Masters توبىندا رەيتينگى 2 400-دەن جوعارى 81 شاحماتشى ونەر كورسەتسە, Open ساناتىندا رەيتينگى 2 400-دەن تومەن 129 سپورتشى جارىس جولىنا شىقتى. قاتىسۋشىلار قاتارىندا 25 ەرلەر گروسسمەيستەرى مەن ءبىر ايەلدەر گروسسمەيستەرى بولدى. تۋرنيرگە الەمدىك شاحماتتىڭ تانىمال وكىلدەرى دە جينالدى. ولاردىڭ قاتارىندا الەم چەمپيوندىعىنا ۇمىتكەر بولعان ۆان حاو مەن اندرەي ەسيپەنكو, 2023 جىلعى ەۋروپا چەمپيونى سەربيالىق الەكسەي سارانا, شاحماتتىڭ راپيد تۇرىنەن 2018 جىلعى الەم چەمپيونى دانيل دۋبوۆ, 2018 جىلعى ەۋروپا چەمپيونى يۆان شاريچ, سونداي-اق الەكساندر پرەدكە مەن انتون دەمچەنكو بار.
قازاقستان قۇراماسىنىڭ نامىسىن دەنيس ماحنەۆ, قازبەك نوگەربەك, رامازان جالماحانوۆ, ەدگار مامەدوۆ سەكىلدى تاجىريبەلى شاحماتشىلار قورعادى.
حالىقارالىق ءتۋرنيردى حالىقارالىق شاحمات فەدەراتسياسى (FIDE), قازاقستان رەسپۋبليكاسىنىڭ تۋريزم جانە سپورت مينيسترلىگى, قازاقستان شاحمات فەدەراتسياسى جانە اقتوبە وبلىسىنىڭ اكىمدىگى بىرلەسىپ ۇيىمداستىردى.
ءتۋرنيردىڭ ۆلاديمير دۆوركوۆيچ ەسىمىمەن بايلانىستىرىلۋىنىڭ وزىندىك تاريحي ءمانى بار. حالىقارالىق شاحمات فەدەراتسياسىنىڭ مۇشەسى بولعان ول الەمنىڭ تۇكپىر-تۇكپىرىندە وتكەن جۇزدەن استام ءىرى حالىقارالىق تۋرنيرگە تورەشىلىك ەتتى. سونىمەن قاتار شاحماتشىلار رەيتينگىن ەسەپتەۋگە ارنالعان ارنايى جۇيەنى ازىرلەۋگە قاتىسىپ, الەم چەمپيوندارى اناتولي كارپوۆ پەن گارري كاسپاروۆتى دايىنداعان جاتتىقتىرۋشىلار قۇرامىندا ەڭبەك ەتتى.
ۆلاديمير دۆوركوۆيچ ەڭبەك جولىن ءدال وسى اقتوبە قالاسىندا باستاعان. ول 1960 جىلى تاگانروگ پەداگوگيكالىق ينستيتۋتىنىڭ فيزيكا-ماتەماتيكا فاكۋلتەتىن تامامداعان سوڭ جولدامامەن اقتوبەگە كەلەدى. جاس مامان از ۋاقىت ىشىندە جەرگىلىكتى سپورت جانە شاحمات ۇيىرمەلەرىنىڭ جۇمىسىن جولعا قويىپ, كوپتەگەن ءجاسوسپىرىمدى سپورتقا باۋليدى. ونىڭ باستاماسىمەن وڭىردە شاحمات مەكتەبىنىڭ نەگىزى قالانىپ, كەيىن بۇل مەكتەپتەن كوپتەگەن دارىندى سپورتشىلار شىقتى.
كەيىن ۆلاديمير دۆوركوۆيچ رەسەيگە قونىس اۋدارعانىمەن, ونىڭ شاكىرتتەرى مەن ءىزباسارلارى اقتوبەدە قالىپتاسقان شاحمات ءداستۇرىن ۇزگەن جوق. ۇستاز نەگىزىن قالاعان مەكتەپتىڭ جۇمىسى ۇزاق جىلدار بويى جالعاسىپ, وڭىردەگى شاحماتتىڭ دامۋىنا ۇلكەن ىقپال ەتتى.
وسى تاريحي ساباقتاستىقتى ساقتاۋ جانە ۆلاديمير دۆوركوۆيچتىڭ ەڭبەگىن ۇلىقتاۋ ماقساتىندا اقتوبەدە 2019 جىلى العاش رەت حالىقارالىق تۋرنير ۇيىمداستىرىلدى. سودان بەرى بۇل جارىس ءداستۇرلى تۇردە وتكىزىلىپ كەلەدى. جىل سايىن الەمنىڭ ءار تۇكپىرىنەن تانىمال شاحماتشىلار اقتوبەگە جينالىپ, ءوزارا مىقتىنى انىقتايدى.
بيىلعى ءتۋرنيردىڭ جالپى جۇلدە قورى 50 ميلليون تەڭگەنى قۇرادى. قوماقتى سىياقىنىڭ باسىم بولىگى ءداستۇرلى شاحمات بويىنشا وتكەن Masters ساناتىندا جوعارى ناتيجە كورسەتكەن سپورتشىلار اراسىندا بولىنەدى. سوندىقتان بۇل دودا تەك بەدەلدى حالىقارالىق جارىس قانا ەمەس, سونىمەن قاتار كاسىبي شاحماتشىلارعا ماڭىزدى رەيتينگتىك جانە قارجىلىق تۋرنير سانالادى.
اقتوبە وبلىسى
