قۇرىلىسشىلاردىڭ ايتۋىنشا بۇگىندە عيماراتتىڭ شاتىرى سۋ وتكىزبەيتىن ماتەريالمەن قايتا جابىلدى. سونداي-اق جىلۋۇستاعىش ماتەريالدارمەن دە قاپتالدى. بۇل جۇمىس بۇگىندە اياقتالۋعا تاياپ قالدى. عيماراتتى گيدرو, جىلۋوقشاۋلاعىش ماتەريالدارمەن قاپتاتۋ ماڭىزدى دەيدى ماماندار. سول ارقىلى جاۋىندى كۇنى توبەدەن سۋ سورعالامايتىن بولادى. ال قىس كەزىندە عيمارات ىشىندە جىلۋ ساقتالادى.
مۇز سارايىندا قالىپ تۇرعان ەندىگى جۇمىس ول ءىشىنىڭ جاڭعىرتىلۋى. ءبىرازدان بەرى جوندەۋ كورمەگەن عيمارات ءىشى توزا باستاعان-دى. اسىرەسە ايدىندى مۇز الاڭىنىڭ بەتون جابىندىسى جارىلىپ, سىزات پايدا بولىپ, ۇگىتىلە باستاعان ەدى. ەندى قۇرىلىستىڭ سوڭعى تەحنولوگياسى بويىنشا جاڭا بەتون جابىندىسى توسەلەدى. ودان بولەك عيمارات ينفراقۇرىلىمىنا كىرەتىن كوممۋنالدىق-ينجەنەرلىك جۇيەلەر قايتا جۇرگىزىلىپ, كاسىبي سپورتشىلارعا دا, كەلگەن قوناقتارعا دا بارىنشا جايلى جاعداي جاسالادى. قۇرىلىس سالاسىنىڭ ماماندارى عيماراتتى جوندەۋدە زاماناۋي قۇرىلىس نورماسىنىڭ تالاپتارىنا ساي جۇمىس اتقارادى. قىزمەت ساپاسىنان بولەك قولدانىلاتىن ماتەريالداردىڭ دا ساپالى بولۋىنا ۇلكەن كوڭىل بولىنەدى. سەبەبى كەلەشەكتە بۇل نىسان حالىقارالىق اۋقىمداعى قىسقى سپورت تۇرلەرىن وتكىزەتىن ماڭىزدى كەشەنگە اينالۋعا ءتيىس.
ءوز كەزەگىندە قۇرىلىسقا جاۋاپتى مامانداردىڭ مالىمدەۋىنشە, مۇز سارايى, جوعارىدا ايتىلعانداي, پايدالانۋعا بەرىلگەن كۇننەن بەرى بىردە-ءبىر رەت جوندەۋ كورمەپتى. نىسان ءبىراز ۋاقىت جەكەنىڭ پايدالانۋىندا بولدى. ول مەملەكەت مەنشىگىنە قايتا وتكەن سوڭ جەرگىلىكتى اكىمدىك ءىشى-سىرتىن تولىق جاڭعىرتۋعا شەشىم قابىلدادى. جوندەۋ جۇمىسى اياقتالعاننان كەيىن مۇز سارايى قالا تۇرعىندارى مەن سپورتشىلارعا زاماناۋي تالاپتارعا ساي قىزمەت كورسەتەتىن بولادى. سونداي-اق كەشەن قاۋىپسىز ءارى مۇز ۇستىندە سىرعاناۋدى ۇناتاتىن جاندارعا ارنالعان جايلى سپورت نىسانى بولادى دەگەن ءۇمىت بار. سپورت كەشەنىن بيىل تامىز ايىندا پايدالانۋعا بەرۋ جوس-پارلانىپ وتىر.
مۇز سارايى جونىندە جالپى ستاتيستيكاعا نازار اۋدارساق, ونىڭ تريبۋناسىنىڭ سىيىمدىلىعى 2 500 كورەرمەندى قامتيدى. ال كەشەننىڭ مۇز ايدىنىندا ءبىر مەزەتتە 300 ادام كونكي تەبە الادى. جوعارىدا اتاپ وتكەندەي سپورت سارايى 2017 جىلى جەكەمەنشىك باسقارۋعا ءوتىپ كەتكەن. الايدا قالا اكىمدىگى كەشەننىڭ الەۋمەتتىك ماڭىزدىلىعىن ەسكەرە كەلە, 2024 جىلى سپورت عيماراتىن قايتا مەملەكەت مەنشىگىنە وتكىزۋ تۋرالى شەشىم قابىلدايدى. ءسويتىپ, مۇز سارايىنىڭ 67 پايىزدىق ۇلەسى قايتادان مەملەكەتكە قايتارىلدى.
بيىل سونداي-اق توتەنشە جاعدايلار قىزمەتى ورنالاساتىن 3 نىساندى پايدالانۋعا بەرۋ جوسپاردا بار. سونىڭ ىشىندە بوزارىق-3 شاعىناۋدانىنداعى ورتكە قارسى قىزمەت بەكەتى بۇل كۇندەرى جۇمىسىن باستاپ كەتتى. جالپى, شىمكەنت قالاسىندا كەيىنگى جىلدارى حالىقتىڭ قاۋىپسىزدىگى مەن دەنساۋلىعىنا جاۋاپتى قىزمەت تۇرلەرىن ءبىر مەكەنگە جايعاستىرۋ تاجىريبەسى قولعا الىنا باستادى. مۇنىڭ توتەنشە جاعداي كەزىندە جەدەل ارەكەت ەتۋگە پايداسى زور ەكەنىن ايتادى ماماندار. وپەراتور پۋلتىنە تۇسكەن قوڭىراۋدان كەيىن جەدەل جاردەم دە, ءورت ءسوندىرۋ كولىگى دە, پوليتسيا دا ءبىر بەكەتتەن جولعا شىعىپ, وقيعا بولعان جەرگە دەرەۋ جەتەدى. مۇنداي ءادىستىڭ وقىس جاعداي كەزىندە قۇتقارۋشى مەن توتەنشە قىزمەت وكىلدەرىنە ۋاقىتتان ۇتۋىنا كومەگى زور. سونىمەن قۇرىلىس جوباسى اياسىندا توتەنشە جاعداي, پوليتسيا, جەدەل جاردەم بريگاداسى ورنالاساتىن كەشەندە قىزمەتتىك بولمەلەر, گاز-تۇتىننەن قورعاۋ قىزمەتىنىڭ بەكەتى, وقۋ كابينەتى, اسحانا, وقۋ-جاتتىعۋ مۇناراسى, سپورت الاڭى, گاراج مەن اۆتوتۇراق قاراستىرىلعان. جوعارىدا اتاپ وتكەنىمىزدەي, جاڭا دەپو جەدەل قىزمەتتەردىڭ وقيعا ورنىنا ۋاقىت ۇنەمدەپ, جىلدام بارۋىنا, سونداي-اق جالپى مەگاپوليستىڭ قاۋىپسىزدىك جۇيەسىن نىعايتۋعا زور سەپتىگىن تيگىزىپ وتىر.
ايتا كەتۋ كەرەك, بۇگىندە جاڭاتالاپ شاعىناۋدانىندا وسىنداي زاماناۋي امبەباپ كەشەننىڭ قۇرىلىسى ءجۇرىپ جاتىر. مۇنىمەن قوسا تۇران شاعىناۋدانىندا 4 تەحنيكا سىياتىن ءورت ءسوندىرۋ دەپوسىنىڭ قۇرىلىس-مونتاجداۋ جۇمىسى اياقتالۋعا جاقىن. اتالعان ءورت ءسوندىرۋ بەكەتى بيىل جىل سوڭىنا دەيىن پايدالانۋعا بەرىلمەك.
