بۇل اۋقىمدى جوبانى ىسكە اسىرۋ ءۇشىن قوماقتى ينۆەستيتسيا قاجەت. سوندىقتان دا قازىر ەل تۇرعىندارىن «كوممۋنالدىق قىزمەت تاريفتەرى ءوسىپ كەتپەي مە؟» دەگەن سۇراق الاڭداتىپ وتىر. دەگەنمەن, مەملەكەت بۇل ماسەلەنى اشىپ ايتتى. كوممۋنالدىق تولەمدەر قۇنى نەگىزسىز ءارى كۇرت وسپەيدى. ال ينفراقۇرىلىمدى جاڭعىرتۋ باعدارلاماسى مىندەتتى تۇردە الەۋمەتتىك قولداۋ شارالارىمەن قاتار جۇرگىزىلەدى.
از قامتىلعان وتباسىلار كوممۋنالدىق تولەم بويىنشا وتەماقىنى قالاي الادى؟
تۇرعىن ءۇي كومەگى قاشان تاعايىندالادى؟
از قامتىلعان ازاماتتاردىڭ وتباسىلىق بيۋدجەتىنە تۇسەتىن سالماقتى ازايتۋ ءۇشىن مەملەكەت تاراپىنان تۇرعىن ءۇي كومەگى قاراستىرىلعان.
تۇرعىن ءۇي كومەگى – بۇل تابىسى از ازاماتتارعا اكىمدىك اتىنان بەرىلەتىن ۋاقىتشا تولەم. بۇل كومەككە تابىسى تومەن وتباسىلار مەن ازاماتتار, سونىڭ ىشىندە زەينەتكەرلەر, كوپبالالى وتباسىلار, جۇمىسسىزدار جانە وزگە دە ساناتتاعى تۇرعىندار ۇمىتكەر بولا الادى. كومەك الۋدىڭ باستى شارتى: ۇيگە جانە كوممۋنالدىق قىزمەتتەرگە جۇمسالاتىن شىعىننىڭ سول وڭىردە بەلگىلەنگەن شەكتى دەڭگەيدەن اسىپ كەتۋى ءتيىس.
ماسەلەن, تابىسى بەلگىلەنگەن شەكتەن تومەن وتباسىلاردىڭ تۇرعىن ءۇي مەن كوممۋنالدىق قىزمەتتەرگە كەتەتىن شىعىندارى جالپى تابىسىنىڭ رۇقسات ەتىلگەن ۇلەسىنەن ء(ماسليحاتتار بەلگىلەيتىن 5%-دان 10%-عا دەيىنگى مولشەر) اسىپ كەتسە, ولار از قامتىلعان وتباسى بولىپ ەسەپتەلەدى.
ناقتىلاپ ايتار بولساق, استانادا ءبىر وتباسىندا 4 ادام تۇرادى دەلىك. ەلوردادا بۇل كومەكتى الۋ ءۇشىن بەلگىلەنگەن شەكتى دەڭگەي – 10%. وتباسىنىڭ ايلىق جالپى تابىسى – 320 000 تەڭگە. ال قىسقى جىلىتۋ ماۋسىمىندا ءۇيدىڭ كوممۋنالدىق قىزمەتى مەن كۇتىپ-ۇستاۋ شىعىندارى ايىنا 50 000 تەڭگەگە جەتەدى.
320 000 تەڭگەنىڭ 10%-ى = 32 000 تەڭگە.
ءىس جۇزىندە بۇل وتباسىنىڭ كوممۋنالدىق تولەمى بەلگىلەنگەن ليميتتەن 18 000 تەڭگەگە ارتىق بولىپ شىقتى. دەمەك, وتباسى ءدال وسى سوما كولەمىندە مەملەكەتتەن وتەماقى (كومپەنساتسيا) الۋعا ۇمىتكەر بولا الادى.
تۇرعىن ءۇي كومەگىن قالاي راسىمدەۋگە بولادى؟
تۇرعىن ءۇي كومەگى تولەنىپ قويعان تۇبىرتەكتەر (شوتتار) نەگىزىندە تاعايىندالادى. تۇسىنىكتىرەك ايتساق, ءسىز ءوتىنىشتى وتكەن ايدىڭ (نەمەسە توقساننىڭ) شىعىندارى ءۇشىن بەرەسىز.
ءوتىنىش بەرۋدىڭ ەكى جولى بار:
1. ونلاين فورماتتا – eGov.kz پورتالى ارقىلى;
2. وفلاين فورماتتا – حالىققا قىزمەت كورسەتۋ ورتالىعىنا (حقكو) ءوزىڭىز بارىپ تاپسىرا الاسىز.
ەندى بيىل 12 شىلدەدەن باستاپ ەلەكتروندى ءوتىنىش بەرۋ ودان ءارى وڭاي بولا تۇسەدى. ونەركاسىپ جانە قۇرىلىس مينيسترلىگى 2026 جىلعى 30 ناۋرىزدا تۇرعىن ءۇي كومەگىن كورسەتۋ ەرەجەلەرىنە وزگەرىستەر ەنگىزۋ تۋرالى بۇيرىق شىعاردى. بۇل جاڭاشىلدىقتىڭ باستى پايداسى – ەندى ونلاين ءوتىنىش بەرگەن كەزدە قاجەتتى مالىمەتتەردىڭ باسىم بولىگى مەملەكەتتىك اقپاراتتىق جۇيەلەردەن اۆتوماتتى تۇردە جۇكتەلەدى. دەمەك, كومەك الۋشىعا بۇرىنعىداي كوپ قۇجات پەن ءتۇرلى انىقتامالاردى جيناپ, ۋاقىت كەتىرۋدىڭ قاجەتى بولمايدى.
الەۋمەتتىك تولەم الۋ ءۇشىن جالعان جۇمىسقا ورنالاسقان 4 مىڭنان استام قازاقستاندىق انىقتالدى
راسىمدەۋ ءۇشىن مىنا قۇجاتتار قاجەت:
- جەكە كۋالىك (تەك حقكو-عا بارىپ تاپسىرعاندا عانا كورسەتىلەدى);
- وتكەن توقسانداعى (3 ايداعى) تابىس تۋرالى قۇجاتتار;
- كوممۋنالدىق قىزمەتتەر, ءۇيدى كۇتىپ-ۇستاۋ, بايلانىس قىزمەتى جانە باسپانانى جالداۋ اقىسى تۋرالى تۇبىرتەكتەر (كۆيتانتسيالار);
- بانكتىك ەسەپشوت ءنومىرى (IBAN);
- ەگەر ءوتىنىشتى ونلاين بەرسەڭىز, ەلەكتروندىق تسيفرلىق قولتاڭبا (ەتسق) قاجەت.
تۇرعىن ءۇي كومەگى 3 ايعا تاعايىندالادى. بۇل مەرزىم وتكەننەن كەيىن ءوتىنىشتى قايتا بەرىپ, تابىستار مەن شىعىنداردى تاعى ءبىر مارتە راستاۋ كەرەك.
ەسكەرۋ كەرەك ماڭىزدى جايت: تۇرعىن ءۇي كومەگى تەك ءبىر تۇرعىن ۇيگە عانا بەرىلەدى جانە كوممۋنالدىق قىزمەتتەردىڭ بەلگىلەنگەن نورمادان تىس (ارتىق) تۇتىنىلعان كولەمىن وتەمەيدى.
تۇرمىسى تومەن ازاماتتارعا بەرىلەتىن تۇرعىن ءۇي كومەگى قانداي شىعىنداردى جابادى؟
- كوممۋنالدىق قىزمەتتەر: سۋ, جارىق, جىلۋ, گاز;
- تۇرعىن ءۇيدى جانە ءۇي ماڭىنداعى اۋماقتى كۇتىپ-ۇستاۋ;
- كۇردەلى جوندەۋ;
- بايلانىس قىزمەتتەرى (مىسالى, تەلەفون ءۇشىن ابونەنتتىك تولەم);
- مەملەكەتتىك تۇرعىن ءۇي قورىنان الىنعان تۇرعىن ءۇي ءۇشىن جالداۋ اقىسى.
قىسقاسى, ەگەر وتباسىلىق بيۋدجەتىڭىزدىڭ قوماقتى بولىگى كوممۋنالدىق قىزمەت شىعىندارىن تولەۋگە كەتىپ جاتسا, وندا تۇرعىن ءۇي كومەگىن الۋعا قۇقىعىڭىز بار-جوعىن تەكسەرىپ كورگەن ءجون.
