وتىمىزدىڭ باسىنداعى ونداي يگىلىكتىڭ باعاسىن كەيدە بىلە بەرمەيتىنىمىز وكىنىشتى-اق. سونىڭ سالدارىنان حالىققا ءمىنسىز قىزمەت قىلۋدى باستى مىندەت سانايتىن كوممۋنالدىق سالا وكىلدەرىنىڭ ەڭبەگىن ەلەپ-ەسكەرە قويمايتىنىمىز بەلگىلى. تەك قاقاعان ايازعا قاراماي قولدارىنداعى قايلا, كۇرەكتەرىمەن قاتقان جەردى قازىپ, جارىلعان قۇبىرلاردى جاماپ-جاسقاپ جاتقان جۇمىسشىلاردىڭ جانكەشتى قيمىل-ارەكەتتەرىن كورگەندە عانا كۇنى-ءتۇنى تىنىم تاپپايتىن مازاسىز ماماندىق يەلەرىنە قۇرمەتپەن قارايمىز.
جۋىردا جۋرناليستىك ساپارمەن ءوندىرىسى وركەندەگەن جاڭاوزەن جاققا بارعانىمىزدا وسى ويىمىزدىڭ اينا-قاتەسىزدىگىنە ودان سايىن كوز جەتكىزە تۇستىك. شامامەن 150 مىڭنان اسا ادام مەكەندەيتىن مونوشاھار ءدۇيىم دۇنيە جۇزىندەگى تەڭىز دەڭگەيىمەن ەسەپتەگەندە ەڭ تومەن نۇكتەلەردىڭ بىرەگەيى قاتارىنداعى قاسيەتتى قاراقيا ويپاتى مەن بۇگىندە بۇكىل تۋريستەردىڭ اڭسارىنا اينالعان ايگىلى بوزجىرا شاتقالىنىڭ قاق ورتاسىنان قونىس تەۋىپتى. قۇلاق قويىپ تىڭداساڭىز قۇلاق قۇرىشىن قاندىرار مۇڭى دا, تاڭعا تولعاسا تاۋسىلمايتىن جىرى دا جەتەرلىك. شەجىرە قارتتارى شەرتەر ەسكىنىڭ ەستى سوزدەرىنە ەرىكسىز ەلتىپ, كونە تاريحتىڭ كومبەسىن اقتارعانداي بولەكشە كۇيگە بولەنەسىز.
قالا باسشىسى جانسەيىت قاينارباەۆتىڭ ايتۋىنا قاراعاندا, جاڭاوزەننىڭ قازىرگى الەۋمەتتىك-ەكونوميكالىق جاعدايى جامان ەمەس. پرەزيدەنت تاپسىرماسى بويىنشا ءتۋريزمدى دامىتۋ باعىتىندا ءبىراز شارۋانىڭ باسى قايىرىلىپتى. ءوڭىردىڭ ورگە باسۋىنا يگى اسەرىن تيگىزەتىن باسقا دا ءىرى جوبالار بارشىلىق. قۇرىلىس قارقىنى ارتىپ, كەيىنگى كەزدەرى بوي كوتەرگەن مادەني-الەۋمەتتىك عيماراتتار كوپشىلىك كادەسىنە جاراپتى.
جاڭاوزەندىكتەردىڭ كۇنكورىس كوزى نەگىزىنەن مۇنايمەن تىكەلەي بايلانىستى ەكەنى امبەگە ايان. تۇرعىنداردىڭ بەستەن ءبىر بولىگى ناپاقاسىن سول قارا التىننىڭ اينالاسىنان ايىرادى. جەرگىلىكتى بيلىكتى الاڭداتاتىن احۋال ادامدار اراسىنداعى الەۋمەتتىك تەڭسىزدىكتىڭ تىم ايقىن سەزىلۋى كورىنەدى. مىسالى, مۇنايشىلاردىڭ جالاقىسى ميلليون تەڭگەدەن اسسا, كوشە سىپىرۋشىلاردىڭ تاپقان-تايانعانى تاماعىن اسىراۋعا جەتپەيدى.
وسىلايشا, سالماقتى ويىن ساباقتاعان اكىم اڭگىمەسىن ءارى جالعاستىرىپ, قالانىڭ قالىپتى دامۋىنا قوماقتى ۇلەس قوسىپ, ءبىراز بيىكتەردى باعىندىرعان ءوندىرىس ورىندارىنىڭ جەتىستىكتەرىنە قىسقاشا توقتالىپ ءوتتى. جان جادىراتار جاقسىلىقتارمەن قاتار ءالى دە جەتىلدىرۋدى قاجەت ەتەتىن تولعاقتى ماسەلەلەردىڭ دە ءتۇپ توركىنىن جاسىرمادى.
ءبىز ارنايى ات باسىن بۇرىپ, تىنىس-تىرشىلىگىمەن جاقىنىراق تانىسقان «وزەنجىلۋ» مكك ۇجىمى ۋاقىت تالابىنا ساي سەرپىن تانىتىپ, وزاتتار ساپىنان ورىن سايلاعانىن كورىپ, كوتەرىڭكى كورسەتكىشتەردىڭ استارىنا ۇڭىلدىك. بۇگىندە بۇل مەملەكەتتىك كاسىپورىن قالا اۋماعىنداعى 265 كوپقاباتتى تۇرعىن ءۇيدى, بارلىق الەۋمەتتىك نىساندى, وندىرىستىك جانە وندىرىستىك ەمەس ۇيىمداردى, سونداي-اق «وزەنمۇنايگاز» اكتسيونەرلىك قوعامىنا قاراستى ءتۇرلى قۇرىلىمدى جىلۋ ەنەرگياسىمەن, ىستىق سۋمەن قامتاماسىز ەتىپ وتىر.
كاسىپورىن تەڭگەرىمىندەگى ورتالىق جىلۋ قازاندىعى مەن وزەن بەكەتىندەگى, قىزىلساي كەنتىندەگى, اۋدانارالىق مەديتسينا مەكەمەسىندەگى, مەكتەپتەردەگى شاعىن وشاقتاردىڭ وتى ۇزىلمەۋى نە ۇزدىكسىز جۇمىس جۇرگىزىلۋگە ءتيىس. سىرتقى جىلۋ جەلىلەرىن, ينجەنەرلىك ينفراقۇرىلىمداردى ۇدايى نازاردا ۇستاماسا بولمايدى. جاڭاوزەنگە جىلۋ تاراتاتىن قۇبىر جەلىسىنىڭ ۇزىندىعى 192 شاقىرىمدى قۇرايدى. تەمىر توزباي تۇرمايتىنى تۇسىنىكتى. سوندىقتان تالايعى تات باسقان جارامسىز بولىكتەرىن جاڭارتىپ وتىرماسا, اپاتتىق جاعدايلار ورىن الادى. ال اقىرعان ايازدا شاڭىراعى ىزعار شاشىپ, بولمەلەرىنىڭ قابىرعاسى ىلعالدان كوگەرىپ, بالا-شاعاسى بۇرسەڭ قاقسا, ابىگەرلى الەۋمەت تاراپىنان نارازىلىق تۋىپ, اقىر-سوڭى ايقاي-شۋ, ارىز-شاعىمعا ۇلاسۋى وپ-وڭاي.
– جالپى بىلاي عوي: جارعاق قۇلاعىمىز جاستىققا تيمەي كۇنى-ءتۇنى شاپقىلاپ جۇرسەك تە جۇرتقا جاعۋىمىز قيىنداۋ, – دەپ اعىنان اقتارىلدى اتالعان كاسىپورىن ديرەكتورى بەرىك ەڭسەپوۆ. – ەلدەن ماقتاۋدان گورى داتتاۋدى ءجيى ەستيمىز. ارينە, ونىڭ ىشىندە ورىندى سىن-ەسكەرتپەلەر از ەمەس. بىراق بۇدان ۇجىم مۇشەلەرىنىڭ ۇنجىرعاسى تۇسپەيدى. قايتا جىگەرىن جانىپ, نامىسقا قامشى باسادى. اتتەگەن-ايلاردىڭ الدىن الىپ, كەمشىلىكتەردى تۇزەتۋگە كىرىسەدى. ەرتەلى-كەش ۇيىنە ىستىق سۋ, جىلۋ كەلىپ تۇرسا ەشكىم ەشنارسە دەمەس ەدى. دانەكەرلەۋشى, سانتەحنيك, سلەسار سەكىلدى مامانداردىڭ بار-جوعىندا شارۋاسى بولا قويمايدى. تۇرمىستىق تۇيتكىلدەر وزدىگىنەن شەشىلىپ جاتقانداي سىڭاي تانىتاتىندارىن قايتەرسىڭ. جايلى احۋال ءبىزدىڭ سالا ساربازدارىنىڭ مارجانداي تامشىلاعان ماڭداي تەرىمەن سۋارىلاتىنىن تۇتىنۋشىلار قاپەردە ۇستاعانى ءجون.
جيىرما جاسىنان كوممۋنالدىق قىزمەتتىڭ قىزىعى مەن شىجىعىن قاتار كورىپ شىڭدالعان بەرىك ساقي ۇلىنىڭ باسشىلىق تىزگىنىن قولعا العانىنا بەس جىلدان اسىپتى. ايتۋىنشا, مەكەمەنىڭ بۇرىننان جيناقتالىپ قالعان ءبىر جارىم ميلليارد تەڭگە مولشەرىندەگى قارىزىنان قۇتىلۋ جولىندا تالاي تايعاق كەشۋلەردەن وتۋگە تۋرا كەلگەن. جاڭاشىل جەتەكشى قاراۋىنداعىلاردىڭ جاۋاپكەرشىلىگىن ارتتىرىپ, باسقارۋ تاسىلدەرىن بارىنشا جەتىلدىرىپ, ماتەريالدىق-تەحنيكالىق بازانى نىعايتۋعا, قىزمەت كورسەتۋ ساپاسىن ارتتىرۋعا ايرىقشا نازار اۋدارىپتى. بيلىك بيىگىندەگىلەردىڭ تابالدىرىعىن توزدىرىپ, ماسەلەنىڭ ءمانىسىن ءتۇسىندىرىپ, كوكەيگە قونىمدى دالەل-دايەكتەردى العا تارتىپ, ەنەرگياعا بەلگىلەنگەن ءتاريفتى ەپتەپ كوتەرۋگە قول جەتكىزىپتى. ويتكەنى «وزەنجىلۋ» – ءوندىرۋشى مەكەمە. گازدى, ەلەكتر توعىن ساتىپ الادى. ونسىز جىلۋ ءوندىرۋ مۇمكىن ەمەس. شەكتەن اسپاي شەگەلەنىپ تاستالعان تاريف كاسىپورىننىڭ كوكجيەگىن كەڭەيتۋگە كەدەرگى كەلتىرەتىنى بەلگىلى. ەڭ باستىسى, جالاقىنى كوتەرۋگە كەسىرىن تيگىزەدى.
كاسىپورىن الەۋەتىن ارتتىرۋ ماقساتىندا 2008 جىلى قالالىق اكىمدىك باستاماسىمەن ۇكىمەت اۋقىمدى كەشەندى جوسپاردى بەكىتىپتى. سونىڭ ارقاسىندا ورتالىق جىلۋ قازاندىعىن قايتا قۇرۋ جانە كەڭەيتۋ شارالارى جۇزەگە اسىرىلدى. سونداي-اق رەتىمەن جۇرگىزىلگەن رەكونسترۋكتسيا جۇمىستارىنىڭ ناتيجەسىندە وندىرىسكە العاش رەت ءتورت قۇبىرلى جۇيە ەنگىزىلدى. استىن سىزىپ اتاپ وتەرلىگى, مۇنداي تاجىريبە قازاقستاندا بۇرىن-سوڭدى قولدانىلماپتى. قاراپايىم تىلمەن تۇسىندىرسەك, جىلۋ باتارەيالارىنا جىبەرىلەتىن جانە جۋىنىپ-شايىنۋعا ارنالعان ىستىق سۋ بولەك-بولەك بەرىلەدى. سۋدىڭ اينالىم رەجىمى ساقتالادى. بۇرىنعىداي باسىم بولىگى قۇمعا ءسىڭىپ, قۇردىمعا كەتپەيدى. وتە ءتيىمدى ءتاسىل بولعاندىقتان بەي-بەرەكەت شىعىندار ازايدى. قۇبىرلاردىڭ تەز توزۋ ۇدەرىسى توقتادى.
جاڭعىرتۋ جۇمىستارىنىڭ ناتيجەسى ايتارلىقتاي بولدى. بۇرىن تاۋلىگىنە
16 000 تەكشە مەتر سۋ تۇتىنىلسا, 4 قۇبىرلى جۇيەگە كوشكەننەن كەيىن بۇل كورسەتكىش 4 000 تەكشە مەترگە دەيىن قىسقاردى. تۇتىنۋ مولشەرىنىڭ ازايۋى ءوز كەزەگىندە تابيعي گازدى, ەلەكتر ەنەرگياسىن, سۋدى ۇنەمدەۋگە مۇمكىندىك تۋدىردى. سودان كاسىپورىننىڭ قارجىلىق جۇكتەمەسى ازايىپ, وندىرىستىك شىعىنداردى وڭتايلاندىرۋعا جول اشىلدى. كەيىنگى جىلدارى قالا اكىمىنىڭ قولداۋىمەن بيۋدجەتتەن بولىنگەن قاراجات ەسەبىنەن كاسىپورىننىڭ ماتەريالدىق-تەحنيكالىق بازاسى ەداۋىر نىعايعان. اتاپ ايتقاندا, اۆتوكراندار, ارنايى جۇك تيەگىش كولىكتەر, ەكسكاۆاتورلار, ۇيلەستىرۋ قىزمەتىنە كەرەك تەحنيكالار, جەڭىل اۆتوماشينالار ساتىپ الىنىپتى. مۇنىڭ ءبارى – اپاتتىق جاعداي بولعاندا جەدەل ارەكەت ەتۋگە, جوندەۋ-قالپىنا كەلتىرۋ جۇمىستارىن ۋاقتىلى ءارى ساپالى اتقارۋعا اۋاداي قاجەت دۇنيەلەر.
قىزمەتكەرلەردىڭ ەڭبەك جاعدايىن جاقسارتۋ, قاۋىپسىزدىك تالاپتارىن ساقتاۋ, كاسىبي بىلىكتىلىكتى ارتتىرۋ ماسەلەلەرى جۇيەلى تۇردە شەشىمىن تاۋىپتى. 2020–2024 جىلدار ارالىعىن قامتيتىن ۇزاقمەرزىمدى, شىعىنسىز تاريفتەر بەكىتىلىپتى. جۇمىسشىلاردىڭ ەڭبەكاقىسى ورتا ەسەپپەن ەكى ەسەگە جۋىق ءوسىپتى. ۇجىمدى جاس ءارى بىلىكتى كادرلارمەن تولىقتىرۋ داستۇرگە اينالىپتى. سونىمەن قاتار تاريف قۇرىلىمىنا ەنەرگيا رەسۋرستارىنا جۇمسالاتىن شىعىندار مەن ءنورماتيۆتى ىسىراپتار تولىقتاي ەنگىزىلگەن سوڭ, كاسىپورىننىڭ قارجىلىق كورسەتكىشتەرى وڭعا باسىپتى.
ءيا, ىلكىمدىلىك – قاشاندا ىلگەرىلەۋ كەپىلى. جوقتى جونىپ تاپقانداي ىسكەرلىكتىڭ كومەگىمەن كوپ نارسەنى تىندىرۋعا بولاتىنى داۋسىز. وسى ورايدا «وزەنجىلۋ» مكك باسشىلىعىنىڭ بايىپتى ۇستانىمى بارلىعى بايقالادى. كەڭسەدەگى كەزدەسۋدە ءوندىرىستى ورگە سۇيرەپ جۇرگەن ازاماتتارمەن اشىق پىكىر الماستىق. ولار وزدەرىنىڭ وزەكجاردى ويلارىن ورتاعا سالدى. سولاردىڭ سوقتالى تۇستارىن كەلتىرە كەتەيىك.
ادىلبەك رۋبيلوۆ, باس ينجەنەر:
– ەرتەرەكتە ەسكى تەحنيكالاردى ەپتەپ-سەپتەۋمەن ەسىمىز شىعاتىن. قازىر ء«تۇتىنىمىز ءتۇزۋ» ۇشا باستادى. كەشەگى كۇندەرمەن سالىستىرعاندا 180 گرادۋسقا بۇرىلىپ كەتكەندەيمىز. اناۋ جوق, مىناۋ جەتپەيدىنىڭ جەتەگىندە ءجۇرىپ قارىزعا بەلشەدەن باتقانىمىز ەسىمىزدە. ەندى, مىنە, ەڭسەمىز كوتەرىلىپ كەلەدى.
ايتسە دە, شەشىمىن كۇتكەن ماسەلەلەر ءالى دە قىلاڭ بەرىپ قالادى. دۇرىستاپ قولعا الماسا, كادرعا بايلانىستى تىعىرىققا تىرەلۋىمىز عاجاپ ەمەس. زاماناۋي وزگەرىستەر وكتەمدىگىن جۇرگىزبەي قويمايدى. جاڭاشىلدىقتىڭ جالىنان ۇستاماساق, كوشكە ىلەسە المايمىز. سوندىقتان بىزگە جاڭا جوبالاردى جۇزەگە اسىراتىن بىلىمىنە بىلىگى ساي قىز-جىگىتتەر كەرەك. جوعارى وقۋ ورىندارىمەن ارىپتەستىك قارىم-قاتىناس ورناتپاي, كوزدەگەن ماقساتىمىزعا جەتە المايمىز.
الىبەك تۇرمانوۆ, ديرەكتوردىڭ اكىمشىلىك جۇمىستار جونىندەگى ورىنباسارى:
– ارا-تۇرا ءبىزدىڭ سالانى سەنىمگەرلىك باسقارۋعا بەرۋ تۋرالى يدەيالار ايتىلىپ ءجۇر. ستراتەگيالىق نىسان جەكە ادامنىڭ قولىنا وتسە, ونسىز دا ويبايى كوپ شارۋاشىلىق ودان سايىن شاتقاياقتاماي ما دەگەن قاۋپىمىزدى جاسىرمايمىز. جەكەشەلەندىرۋگە قاتىستى پىكىرلەرىمىزدى ۇكىمەتكە جولداعان بولاتىنبىز. بۇل ءبىر. ەكىنشىدەن, الەۋمەتتىك سالا تابىس تاپپايدى. بۇل – بيزنەس ەمەس. ءونىمىمىزدى قاراپايىم حالىق تۇتىنادى. ءتاريفتى بىردەن وسىرسەك, كوپشىلىك قينالادى عوي. سوندىقتان بيلىك قامقورلىق قاناتىنا الىپ, باسقالارعا بەرىلەتىن سۋبسيديا بىزگە دە تيسە دۇرىس بولار ەدى. تابىسىمىزدىڭ تەڭ جارتىسى سالىققا كەتەدى. دەمەك, مەملەكەتتىك دەمەۋگە ءزارۋمىز. ايتەۋىر ءبىر جەڭىلدىك قاراستىرىلسا دەيمىز عوي باياعى...
ەلميرا وتاراليەۆا, قاۋىپسىزدىك ءبولىمىنىڭ باسشىسى:
– ەڭبەككەرلەرىمىزدىڭ تۇرعىن جايىن جاقسارتۋعا, دەمالىسىن ۇيىمداستىرۋعا كوڭىل بولىنسە ەكەن. مۇناي ۇيىمدارىنىڭ ءوز قورلارى بار. مۇنايشىلاردىڭ بالالارى سول ارقىلى جوعارى وقۋ ورىندارىنا جولدامامەن جىبەرىلەدى. ەرتەڭ ديپلوم العاندا مىندا جۇمىسى دايىن تۇرادى. كوممۋنالدىق سالادا ونداي يگىلىكتەردىڭ ءبىرى دە جوق. قاشانعى قاعاجۋ كورمەكپىز؟
...قالانى جىلۋمەن قامتۋدىڭ كورىگىن قىزدىرعان ورتالىق قازاندىق ورنالاسقان جەرگە جەتكەنىمىزدە وسى كەشەننىڭ باستىعى امانعالي قاسىموۆ قارسى الىپ, نەگىزگى تسەحتارعا قاراي باستادى.
...مىنە, №3 تۋربوگەنەراتوردىڭ قاسىندا تۇرمىز. گۇرىلدەگەن, دىرىلداعان موتور ۇنىنەن قۇلاق تۇنادى. سوعان قاراماستان جولباسشىمىز قارسى الدىمىزداعى الىپ اگرەگاتتىڭ تەحنيكالىق مىنەزدەمەسىمەن تانىستىردى. كۇردەلى مەحانيزمنىڭ مينۋتىنا 1500 رەت اينالىپ, بۋ قىسىمىن جوعارى دەڭگەيگە جەتكىزىپ, پالەنباي كيلوۆات ەنەرگيا وندىرەتىنىن جەتكىزدى. اراسىندا جانىنا باتاتىن جايلاردى دا ايتىپ جاتىر. ء«بىز جىلىتۋ ماۋسىمى اياقتالعان سوڭ, جۇمىسشىلارىمىزدىڭ جارتىسىن اقىسىز دەمالىسقا جىبەرۋگە ءماجبۇرمىز. ويتكەنى قالا بويىنشا ىستىق سۋعا سۇرانىس جوق. تۇرعىندار ۇيلەرىنە ءبىر-ءبىر «اريستون» قويىپ العان».
– سوندا قالاي, سىزدەردىڭ سۋلارىڭىزدى قىمباتسىنا ما؟
– جوق. انەۋبىر جىلدارى كاسىپورىن ەكونوميكالىق قيىنشىلىققا تاپ بولىپ, ءتيىستى مىندەتىمىزدى اتقارا الماي پۇشايمان حالگە تۇستىك ەمەس پە؟ جاقسى كۇندەردەن كۇدەر ۇزگەن ادامدار ەلەكترلى جىلىتۋ قوندىرعىلارىن پايدالانۋعا كوشكەن. سوعان ۇيرەنىپ العاندارى سونداي, اۆتونومدى جۇيەدەن ايىرىلعىسى كەلمەيدى.
ارىپتەسىنىڭ اڭگىمەسىن ديرەكتوردىڭ ورىنباسارى الىبەك سارتوۆ ارمەن ءىلىپ اكەتتى.
– كوممۋنالدىق سالادا قىزمەت ىستەگەنىمە قىرىق جىلعا جۋىقتادى. جاڭاعى امانعاليدىڭ جانايقايىنىڭ باستى سەبەبى – شىعارىلعان ونىمگە تۇتىنۋشىنىڭ جوقتىعى. جاڭاوزەندىكتەر قىسى-جازى ۇيلەرىندەگى ۇيرەنشىكتى جىلىتقىشتارىن پايدالانعاندى ءجون سانايدى. ونىڭ كەرى اسەرىن سەزىنگەنىمىزگە ءبىراز بولدى. جىلىتۋ ماۋسىمى اياقتالعان سوڭ كەلىسىمشارتپەن ەڭبەك ەتەتىندەرمەن امالسىز ۋاقىتشا قوشتاسامىز.
ايتپاسقا بولمايتىن تاعى ءبىر جايت, ءبىز ءوزىمىزدىڭ وندىرىستىك قاجەتىمىزدى وتەيتىن ەلەكتر ەنەرگياسىن شىعارامىز. ۇكىمەت جاقتان ۇلكەن قولداۋ كورسەتىلسە, قۇلاشتى كەڭىنەن سەرمەۋگە بولار ەدى. ماسەلە مىنادا: بىزدەگى تۋربينالار – نەمىستىكى, قازاندىقتار – ورىستىكى. ەكەۋى ءبىر-بىرىنە ساي كەلمەيدى. قوندىرعىلار تولىق قۋاتىنا جەتۋ ءۇشىن ء«ۇيىرى» باسقانىڭ جۇمىسىن ۇيلەستىرۋ كەرەك. وعان قوماقتى قارجى قاجەت. ءوز كۇشىمىزبەن اتقارۋعا شامامىز جەتپەيدى. قازىر ىلدەبايلاپ ءجۇرىپ جاتقان جايىمىز بار.
– بۇل ماسەلە ءاۋ باستا نەگە ەسكەرىلمەگەن؟
– گەرمانيانىڭ «Siemens» فيرماسى «سىيعا» تارتقان دۇنيە عوي. الدەبىر كۇماندى كەلىسىمدەر بويىنشا كەلىپ قالعان. قۇرىلعىلاردى اپاي-توپاي ورناتىپ اتتانىپ كەتكەن شەتەلدىك مامانداردىڭ شالا-پۇلا جۇمىسى ەكەنىن كەيىنىرەك بىلدىك. ءوزىمىزدىڭ ماماندار ءويتىپ-ءبۇيتىپ ىسكە قوستى. سويتسەك, تەحنولوگياسى ەسكىرىپ, ەۋروپادا قولدانىستان الدەقاشان شىعىپ قالعان پەش ورناتىلىپتى. زاردابىن ءالى تارتىپ كەلەمىز. ايتسە دە, قول قۋسىرىپ قاراپ وتىرماي, ارەكەت ەتۋدەمىز.
كەڭ بولمەدە الدارىنداعى كومپيۋتەردەن كوز الماي قاز-قاتار وتىرعان وپەراتورلاردىڭ بىرىمەن سۇحبات قۇردىق.
– اتى-ءجونىم – نۇرگۇل نۇرعازىقىزى, اۋىسىم ديسپەتچەرىمىن. بۇكىل قالانى سۋىققا توڭدىرماي وتىرعان جىلۋ قازاندىعىن بۋمەن قامتاماسىز ەتەمىز. ءوزىڭىز ەكراننان كورىپ تۇرعانداي جالپى سانى 6 بۋ قازاندىعىنىڭ ۇشەۋى قىز-قىز قايناۋ ۇستىندە. وندىرىستىك ۇدەرىستى ۇنەمى باقىلاپ وتىرامىز.
مۇنداعى قىزمەتكەرلەر دە جان-جاقتان جارىسا سويلەپ, جازداعى ەرىكسىز دەمالىسقا بايلانىستى قىنجىلىستارىن ءبىلدىرىپ, اشىنعاننان ايتىلعان اششى مۇڭدارىن گازەت ارقىلى جوعارى جاقتاعىلارعا جەتكىزۋىمىزدى ءوتىندى.
«وزەنجىلۋ» مەملەكەتتىك كوممۋنالدىق كاسىپورنىنىڭ ديرەكتورى بەرىك ەڭسەپوۆتىڭ قوشتاساردا ايتقان مىنا ءبىر ءسوزى كوكەيىمدە قالىپ قويدى: ء«بىز, شىن مانىندە, حالىقتىڭ قىزمەتشىسىمىز. ەشكىمنەن ارتىق ماقتاۋ كۇتىپ, ەل يگىلىگى جولىندا اتقاراتىن ەڭبەگىمىزدى بۇلدامايمىز. ءار الۋان مىنەزدى الەۋمەتتىڭ كەيدە ارتىقتاۋ كەتەتىن اۋىر سوزدەرىن دە كوڭىلىمىزگە المايمىز. حال-قادەرىمىزشە ەتەكتەن تارتقان قيىندىقتاردى قاجىماس قايراتپەن ەڭسەرۋگە كۇش سالامىز. سەنەسىز بە, مەن اينالامداعى الەۋمەتتىڭ اماندىعىن, سۋىققا توڭىپ, ىستىققا كۇيمەۋىن قۇدايدان ىلعي تىلەپ جۇرەمىن. اعايىن-تۋعانىمنان, ءۇي ىشىمنەن كەم كورمەيمىن. قاباقتارىنا قاياۋ تۇسپەگەنىن قالايمىن».
اقىلدى سوزگە الىپ-قوسارىمىز جوق.
ماڭعىستاۋ وبلىسى,
جاڭاوزەن قالاسى
