ءۇلبى-تالوۆكا اۋىلىنىڭ تۇرعىنى 103 نومىرىنە قوڭىراۋ شالىپ, ءبىر جاستاعى ۇلى ءبىر زاتقا تۇنشىعىپ, كوگەرىپ, تىنىس الماي جاتقانىن حابارلاعان.
فەلدشەر گالينا گرەچانيك بالانىڭ اكەسىنە نە ىستەۋ كەرەكتىگىن تەلەفون ارقىلى تۇسىندىرە باستاعان. وسى ساتتە جەدەل جاردەم بريگاداسى وقيعا ورنىنا جولعا شىققان. مەديتسينالىق كومەك كەلگەنگە دەيىن بولتتى بالانىڭ تىنىس جولدارىنان الىپ شىعۋ مۇمكىن بولعان, الايدا ءسابي ەس-ءتۇسسىز كۇيدە بولعان.
فەلدشەر كريستينا كولومەيتسەۆا جۇرەك-وكپە رەانيماتسياسىن جۇرگىزە باستايدى. ءتورتىنشى مينۋتتا بالا قايتادان تىنىس الا باستادى. ونى شۇعىل تۇردە اۋداندىق ورتالىق اۋرۋحاناعا جەتكىزدى. قازىر ءسابي تۇراقتى بولىمگە اۋىستىرىلعان.
