مينيسترلىكتىڭ رەسمي حابارلاماسىندا: «قۇرمەتتى تالاپكەرلەر! ەگەر ءسىز ۇبت-دا بەيىندىك ءپان رەتىندە قازاق ءتىلىن تاڭداساڭىز جانە قازتەست تاپسىرعان بولساڭىز, ەندى سىزدە كەرەمەت مۇمكىندىك بار – قازتەست ناتيجەلەرىن ۇبت بالدارىنا اۋىستىرۋعا بولادى», دەلىنگەن.
قازتەست بالدارىن ۇبت بالدارىنا اۋىستىرۋ app.testcenter.kz سايتىندا جۇرگىزىلەدى.
قازتەست سەرتيفيكاتى بالىن «قازاق ءتىلى» ءپانى بويىنشا ۇبت بالىنا اۋىستىرۋ شكالاسى تومەندەگىدەي:
✔ قازتەست بويىنشا ۆ1 دەڭگەيى = ۇبت بويىنشا 42 بالل;
✔ قازتەست بويىنشا ۆ2 بالل = ۇبت بويىنشا 46 بالل;
✔ قازتەست بويىنشا س1 بالل = ۇبت بويىنشا 50 بالل.
بۇل جوعارى وقۋ ورنىنا ءتۇسۋدى جەڭىلدەتىپ قانا قويماي, جاستاردىڭ تىلدىك ساۋاتتىلىعىن دامىتۋعا, مەملەكەتتىك ءتىلدى جەتىك مەڭگەرۋگە دەگەن ۇمتىلىسىن قولداۋعا باعىتتالعان.
بۇعان دەيىن حابارلاعانىمىزداي, 2025 جىلعى 13 شىلدە مەن 20 شىلدە ارالىعىندا تالاپكەرلەردەن گرانتتار كونكۋرسىنا قاتىسۋ ءۇشىن وتىنىشتەر قابىلدانادى. قۇجاتتاردى egov.kz پورتالى ارقىلى ونلاين نەمەسە جوعارى وقۋ ورىندارىنداعى قابىلداۋ ورتالىقتارى ارقىلى (كەز كەلگەن جاقىن ورنالاسقان جوو-دا) تاپسىرۋعا بولادى.
