بيىلعى بايقاۋعا الەمنىڭ تۇكپىر-تۇكپىرىنەن ون مىڭعا جۋىق قاتىسۋشى ءوتىنىش جولداعان. سولاردىڭ ىشىنەن تەك 10 ەسسە عانا فينالدىق كەزەڭگە ءوتىپ, The New York Times وقىرماندارىنا ۇسىنىلدى.
فاريزا بايقاۋعا ۇسىنعان اشىق حاتىندا قازاق قوعامىنداعى قىز بالالارعا قويىلاتىن ەسىمدەر ءداستۇرىن تالداپ, وسى الەۋمەتتىك-مادەني فەنومەننىڭ بۇگىنگى قوعامداعى كورىنىسىن سيپاتتاعان. ول بۇل تاقىرىپتى ۇلكەندەردىڭ اڭگىمەلەرىنەن, دوستارىنىڭ تاجىريبەسىنەن, سونداي-اق الەۋمەتتىك جەلىلەردەگى پىكىرتالاستاردان كەيىن تەرەڭىرەك ۇعىنعانىن ايتادى.
«بۇرىنعى جەڭىمپازداردىڭ حاتتارىن وقىپ شىققاننان كەيىن, مەن دە ءوزىم ءۇشىن ماڭىزدى تاقىرىپتى كوتەرگىم كەلدى. قىز بالاعا قويىلاتىن ەسىم – جاي عانا ءسوز ەمەس, ول ونىڭ بولاشاعىنا اسەر ەتۋى مۇمكىن ءداستۇردىڭ كورىنىسى. وسى جايت مەنى قاتتى ويلاندىردى», دەيدى فاريزا.
بايقاۋ ەرەجەسىنە سايكەس, ءار قاتىسۋشى ناقتى ءبىر ادامعا نەمەسە توپقا باعىتتالعان اشىق حات جازۋى ءتيىس. مۇنداي جانرداعى ەسسە قوعامداعى ماڭىزدى ماسەلەلەردى قوزعاپ, وقىرماندى ويلانۋعا, ارەكەت ەتۋگە ىنتالاندىرۋى قاجەت. سونىمەن قاتار, اۆتوردان تەك اقپارات بەرىپ قانا قويماي, تەرەڭ ەموتسيالىق اسەر قالدىرا ءبىلۋ دە تالاپ ەتىلەدى. فاريزانىڭ ەسسەسى وسى تالاپتارعا تولىق ساي كەلىپ, قازىلار القاسىنىڭ ەرەكشە نازارىن اۋدارتتى.
ايتا كەتۋ كەرەك, فاريزا فازىل بۇعان دەيىن دە ءتۇرلى حالىقارالىق ءبىلىم سايىستارىنا قاتىسىپ, جوعارى ناتيجەلەرگە قول جەتكىزگەن. 2025 جىلى وتكەن Infomatrix Asia بايقاۋىندا ەكىنشى ورىن يەلەنسە, Technovation Girls جوباسىندا قازاقستان اتىنان جارتىلاي فينالعا دەيىن جەتكەن.
گۋمانيتارلىق باعىتتاعى بۇل جەتىستىكتەرىنە قاراماستان, فاريزا بولاشاعىن عىلىممەن, ناقتىراق ايتقاندا – بيومەديتسينالىق ينجەنەريا سالاسىمەن بايلانىستىرادى.
«ەسسە, ماقالا جازۋ ماعان ۇنايدى. بۇل – ىشكى جان دۇنيەمدى, شىنايى تولعاندىراتىن تاقىرىپتى ەركىن جەتكىزۋدىڭ جولى. بىراق بولاشاقتا مەن عىلىم ارقىلى ناقتى وزگەرىستەر جاساعىم كەلەدى», دەيدى جاس تالاپكەر.
ەسكە سالساق, بۇعان دەيىن The New York Times بەتتەرىندە ەلىمىزدەن شىققان ازاماتتاردىڭ جازبالارى سيرەك جاريالانعان. بۇل جولى ورتامىزدان شىققان جاس وقۋشىنىڭ وزەكتى تاقىرىپقا جازعان تەرەڭ تولعانىسى حالىقارالىق دەڭگەيدە مويىندالىپ وتىر.
