەحنولوگيالار مۇعالىمنىڭ كومەكشىسىنە اينالىپ, شىعارماشىلىق پەن دامۋعا كوبىرەك مۇمكىندىك اشۋعا ءتيىس. سونىمەن قاتار پەداگوگتەردىڭ كاسىبي ءوسۋى مەن لايىقتى ەڭبەگى ءۇشىن بارلىق جاعدايدى جاساۋ قاجەت. ءبىزدىڭ ورتاق مىندەتىمىز – باسەكەگە قابىلەتتى, بولاشاقتىڭ سىن-قاتەرلەرىنە دايىن ۇرپاق تاربيەلەۋ, – دەدى ۆيتسە-پرەمەر.
تامىز كەڭەسىندە بايانداما جاساعان استانا قالاسىنىڭ اكىمى ج.قاسىمبەك بيىل قالادا ءۇش اۋىسىمدى مەكتەپ ماسەلەسى تولىعىمەن شەشىلەتىنىن ايتتى.
– مەملەكەت باسشىسى قاسىم-جومارت توقاەۆ رەسپۋبليكالىق تامىز فورۋمىندا ەركىن ۇرپاق ءوسىپ كەلە جاتقانىن, زاڭدى سايلاۋ مەن تارتىپكە باعىنۋ قوعامنىڭ بەرىك قاعيداسىنا اينالىپ, قازاقستاننىڭ جاڭا سيپاتتاعى مەملەكەتكە بەت بۇرعانىن اتاپ ءوتتى. ەلوردامىز جىلدان-جىلعا دامىپ, حالىق سانى ارتىپ كەلەدى. بىلتىر مەكتەپتى بىتىرگەن تۇلەكتەردىڭ سانى 14 مىڭ بولسا, بيىل مەكتەپكە باراتىن بالالاردىڭ سانى 30 مىڭنان اسىپ وتىر. بۇل نە دەگەن ءسوز؟ جىل سايىن كەم دەگەندە 10-15 مەكتەپ سالۋىمىز قاجەت. بيىل جەرگىلىكتى بيۋدجەت ەسەبىنەن 14 جاڭا مەكتەپ, 4 بالاباقشا اشىلدى. بوي كوتەرىپ جاتقان جەكەمەنشىك ءبىلىم ۇيىمدارى تاعى بار. 2024–2025 وقۋ جىلىندا مەملەكەت باسشىسىنىڭ باستاماسىمەن 16 «كەلەشەك مەكتەپتەرى» پايدالانۋعا بەرىلدى. بيىل تاعى 7 «كەلەشەك مەكتەپتەرى» اشىلادى. جاڭا مەكتەپتەردى كوپتەپ سالۋ ارقىلى باس قالامىزدا ءۇش اۋىسىمدا وقىتۋ ماسەلەسى شەشىلەدى. 2-3 جىل بۇرىن قالادا 8 ءۇش اۋىسىمدى مەكتەپ بولاتىن, وسى جىلدان باستاپ ءۇش اۋىسىمدى مەكتەپ بولمايدى, – دەدى اكىم ج.قاسىمبەك.
استانا قالالىق ءبىلىم باسقارماسىنىڭ باسشىسى قاسىمحان سەنعازى ۇلى 3-6 جاستاعى بالالاردى مەكتەپكە دەيىنگى ۇيىممەن قامتۋ 100 پايىزعا جەتكىزىلگەنىن, ەندىگى مىندەت رەتىندە 2 جاستاعى بالالار باراتىن بوبەكجاي-بالاباقشالاردى كوبەيتۋ قولعا الىنعانىن باياندادى.
– استانادا ۆاۋچەرلىك قارجىلاندىرۋ جۇيەسىن ەنگىزۋ ناتيجەسىندە 3-6 جاسقا دەيىنگى بالالاردى مەكتەپكە دەيىنگى تاربيەلەۋ جانە وقىتۋمەن قامتۋ كورسەتكىشى 100 پايىزعا جەتتى. ەندى 2 جاستاعى بالالاردى قامتۋعا كۇش سالامىز. 23 بالاباقشادا 150 بالانى قامتيتىن ينكليۋزيانى قولداۋ كابينەتتەرى اشىلدى. جاڭا وقۋ جىلىنان باستاپ وسىنداي كابينەتتەر سانى ارتادى. 20 بالاباقشادا «تىلگە بويلاۋ» قاناتقاقتى جوباسى ىسكە اسىرىلدى. جاڭا وقۋ جىلىنان بۇل جوبا قالا بويىنشا بارلىق مەملەكەتتىك بالاباقشاعا ەنگىزىلەدى. پرەزيدەنت قاسىم-جومارت توقاەۆتىڭ 2024 جىلعى 2 قىركۇيەكتەگى جولداۋىندا ەلىمىز بويىنشا 3 جىل ىشىندە 1300 مەكتەپتى قايتا جاڭعىرتۋ تاپسىرىلدى. استانادا وسى تاپسىرما اياسىندا 2025–2027 جىلدارى 22 مەكتەپتى جاڭارتۋ كوزدەلگەن. بيىلدىڭ وزىندە 6 مەكتەپ تولىق جاڭارتۋدان ءوتتى. ەلدە تەحنيكالىق جانە كاسىپتىك ءبىلىم بەرۋ ۇيىمدارىنىڭ ستۋدەنتتەرى الەمدىك دەڭگەيدە كاسىبي قۇزىرەتتەرىن راستاي باستادى. جۇمىسشى ماماندىقتار جىلى اياسىندا قولعا الىنعان بۇل باستاما تۇلەكتەردىڭ بىلىكتىلىگىن ارتتىرۋعا باعىتتالعان. حالىقارالىق سەرتيفيكات جاستارعا شەتەلدىك كومپانيالاردا تاجىريبەدەن ءوتىپ, ەڭبەك نارىعىنا سەنىمدى قادام باسۋعا جول اشادى. «World skills Kazakhstan 2024» VII رەسپۋبليكالىق چەمپيوناتىندا استانانىڭ 11 كوللەدجىنەن قاتىسقان ستۋدەنتتەر 31 قۇزىرەتتىلىك بويىنشا باق سىناپ, 11 مەدال يەلەندى. ناتيجەسىندە, ەلوردالىق كوماندا رەسپۋبليكا بويىنشا ۇزدىكتەر قاتارىنان تابىلىپ, جالپى كوماندالىق ەسەپتە ءبىرىنشى ورىندى جەڭىپ الدى, – دەدى ق.سەنعازى ۇلى.
ءىس-شارا شەڭبەرىندە ارنايى كورمە ۇيىمداستىرىلدى. كورمەدە ءبىلىم سالاسىن دامىتۋعا, ساپانى ارتتىرۋعا ارنالعان وتاندىق جانە شەتەلدىك ونىمدەر, كورنەكى قۇرالدار كورسەتىلىپ, باس قالاداعى وقىتۋ ۇيىمدارىنىڭ ءتيىمدى ادىستەرى مەن ۇزدىك تاجىريبەلەرى تانىستىرىلدى. ماسەلەن, استانا قالاسى №82 بالاباقشانىڭ مەڭگەرۋشىسى رايحان التىنحانقىزى كاسىبي باعدارلاۋدى, اتاپ ايتقاندا, جاساندى ينتەللەكت ەلەمەنتتەرىن بالاباقشادان باستاپ ەنگىزىپ وتىرعانىن جەتكىزدى.
– مەملەكەت باسشىسى قاسىم-جومارت توقاەۆ كەشەگى رەسپۋبليكالىق تامىز كونفەرەنتسياسىندا ءبىلىم ۇدەرىسىنە ۋاقىت وزدىرماي جاساندى ينتەللەكت ۇلگىلەرىن ەنگىزۋدى تاپسىردى. بالا مەكتەپتە جاڭا ءپاندى وڭاي الىپ كەتۋى ءۇشىن ءبىز جاساندى ينتەللەكت ۇلگىلەرىن بالاباقشادان باستاپ وقۋ-تاربيە ۇدەرىسىنە ەنگىزدىك. ءبىز بۇل جاڭا جوبانى نەگىزى بىلتىردان بەرى قولعا العانبىز. قازىرگى ناتيجەمىز جامان ەمەس. وسى جاساندى ينتەللەكت ەلەمەنتتەرى بار روبوتتەحنيكا ساباعىنان ۇزدىك بولعان بالالارىمىز حالىقارالىق ءبىلىم بايگەسىنەن 2-ورىن يەلەندى. تاربيەلەنۋشىلەرىمىز الدىمەن جاي قۇراستىرۋدان باستاپ ۇيرەنسە, كەيىن كۇردەلەنە تۇسكەن تاپسىرمالار ارقىلى پۋلتپەن باسقارىلاتىن ەلەكتروندىق تراكتوردى وزدەرى جاساپ شىقتى. بۇگىنگى تامىز كەڭەسىنە تاجىريبەمىزدى تاراتۋعا كەلىپ تۇرمىز, – دەدى ر.التىنحانقىزى.
كونفەرەنتسيا جۇمىسى استانالىق ۇزدىك پەداگوگتەردى ماراپاتتاۋمەن مارەسىنە جەتتى.
