فوتو: اشىق دەرەككوز
«اباي. مۇرسەيىت قولجازبالارىنا سۇيەنىپ جاسالعان ترانسكريپتسيا» اتتى بۇل كىتاپ ەلىمىزدەگى بەدەلدى باسپالاردىڭ بىرىندە 2000 دانا تارالىممەن باسىلىپ شىققان.
زەرتتەۋ اۆتورلارى – فيلولوگيا عىلىمدارىنىڭ كانديداتى, دوتسەنت اقجول قالشابەك پەن PhD دوكتورانت ءازىمحان يسابەك. جوبانى جۇزەگە اسىرۋعا قر پارلامەنتى ءماجىلىسىنىڭ دەپۋتاتى ارداق نازاروۆ قولداۋ ءبىلدىرىپ, ەڭبەكتىڭ كەڭ اۋديتورياعا جەتۋىنە ىقپال ەتكەن.
عىلىمي ەڭبەكتە اباي شىعارمالارىنىڭ باستى قاينار كوزى سانالاتىن مۇرسەيىت بىكى ۇلىنىڭ قولجازبالارى تەكستولوگيالىق جانە تەرمينولوگيالىق تۇرعىدا تەرەڭ سارالانىپ, باسقا دەرەككوزدەرمەن سالىستىرىلعان.
سونىمەن قاتار, اقىننىڭ ءىنىسى حاليوللاعا جازعان حاتىنىڭ تۇپنۇسقاسى مەن ترانسكريپتسياسى, سونداي-اق راحىم جاندىباەۆ پەن ورازكە ۋاقباي ۇلى كوشىرگەن قولجازبالارمەن سالىستىرۋ ناتيجەلەرى دە ەنگىزىلگەن.
ەڭبەكتىڭ ەرەكشە ماڭىزعا يە تۇسى — ابايدىڭ 1910 جىلى جازىلعان قولجازباسىنىڭ تولىق فاكسيميلە نۇسقاسىنىڭ تۇڭعىش رەت جاريالانۋى.
كىتاپقا قازاقستاننىڭ مەملەكەتتىك سىيلىعىنىڭ يەگەرى, پروفەسسور مەكەمتاس مىرزاحمەت ۇلى رەتسەنزيا جازىپ, باتاسىن بەرگەن. اۆتورلاردىڭ ايتۋىنشا, بۇل ەڭبەك — بىرنەشە جىلعا سوزىلعان ۇزاق عىلىمي ىزدەنىستىڭ جەمىسى.
«اباي شىعارمالارىن تۇپنۇسقاعا سۇيەنىپ تولىق ءارى ساۋاتتى ترانسكريپتسيالاۋ — مۇحتار اۋەزوۆتىڭ كوزى تىرىسىندە ورىندالماعان ارمانى ەدى. بۇگىندە سول ارمان جۇزەگە استى», دەيدى اۆتورلاردىڭ ءبىرى ءازىمحان يسابەك.
712 بەتتىك بۇل زەرتتەۋ — ابايتانۋ سالاسىنداعى ىرگەلى جاڭالىقتاردىڭ ءبىرى رەتىندە باعالانىپ وتىر.
