سالتاناتتى اشىلۋ راسىمىنە جەتىسۋ وبلىسىنىڭ اكىمى بەيبىت يساباەۆ, عىلىم جانە جوعارى ءبىلىم ءمينيسترى ساياسات نۇربەك, يتاليانىڭ قازاقستانداعى توتەنشە جانە وكىلەتتى ەلشىسى انتونەللو دە ريۋ, عالىمدار, مەملەكەت جانە قوعام قايراتكەرلەرى, وقۋ ورداسىنىڭ پروفەسسور-وقىتۋشىلار قۇرامى قاتىستى.
ءىس-شارادا عىلىم جانە جوعارى ءبىلىم ءمينيسترى ساياسات نۇربەك ءسوز سويلەپ, فيليالدىڭ اشىلۋى ەكى ەلدىڭ جوعارى وقۋ ورىندارىنىڭ تاريحىندا ەرەكشە ورىن الاتىنىن ايتتى.
«جەتىسۋ وبلىسىندا بۇگىنگى تاڭدا «اگرونوميا» جانە «اۋىل شارۋاشىلىعى عىلىمدارى مەن تەحنولوگيالارى» باعىتتارى بويىنشا قوس ديپلومدىق باعدارلامالار جۇزەگە اسىرىلىپ جاتىر. قازىرگى تاڭدا جىلىجاي كەشەندەرىنە بىلىكتى اگرونومدار مەن تسيفرلىق تەحنولوگيالاردى مەڭگەرگەن ماماندار اسا قاجەت. وسى تۇرعىدا ىسكە قوسىلعان فيليال سول قاجەتتىلىكتى وتەۋگە جاسالعان ناقتى قادام», دەدى مينيستر.
جەتىسۋ وبلىسى اگرارلىق ءوڭىر بولعاندىقتان, فيليالدا اۋىل شارۋاشىلىعى, تاعام ينجەرەنياسى, تۋريزم, ەكونوميكا جانە تسيفرلىق تەحنولوگيالار بويىنشا ءبىلىم بەرۋ باعدارلامالارى ىسكە قوسىلادى. بۇعان قوسىمشا اتالعان فيليال الداعى ۋاقىتتا جەتىسۋ وبلىسىن كاسىبي كادرلارمەن قامتاماسىز ەتۋگە مول مۇمكىندىك بەرەدى.
ءىس-شارا بارىسىندا وبلىس باسشىسى بەيبىت يساباەۆ: ء«بىزدىڭ ءوڭىر – اگرارلى ايماق. سوندىقتان بىزگە اۋىل شارۋاشىلىعىنا جاڭا يننوۆاتسيالار مەن وزىق تەحنولوگيالاردى ەنگىزەتىن بىلىكتى ماماندار قاجەت. وسى ماقساتتا وبلىس اكىمدىگى العاشقى كەزەڭدە 14 ستۋدەنتكە ارنايى گرانت ءبولدى. ماركە پوليتەحنيكالىق ۋنيۆەرسيتەتىنىڭ باسشىلىعى مەن عىلىم جانە جوعارى ءبىلىم مينيسترلىگىنە وسى ماڭىزدى جوبانى قولداعاندارى ءۇشىن شىنايى ريزاشىلىعىمدى بىلدىرەمىن», دەدى.
ءوز كەزەگىندە يتاليانىڭ قازاقستانداعى ەلشىسى انتونەللو دە ريۋ بۇل جوبانىڭ قازاقستان مەن يتاليا اراسىنداعى عىلىم مەن جوعارى ءبىلىم سالاسىنداعى ىنتىماقتاستىعىن جاڭا دەڭگەيگە كوتەرىپ, تىڭ سەرپىن بەرەتىنىن اتاپ ءوتتى.
«جەتىسۋ ۋنيۆەرسيتەتىمەن ارىپتەستىك ورناتۋ – يتاليانىڭ حالىقارالىق ستراتەگياسىنىڭ ماڭىزدى بولىگى. ءبىز ءبىلىم بەرۋ مەن عىلىمي زەرتتەۋ سالاسىندا بىرلەسكەن جوبالاردى ىسكە اسىرىپ, تاجىريبە الماسۋ ارقىلى ەكى ۋنيۆەرسيتەتتىڭ دە الەۋەتىن ارتتىرامىز. بۇل فيليالدىڭ اشىلۋى – تەك جاڭا مۇمكىندىكتەردىڭ باستاۋى عانا ەمەس, قازاقستان مەن يتاليا اراسىنداعى دوستىق پەن ىنتىماقتاستىقتى نىعايتۋدىڭ ناقتى قادامى», دەدى ەلشى.
ايتا كەتەيىك, فيليالدا اكادەميالىق ۇتقىرلىق باعدارلاماسى اياسىندا ماركە پوليتەحنيكالىق ۋنيۆەرسيتەتىنىڭ عالىمدارى مەن پروفەسسورلارى ءدارىس بەرەدى. سونداي-اق مۇندا ءبىلىم الاتىن ستۋدەنتتەر بىرلەسكەن عىلىمي زەرتتەۋلەر جۇرگىزۋگە, حالىقارالىق تاجىريبە الماسۋ مۇمكىندىگىنە يە بولادى. وقۋىن ءساتتى اياقتاعان تۇلەكتەرگە ەكى جوعارى وقۋ ورنىنىڭ ديپلومى بەرىلەدى.
